JHN 2
2
येशुनदी सार्वजनिक सेवा — 2:1—16:33
काना नगरलोन फेंडलीला येशुड
1मंग रोंड नाळा बाद गालील प्रांतलोन काना नगरला वगाट फेंडली उंड्या इंगा येशुन आम्मा आंदु उंड्या. 2येशुनकी इंगा वान शिष्यलाक पण फेंडलीद आमंत्रण उंड्या. 3यंक्सार अंगुरदी रस आय फोया आप्पुड, येशुन आम्मा वान आन्या, “वार देगारदी अंगुरदी रस आय फोयनाद.” 4येशुड दान आन्या, “हे यम्मा, नु इदी नाक येनटीक शपताव? नाद वेळ इप्पुडे दालेद.” 5पण वान आम्मा नोकरलान आन्या, “इड मिक येम पण शप्पी आदी शेयना.” 6आप्पुड आंदु यहुद्योर शुद्धीकरण चाली रितीलेका राळाय आर कुंडाल फेट्टीनेय उंड्या, वगा दांटल्या तरी अंशी ते एकशेवीस लिटर नेळ फटतुन्या. 7येशुड नोकरलान आन्या, “कुंडाल नेळाता निंचकाडना.” इंगा वार आय्यी काठोकाठ निंचीर. 8मंग वाड वारनी आन्या, “इप्पुड दांटल्योन्केल रवा तिस्केन वंटा शेशेतोर अधिकारी तीकुड येकेन फोंडा,” आप्पुड वार आदी येकेन फोईर. 9यप्पुड वंटा शेशेतोर अधिकारी आय नेळ ताग्या याय अंगुरदी रस आयन्या इंगा वानकी यरका लेकुंड्या की आदी यंदुकेल वच्या (पण या नोकरलु नेळ तिशीनीर वारकी यरका उंड्या), तर वाड फेंडली कोडकुन फिलच्या, 10इंगा वान आन्या, “प्रत्येक मनशी पहिला मंचीद अंगुरदी रस इस्ताड इंगा मंदी तागी फोईर की मंग सप्पीड इस्ताड, पण नु तर मंचीद अंगुरदी रस इप्पुड नंताक फेट्टीनाव.” 11येशुड गालील प्रांतलोन काना नगरला वान अद्भुत चिन्हद इदी सुरुवात शेशी वानदी शक्ती सुपीच्या इंगा वान शिष्यल वान मिंदा विश्वास फेट्टीर. 12दिन नंतर वाड, वान आम्मा, वान तम्मुळ्ळु इंगा वान शिष्यल किंदीक कफर्णहुम नगरकी फोईर; पण वार आंदु शेंगेम नाळ निलवाक फोईर.
परमेश्वर भवनदी शुद्धीकरण
13मंग यहुद्योरदी वल्हांडन फंडगा देगार वच्चीन्या इंगा येशुड यरुशलेम शहरकी फोया. 14इंगा वानकी परमेश्वर भवन परिसरला यद्दुल, मेंढऱ्याल इंगा कबुतरलु आम्मेतोर इंगा सावकारलु कुसनीनेद कमशीर. 15आप्पुड वाड दारालदी वगाट चाबुक शेशी मेंढऱ्याल इंगा यद्दुलान परमेश्वर भवनलेल गेदमेशा. सावकारलाय दुडलु पण फेकेशा इंगा चौरंगलु बोरकाला येस्काड्या. 16इंगा वाड कबुतरलु आम्मेतोरनी आन्या, “इटलान इंदुकेल येकेन फोंडा, ना स्वर्गीय आब्बान इल्लुद संता बनाया मताकुंडा.” 17आप्पुड वान शिष्यलाक ध्यानाम वच्या की पवित्र शास्त्रला राशीनेद उंडाद,
नी इल्लुद प्रेम
नन्नु तिनेसकाडी.#स्तोत्रसंहिता 69:9.
18पण यहुदी मंदी अधिकारील आडगीर, “नु येम शेस्तुनाव? जर परमेश्वर निक इल्ला शेशेद अधिकार इच्चीनाड, तर इदी सिद्ध शेशेदेंक माक वगाट चमत्कारी चिन्ह सुपी.” 19येशुड वारकी उत्तर इच्ची आन्या, “मीर इदी परमेश्वरदी भवन तेम्पेस काडना इंगा निन मुड नाळाला इदी नीला फडामत्यान.” 20दिन मिंदकेल यहुदी अधिकारील आनीर, “परमेश्वरदी इदी भवन कट्टेदेंक सेहेचाळीस यंडलु आंट्या इंगा नु इदी मुड नाळाला नीला फडा मत्याव येम?” 21पण येशुड तर वान शरीररुपी भवन बद्दल माटलाडीन्या. 22वाड सच्चीनोर लोन्केल लेशीनेंका, वान शिष्यलकी ध्यानाम वच्या की वाड इल्ला आनीन्या, इंगा वार पवित्र शास्त्र मिंदा इंगा येशुन वचनला मिंदा विश्वास फेट्टीर.
23यप्पुड वाड वल्हांडन फंडगा वेळला यरुशलेम शहरला उंड्या, तर शेंगेम मंदी वानी चमत्कारलु सुशीर इंगा वान फेर मिंदा विश्वास फेट्टीर#2:23 वान फेर मिंदा विश्वास फेट्टीर येशुन मसीहा मानाशीर . 24पण येशुड वार मिंदा विश्वास फेट्टालेद, येनटीक की वानकी आंदारदी स्वभाव यरका उंड्या. 25मनशी बद्दल साक्ष इयाला दिनदी गरज वानकी लेकुंड्या; येनटीक की मनशी लोना येम उंडाद इदी वानकी यरका उंड्या.
Zur Zeit ausgewählt:
JHN 2: WNT
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
