ACT 17
17
थेस्सलनीकला पौल
1मंग वार अंफीपुली इंगा अपुल्लोनिया इ शहरला लोन्केल फोई थेस्सलनीका शहरकी फोईर, आंदु यहुदी मंदीद सभास्थान उंड्या. 2आंदु पौल वान स्वभाव लेका वार तीकुड फोई मुड शब्बाथ दिनमुल वार जताक पवित्र शास्त्र मिंदकेल वादविवाद शेशा. 3वाड वारकी पवित्र शास्त्रलोन वचनलाद अर्थ समजायमत्या इंगा स्पष्ट रुपता सुप्या, ख्रिस्तनदी दुख सहन शेशेद इंगा सच्ची सावलेल वापस लेशी जित्ता आय्येद इदी आय्येद आवश्यक उंड्या इंगा या येशुनदी निन मी मुंदार घोषणा शेस्तुनान वाडे वाड ख्रिस्त उंडाड. 4आप्पुड वार दिंटल्योन्केल काही मंदीद खात्री आय्यी वार पौल इंगा सिलान जताक कुडीर; इंगा ग्रीक मंदीद फेद्दाद समुदाय वारकी शिक्या, दांटल्या प्रमुख आंड्योर पण शेंगेम उंडीर. 5पण यहुद्योर इर्ष्यामता वार जताक संतालोन काही गुंडालनी जमा शेशी नगरला दंगा शेशीर इंगा पौलनी इंगा सिलान मंदी मुंदार यकेन वच्चे उद्देशता वार यासोन इल्लु मिंदा हल्ला शेशीर. 6पण वारदी शिक्काक फोईर आप्पुड वार यासोननी इंगा काही मंदीन नगरलोन अधिकारीला तीकुड जग्गुका फोई कीरलीगास आनीर, यवार दुन्यामदी उलटापालट शेशीर वार इंदुक पण वच्चीनार. 7वारनी यासोन वान इंटल्योंग तिस्कुंडाड इंगा इर आंदार कैसर आज्ञा विरुद्ध वागास्तार, आंटे येशुड राजा उंडाड इल्ला आंटार. 8इदी इनी मंदी इंगा अधिकारील भटकाशी फोईर 9मंग वार यासोनदी इंगा बाकी मंदीद जमानत तिस्केन वारनी इडस्काडीर.
बिरुयाला पौल इंगा सिलास
10मंग विश्वासी मंदी पौलनी इंगा सिलान लगेच मोब्बुला बिरुया शहरकी आंपकाडीर, वार आंदुक पोहचाशीनेंका यहुदी मंदी सभास्थानलोंग फोईर. 11आंदुड मंदी थेस्सलनीलोन मंदी काना बागा उंडीर; वार फेद्दा आनंदता वचन स्वीकार शेशीर इंगा इ माटलु इल्ले उंडाय का लेद दिन बद्दल वार पवित्र शास्त्रला धीन्नाम फुडकुदुर. 12वार दिंटल्योन्केल शेंगेम मंदी इंगा शेंगेम प्रतिष्ठित ग्रीक आंड्योर इंगा मन्सुल विश्वास फेट्टीर. 13पण पौल परमेश्वरदी वचन बिरुयाला पण शपतुनाड इदी थेस्सलनीलोन यहुदी मंदीक तेलच्या आप्पुड वार आक्काड पण फोई मंदीन भडकाय मतेद सुरु शेशीर. 14दिनिचांग विश्वासी मंदी पौलनी समुद्र तीकुड फोयेदेंक लगेच आंपकाडीर; पण सिलाड इंगा तीमथ्यड आंदे निलचीर. 15आप्पुड पौलनी येका फोयेतोर मंदी वान अथेनै नंताक येका फोईर इंगा सिलाड इंगा तीमथ्यड आय्यी आंता लग्गान वान तीकुड दावाला इदी आज्ञा तिस्केन वापस फोईर.
अथेनै शहरला पौल
16पौल अथेनैला सिलानदी इंगा तीमथ्यद दावा सुशेताप्पुड, आदी उर मुर्तीलाता निंडीनेद उंडाद इल्ला सुशी वानकी दुख आय्या. 17दिनिचांग वाड सभास्थानला यहुदी मंदी जताक इंगा सेवकला जताक इंगा संताला यवार वानकी कमसुदुर वार जताक दिनाम वादविवाद शेयदु. 18आप्पुड एपिकुरपंथी इंगा स्तोयिकपंथी मंदी जताक यंता तरी तत्वज्ञानी मंदी वानदी विरोध शेशीर, इंगा यंता तरी मंदी आनीर की, “इड बडबड्याड येम माटलाडतुनाड?” इंगोगोर आनीर, “इड इंगोगो द्यावारलाद घोषणा शेशेतोड कमस्ताड” येनटीक की येशुनदी इंगा पुनरुत्थानदी सुवार्ता पौल आंदु शेस्तुन्या. 19मंग वार वान फट्टी अरियपग टेकडी मिंदीक येका फोई आनीर, “नु इच्चीनेद कोत्ताद शिकवण येम उंडाद इदी माक समजायमती शपताव येम? 20येनटीक की नु माक यरका लेव इल्लोनी माटलु शपतुनाव; दिनदी अर्थ येम उंडाद इदी तेल्ची तिस्कुनाला इल्ला माद इच्छा उंडाद.”
