संत.मत्‍ती 17

ईसु आला भेस बदलाअ

(संत.मरकुस 9:2–13; संत.लुकास 9:28–36)

1आउर छाव रोज तयोम ईसु, पतरस आउर याकुब, हुनी आली बोको जोहन के आनेःग लोः रिड़िगया उसूल बुरु तेंग रे इदी लिकुआय। 2हुंकू मड़ांग रेगी ईसु आला भेस बदलाव ना, आउर हुनी आला मेःड-मुहांड़ सिंङ बोंगा लकान लवकाव ना, आउर हुनी आला गेन्दरअ तरास लकान फिट-फिट पुँड़ीः ना। 3फिन अचाका चेलाकु, मुसा आउर इलियस के ईसु लोः बतियाव यअते नेल नेनाकिन। 4हुंकू के नेल केते पतरस ईसु के बेता लियाय, “ए परभु, आबु के नोआँड़े ताहिनोः बेस एदनाअ, आम चहाआम दो ईङ नोआँड़े पेया तंबू बनायीङ, मियांड आम लःअय, मियांड मुसा आउर मियांड इलियस लःअय।”

5 # एहेः 22:2; सिरिंग 2:7; जसा 42:1; सं.मत्‍ती 3:17; 12:18; सं.मर 1:11; सं.लुका 3:22; कन 18:15 # 2 पत 1:17,18 हुनी क-कंहड़ी केनाय, ची हुंकू तेंग रे मियांड फिट-फिट पुँड़ी लवकाःते रिम्बिल छेका किद कुआय, आउर होना रिम्बिल तरअः नोःआँ सबद आयुम नेना, “नुई ईङ आली दुलार होपोन हेके, ईङ नुई रे मुरुक खुस एदानिङा नुई आला आयुमेपे।”

6जब चेलाकु नोःआँ के आयुम लअकु, दो हुंकू हुमकुरिया उयुअ नाकु आउर मुरुक जोड़ से बोरोः नाकु। 7ईसु हुंकू दुबाःड़े सेन केते हुंकू के छुवाँव लिकुआय, आउर बेता लिकुआय, “बिरिःड पे, आलपे बोर” 8तब हुंकू साँगील लअकु दो ईसु के बाई केते आउर ओके होः काकु नेल नेना।

9जब हुंकू बुरु तरअः अड़गुन केनाकु, ईसु हुंकू के हुकूम एमा लिकुआय, “जब तक मनवा होपोन गोएःग केते काय जिवीःड बिरिडोआ जगुत, ओके केहोः जे नेल थिलाआपे होना के आलपे उदूः के।”

10 # मला 4:5 आउर चेलाकु ईसु के कुली लियाकु, “धरम पुथी सि-सिखावकु एतान लःअय कंहड़ीआकु, ची इलियस के पहिल रे हिजोअ दरकार एदनाआ?”

11ईसु कंहड़ी रूवाड़ लःअय, “इलियस जुन-जुना जामा कंहड़ी के सुधराव केआय।” 12#सं.मत्‍ती 11:14“बकिर ईङ आपे के कंहड़ीओ दिपीईंग ची इलियस हीःग चुकाव तनाय, आउर होड़कु हुनी के काकु चिनहा लिया, बकिर हुनी लोः जाईसन चहाव नेनाकु हेंकान लअकु, निआँ लकान मनवा होपोन होः हुंकू आला तीः तरअः दुख सहाव केआय।”

13तब चेला समझाव नाकु ची ईसु जोहन बतिस्मा एमोई रअः बारे कंहड़ी तनाय।

मुवाँ आतमा सःब लिनी चेंगा के छोड़ाव लियाय

(संत.मरकुस 9:14–29; संत.लुकास 9:37–43)

14जब हुंकू तुन्दरा थिनाकु होनाःड़े सोदोर नेनाकु, दो मिहोंड़ होड़ हीःग नेनाय आउर ईसु मड़ांग रे ईकड़ुम केते बेता लियाय। 15“ए परभु, ईङ आली बाबु तिंग के दयाई मे, हुनी रे मिरगी हिजोआ आउर हुनी आला दसा मुरुक बगड़ाव ना, आउर हुनी जामा बेरा सेंगेल चाहे दाअः रे उयुगोआय। 16ईङ हुनी के आम आलकु चेलाकु दुबाःड़े आगु लियीङ, बकिर हुंकू हुनी के काकु बेस दाड़ी लिया।”

