ROM 14
14
वगामेगारदी न्याय शेयाकुंडा
1मी दिंटल्योन्केल यवाड विश्वासला कमजोर उंडाड वानदी स्वीकार शेयना, पण वान जताक वादविवाद शेयाकुंडा की वानकी येम शेयाबेक इंगा येम लेद. 2येनटीक काही विश्वासी मंदी इल्ला विश्वास फेटतार की, मनाम आंताच तिनाला, इंगा काही विश्वासी मंदी यवार विश्वासला कमजोर उंडार वार भाजीपालाने तिंटार.#14:2 आ वेळला संतालला मुर्तीलाक यक्पीचीनेद नंजुर शिकदु, काही विश्वासी मंदी इल्ला विश्वास फेटदुर की मुर्तीलाक यक्पीचीनेद तिनेद शिंगार लेद आंका वार भाजीपाला तिनदुर 3यवाड तिंटाड वाड यवाड तिनाड वान तुच्छ समजायाराद; इंगा यवाड तिनाड वाड तिनेतोरकी दोष आंचाराद; येनटीक की परमेश्वर वार इद्दारदी स्वीकार शेशीनाड. 4इंगोगोर सेवककी दोष आंचेतोड नु यवाड उंडाव? वाड स्थिर उंटे का फडी फोयते, इदी वान मालकुनदी जिम्मेदारी उंडाद. वाड स्थिरे उंडी; येनटीक की प्रभुड वान स्थिर शेशेदेंक समर्थ उंडाड.
5आल्ले काही मंदी काही दिनमुलान पवित्र मानास्तार, तर काही मंदी आन्नी दिनमुल सारखा मानास्तार. प्रत्येक मनशीक इदी खात्री उंडाला की वाड येम विचार शेस्ताड आदी बरोबर उंडाद. 6आल्ले यवाड यादाना दिनमु मानास्ताड, वाड प्रभुन इचांग मानास्ताड इंगा यवाड तिंटाड, वाड प्रभुन इचांग तिंटाड इंगा यवाड तिनाड वाड प्रभुन इचांग तिनाड इंगा परमेश्वरकी धन्यवाद इस्ताड. 7येनटीक की मना लोन्केल यवाड पण स्वता इचांग जगायाड इंगा यवाड पण स्वता इचांग शेयाड. 8येनटीक की मनाम जगास्ताम तर प्रभुन इचांग जगास्ताम इंगा मनाम सच्चतीम जरी तरी प्रभुन इचांग सच्चताम आंका मनाम जगास्ते का सच्चते तरी मनाम प्रभुन इचांगे उंडाम. 9येनटीक की ख्रिस्त सच्ची फोया इंगा वापस जिवंत आय्या आदी दिनिचांग की, वाड सच्चीनोरकी इंगा जित्ता उंडीनोरकी पण प्रभुड उंडाला.
10मंग मीर विश्वास शेशेतोनकी येनटीक दोष आंचतार? लेकुंटे विश्वास शेशेतोन येनटीक तुच्छ समजास्तार? मनाम आंता मंदी परमेश्वर न्यायासन मुंदार नीला फड्याम. 11येनटीक की पवित्र शास्त्रला इल्ला राशीनेद उंडाद की,
“प्रभुड आंटाड, निन ना जेमुद वट्टु तिस्केन शपतान, प्रत्येक मोकाल ना मुंदार टेकाशी,
इंगा प्रत्येक न्यालका कबुल शेशी की निने परमेश्वर उंडान.”#यशया 45:23; 49:18.
12तर मंग मना दिंटल्योन्टोड प्रत्येक मनशी परमेश्वरकी स्वता-स्वताद हिशोब इच्यार. 13दिनिचांग मनाम दिन मुंदारकी वगामेगारकी दोष आंचाराद. पण इल्ला ठराय मतदाम की, यवार पण विश्वास शेशेतोन दावाला तटराय तगलेदेंक लेकुंटे फडेदेंक कारण आय्यी इल्ला येमीच फेट्टाराद.
इंगोगोरकी अडखळन आय्येद कारण बनायाकुंडा
14नाक यरका उंडाद इंगा प्रभु येशुन तीकेल खात्री आयनाद की, यादुच तिनेद माटा आपोआप अशुद्ध लेद, पण यवाड दान अशुद्ध मानास्ताड, वान इचांग आदी अशुद्ध उंडाद. 15पण जर नी तम्मुड नी आन्नाम इचांग दुखी आयताड तर नु इप्पुड प्रेमनी फट्टी नडवाव इल्ला आय्या. यवान इचांग ख्रिस्त सच्ची फोया वानदी नु नी आन्नाम इचांग नाश शेयाक. 16दिनिचांग मीर येम शिंगार स्वीकार शेशीनार दानदी निंदा कानियाकुंडा. 17येनटीक की तिनेद तागेद दिंटल्या परमेश्वरदी राज्य लेद; पण नितीमत्व, शांती इंगा पवित्र आत्मा आनंदला उंडाद. 18यवाड पण इल्ला ख्रिस्तद सेवा शेस्ताड वाड परमेश्वरकी आवडास्ताड इंगा मंदी वानदी आदर शेस्तार.
19दिनिचांग मनाम वगामेगार जताक शांतीता निलचेद प्रयत्न शेयाला इंगा वगामेगार विश्वासनी मजबुत शेयाला. 20आन्नाम इचांग परमेश्वरदी फनी बिघडाया मताक; आंताच तिनेदेंक शिंगार तर उंडाद; पण मीर येम तिंटार आदी इंगोगोर इचांग अडखळन बनास्ताद, तर इदी शिंगार लेद. 21नंजुर तिनेद लेद इंगा अंगुरदी रस तागेद लेद लेकाते विश्वास शेशेतोनकी अडखळन आय्यी इल्ला येमीच शेशेद लेद इदी शिंगार उंडाद. 22इ माटला बद्दल मिद येम पण विश्वास उंडाद आदी मिद इंगा परमेश्वर नडमुडदी माटा उंडाद. यवाड स्वताक आवडाशीने माटलाला स्वताक दोष आंचाड वाड धन्य उंडाड. 23पण या मनशी शक शेशी तिंटाड वाड दोषी ठरास्ताड; येनटीक की वाड विश्वासता तिनालेद येनटीक की याद विश्वासता लेद आदी पाप उंडाद.
Zur Zeit ausgewählt:
ROM 14: WNT
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