21यायाना कोत्ता माटलु शप्पीन शिवाय लेकाते इनीन शिवाय अथेनैकर मंदी इंगा आंदु निलचेतोर परदेशी मंदीद वेळ फोकुंदु.
अरियपगला पौल शेशीनेद भाषण
22आप्पुड पौल अरियपग सभा नडमा नीला फडी आन्या, हे अथेनैलोन मंदीलाला, मीर आन्नी माटलाला द्यावारलान शेंगेम मानास्तार इल्ला नाक कमस्ताद. 23येनटीक की निन तिरगुका-तिरगुका मी पुजा शेशे वस्तुलान सुशेताप्पुड, अनोळखी परमेश्वरकी इ अक्षरलु राशीनेद वगाट वेदी कमशा यवारदी मीर गुरतु फट्टांदे पुजा शेस्तार, निन वान बद्दले शपतुनान. 24या परमेश्वर दुन्याम इंगा दांटल्योनदी आंताच बनायमत्या वाड स्वर्ग इंगा पृथ्वीटोड प्रभुड उंडी शेयता बनामतीने भवनला निलवाड. 25इंगा वानकी येमाना कमी उंडाद, आंका मनशी शेयता वानदी सेवा कावाला इल्ला पण लेद; येनटीक की जीवन जेम इंगा आंताच वाड स्वता आंदारकी इस्ताड. 26इंगा वाड वगा मनशी तीकेल मनसुलाय आन्नी जातील बनायमत्या येनटीक की वार आंता पृथ्वी मिंदा निलवाला; इंगा वाडे मंदीद वेळ इंगा वार निलचे भुमीद सीमा ठराय मतीनाड#अनुवाद. . 27दिनिचांग की, वार परमेश्वरनी फुडकाला इंगा आय्यी शकास्ताद की वार वान नंताक पोहचाशी वारकी शिक्काला, तरी पण वाड मना दिंटल्योन्केल यवार देगाटेल पण धुराम लेड.#यशया; यिर्मया. 28येनटीक की मनाम वान दिंटल्या जगास्ताम, वागास्ताम इंगा उंडाम; यल्ला मी दिंटल्योन यंता तरी कवील आनीर की, मनाम तर वान बिळ्ळु उंडाम.
29तर मंग मनाम परमेश्वर बिळ्ळु उंडीनाप्पुड, मनशी हुशारीता इंगा कल्पनाता कोराशीनेय बंगारी, यंडीय लेकाते राय, इटला आकृती लेका परमेश्वर उंडाड इल्ला मनाक वाटायाराद. 30अज्ञानी युगला परमेश्वर कंडलु मुस्कुन्या, पण इप्पुड आंदार आन्नी तीकुड पश्चात्ताप शेयाला इल्ला वाड मंदीक आज्ञा इस्ताड. 31वाड इल्ला वगा दिनमु निवडाशीनाड, यबद वाड मना निवडाशीने मनशी#17:31 मनशी येशु तीकेल दुन्यामदी न्याय नितीमत्वता शेशेतोड उंडाड; वाड वान सच्चीनोर लोन्केल लेपी दीन बद्दल आंदारकी प्रमाण इच्चीनाड.
32आप्पुड सच्चीनोर पुनरुत्थान बद्दल इनीगास यंता तरी मंदी मजाक यगरा मतेदेंक आंटीर, इंगा यंता तरी मंदी आनीर, “दीन बद्दल मिम नीद प्रवचन इंगा यप्पुडाना इन्याम.” 33इंता आयनेंका पौल वार दिंटल्योन्केल यल्ली फोया. 34पण काही मंदी वान जताक कुडीर इंगा विश्वास फेट्टीर; दांटल्या दिओनुस्य अरियपगकर, दमारी फेरुद वगा आंडीद इंगा इर जताक इंगोगोर यंता तरी मंदी उंडीर.
Zur Zeit ausgewählt:
ACT 17: WNT
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