17ईसु बेता लिकुआय, “ए भटकाव उनकु अबिसवासीकु, ईङ ओका हिला जगुत आपे लोः तहिनुईंग? ईङ आपे के ओका हिला जगुत सहाव पीईंग? ईङ दुबाःड़े हुनी के आगुई पे।” 18ईसु मुवाँ आतमा के डपटाव लियाय, आउर हुनी नांव छठिया कोड़ा तरअः उडुंग नाय, हुनी कोड़ा चेंगा हेने घड़ीक बेस नाय।

19तयोम चेलाकु सुमसान ठाँव रे ईसु दुबाःड़े एकले रे सेन केते कुली लियाकु, “आले हुनी के एतान लःअय काले उडुंग दाड़ी लिया?”

20 # सं.मत्‍ती 21:21; सं.मर 11:23; 1 कुरि 13:2 ईसु हुंकू के बेता लिकुआय, अपन बिसवास रअः घटाल रअः चलते। “ईङ आपे के नोःआँ सचे बेताः दिपीईंग, जदि आपे आला बिसवास राई गोटा बराबईर एदनाअ, दो नोःआँ बुरु के कंहड़ीपे, ‘नोआँड़े तरअः होनाःड़े जगुत ओचोः जुनोः, दो होना ओचोः जुनोआँ।’ आउर आपे लःअय जामा दाड़ी सकाव कोआ।” 21बकिर बेगार बिनती आउर उपासते, आउर एटाअ उपाई रे नुकू खाता मुवाँ काकु उडुंगोआ। #17:21 थोड़ेक युनानी पुथी रे नोःआँ पद 21 जोड़ाव तदाकु।

अपन गोजोः रअः बारे आउर मिसा उउदूः

(संत.मरकुस 9:30–32; संत.लुकास 9:43–45)

22जब हुंकू गलील रे जवारोअ केनाकु दो ईसु हुंकू के बेता लिकुआय, “मनवा होपोन के होड़कु आला तीः रे सःब ची कियाकु। 23हुंकू हुनी के गोएःग कियाकु, आउर हुनी पे रोज रे जिवीःड-बिरिःड कोआय।”

चेलाकु नोःआँ आयुम केते मुरुक उदास नेनाकु।

बड़े बिनती ओड़ाअ रअः मालगुजारी

24 # उइठ 30:13; 38:26 जब हुंकू कफरनहुम सोदोर नेनाकु, दो बड़े बिनती ओड़ाअ रअः मालगुजारी ऊ-उघाव कु पतरस दुबाःड़े हीःग केते कुली लियाकु, “आपे आली गुरू बड़े बिनती ओड़ाअ रअः मालगुजारी काय एमेआ एतान?”

25हुनी कंहड़ी लःअय, “हाँ, एमेआय।”

जब हुनी ओड़ाअ हीःग नेनाय, दो ईसु हुनी के कुकुली तरअः पहिल रे पतरस के कुली लियाय, “ए सिमोन, आम एतान सोंचायाम? दुनिया रिनी राजा ओके होड़ तरअः मालगुजारी इदीयाय? अपन होपोनकु तरअः चाहे एटाअकु तरअः?”

26पतरस कंहड़ी रूवाड़ लःअय, “एटाअकु तरअः।”

तब ईसु हुनी के बेता लियाय, “हुनी आलकु होपोन के मालगुजारी एमोअ रे छुट ताहिनोआ। 27सेरे होः आलांग हुंकू होड़ के एरलाङ ठोकोर एमा कुआ। हिना लःअय आम समुदर दौंड़ी रे सेन केते बाँड़सी लगाय मे। जे हाकु पहिल रे दगोआय, हुनी के सबीमे आउर हुनी आला आहा के चाहाःब ची केते होंड़े आम के मियांड चाँदी पाईसा भेटाव कोआ। होना के इदी केते ईङ आउर आम लःअय मालगुजारी एमा कुमे।”

Zur Zeit ausgewählt:

संत.मत्‍ती 17: ASR

Markierung

Kopieren

Vergleichen