LUK 16
16
अन्यायी कारभारी
1येशुड वान शिष्यलाक वगा दाखला शप्या, “यादो वगा श्रीमंत मनशी कारभारी उंड्या, वाड नी दुडलु यगरा मतताड, इल्ला काही मंदी आ श्रीमंत मनशी देगार वान विरुद्ध शेशेदेंक वच्चीर. 2दिनिचांग आ श्रीमंत मनशी कारभारीन फिल्चीगास आन्या, नी बद्दल निन इदी येम इंटुनान? इप्पुड नी फनीद हिशोब इ; दिनिचांग की दिन मुंदारकी निक कारभार सुशेद गरज लेद. 3आप्पुड कारभारी स्वतान आन्या, ना मालकुड नाद फनी ना तीकेल तिशी तिस्कुंटुनाड तर निन इप्पुड येम शेयदुन? शेल्ला कष्ट शेशे इंता ताकत ना फयला लेद इंगा भिक आडगेद नाक शिग्गु आयताद. 4नन्नु कारभाऱ्यान फनी मिंदकेल वाड तिस्काडी तरी पण मंदी नन्नु वार इंटल्या तिस्कुनाला आंका निन येम शेयाबेक इदी नाक यरका उंडाद. 5मंग कारभाऱ्याड वान मालकुन प्रत्येक कर्जदारनी फिलच्या. पहिलावोन वाड आन्या, नी मिंदा ना मालकुनदी यंता कर्ज उंडाद. 6वाड आन्या, तीन हजार लिटर नुन्या. वाड वान आन्या, की नीद खाता पुस्तक तिस्को इंगा लगेच कुसनीगास दिन मिंदा दीड हजार राय 7इंगा इंगोगोन आन्या, नी मिंदा यंता कर्ज उंडाद? वाड आन्या, वीस हजार किलो गोदमाल, वाड वान आन्या, नीद खाता पुस्तक तिस्को इंगा सोळा हजार राय. 8अन्यायी कारभाऱ्याड शहाणपण शेशा. दिन मिंदकेल मालकुड वानदी प्रशंसा शेशा; येनटीक की इ युगलोन मंदी वार पिढी जताक व्यवहार शेशेताप्पुड यलगु बिळ्ळा काना शहाणा उंटार.
9 निन मिक शपतान, की मी इचांग मी अधर्मी दुडलाता मित्रल बनाय मतना. दिनिचांग की, यप्पुड इदी धन संपाशी आप्पुड वार मिमलान सार्वकालिक वस्तीला तिस्कुनाला. 10यवाड रव्वा दिंटल्या विश्वासयोग्य उंडाड; वाड शेंगेम दिंटल्या पण विश्वासयोग्य उंडाड इंगा यवाड कडमा माटला बद्दल बेईमान उंडाड वाड शेंगेम माटला बद्दल बेईमान उंडी. 11दिनिचांग जर मीर दुन्यामलोन संपत्ती बद्दल विश्वासयोग्य लेर, तर मंग खरेम संपत्ती बद्दल मी मिंदा यवार विश्वास फेट्यार? 12याद इंगोगोरदी उंडाद दान बद्दल मीर विश्वासयोग्य लेर तर याद मिद उंडाद आदी मिक यवार इच्यार? 13यादु पण नोकर इद्दार मालकुलाद सेवा शेशी शकायाड. येनटीक की वगानदी वाड शिट्टु शेशी इंगा इंगोगोन मिंदा प्रेम शेशी; लेकाते वगान वाड फटकेन निलची इंगा इंगोगोन कडमा समजाशी. मीर वक्का वेळला परमेश्वरदी इंगा दुडलाद सेवा शेशी शकायार.”
येशुड परुशी मंदीद निषेध शेस्ताड
14मंग परुशी मंदी यवार धनलोभी उंडीर वार इदी आंता इनीर इंगा वार येशुनदी मजाक यगरा मतेदेंक आंटीर. 15येशुड वारनी आन्या, “मीर स्वतान मंदी मुंदार नितीमान ठराय मततार, पण परमेश्वर मी मनलु गुरतु फटताड, येनटीक की याय माटलु मनशी कंडलाला महान उंडाय, आय परमेश्वर कंडलाला अमंगळ उंडाय.
16 मोशेनदी नियमशास्त्र इंगा संदेष्ट्याली लेखलु योहान बाप्तिस्मा शेशेतोड वच्ची नंताक प्रभावला उंड्या इंगा आप्पुडनोट परमेश्वर राज्यद सुवार्ता प्रसार शेशेदेंक वस्तुनाद, इंगा प्रत्येक मनशी दांटल्योंग दुरेद जोरदार प्रयत्न शेस्तुनाड. 17नियमशास्त्र लोनदी वगाट काना लेकाते मात्रा रद्द आय्ये काना मोडाम इंगा पृथ्वीद नाश आय्येद सोपा उंडाद.
18 यवाड पण मना वडतीन इडस्काडताड इंगा इंगोगो फेंडली शेस्कुंटाड वाड व्यभिचार शेस्ताड इंगा यवाड, मोगुड इडशीने वडती जताक फेंडली शेस्कुंटाड वाड व्यभिचार शेस्ताड.
श्रीमंत मनशी इंगा गरीब लाजर
19 यवाडो वगाड श्रीमंत मनशी उंड्या वाड धीन्नाम जांभळा इंगा फिर्यामी खादी बट्टाल फेटकुंदु. इंगा ऐशोआरामला निलदु. 20वान वाकील देगार लाजर फेरोड वगा गरीब मनशी फडीनोड उंड्या इंगा वान फय मिंदा फुंडलु आयन्या. 21आ श्रीमंत मनशी तिनेद टेबल मिंदकेल येम पण किंदा फडी आदी तरी नाक तिनेदेंक शिक्की इल्ला वाड अपेक्षा शेयदु; कुक्काल वच्ची वानी फुंडलु नाकदु. 22मंग इल्ला आय्या की, वाड गरीब मनशी सच्ची फोया इंगा स्वर्गदुतलु वान अब्राहाम दोक्काला येका फोई फेट्या. इंगा श्रीमंत मनशी पण सच्या इंगा वान बुडशीर. 23श्रीमंत मनशी मृतलोकला यातनाल भोगास्तुन्या, आंदुकेल वाड फैनिक सुशा इंगा धुराम केल अब्राहाम दोक्काला लाजर वानकी कमशा, 24वाड कीरली आन्या, हे यब्बा अब्राहाम, ना मिंदा दया शेशी लाजरनी आंप, दिनिचांग की वाड बोटदी टोक नेळाला मुंची ना न्यालकान सल्लांग शेशी, येनटीक की इ आग्गीला निन शेंगेम तडपास्तुनान. 25पण अब्राहाम आन्या ना कोडका, ध्यानाम शेय की नी जीवनला यल्ला निक मंची माटलु शिक्या, आल्ले लाजरकी वाईट माटलु शिक्या. पण इप्पुड वानकी आराम शिकतुनाद इंगा नु तडपास्तुनाव. 26इंगा इ आन्नी माटलान इडशी, नी इंगा मा नडमा वगाट फेद्दाद दरी फेटनेद उंडाद, दिनिचांग की, इंदुकेल यवारुच मी देगार दावाराद इंगा आंदुकेल मा तीकुड यवारुच दावाराद. 27वाड श्रीमंत मनशी आन्या, निन निक विनंती शेस्तान की, यब्बा, लाजरनी ना आब्बान इल्लुक आंप, 28येनटीक की नाक आयगुर तम्मुळ्ळु उंडार; वाड वारकी दिन बद्दल चेतावनी इच्ची, आंटे वार मिंदा तरी इदी त्रास दावाराद. 29पण अब्राहाम आन्या, नी तम्मुळ्ळा देगार मोशेनदी इंगा संदेष्ट्यालदी पुस्तक उंडाद, वारदी वार इनाला. 30वाड श्रीमंत मनशी आन्या, लेद, हे यब्बा अब्राहाम, सच्चीनोर लोन्केल यवाडाना जर ना तम्मुळ्ळा देगार फोईर आंटे वार पश्चात्ताप शेशार. 31अब्राहाम वान आन्या, जर वार मोशेनदी इंगा संदेष्ट्यालदी इनार, तर सच्चीनोर लोन्केल यवाडाना लेसना तरी वार वानदी इनाक फोयार.”
Zur Zeit ausgewählt:
LUK 16: WNT
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
