संत.जोहन 5
5
अड़तीस बरीस रिनी बेमराहा के चचंगा
1नोःआँ तयोम जाहुदीकु आला मियांड परब रअः मोका रे, ईसु जिरोसलेम सेन नेनाय। 2जिरोसलेम रे भेंड़ा सिनिङ दुबाःड़े मियांड डोबरा एदनाआ, जे इब्रानी भाखा रे “बैतसैदा” कंहड़ीयाकु होना रेनअः पाँच गोड़ ओसरा एदनाआ। 3नोःआँ रे ढेर बेमराहा, अंधरा, लंगड़ा, तेकर होड़ो रोहोड़ उनकु दाअः हिलाअः रेनअः आसरा रे ताहिनोअ केनाकु#5:3 थोड़ेक युनानी धरम पुथी रे नोःआँ पद का भेटाआ। 4एता लःअय ची परभु आली सिरमादूत बेरा-बेरा सिरे कुंड़ रे अड़गु केते दाअः हिलाव गुल ताकेनय। दाअः हिलाव तोरन जे पहिल अड़गुन केनाकु हुनी बेस आमीन जुनोः केनाय, चाहे हुनी जहान बेमार रिनी होः ताहिन केनाय 5होनाःड़े मियांड होड़ ताहिनाय जे आड़तीस बरीस तरअः बेमार ताहिनाय। 6ईसु हुनी के पड़ाव ऊनी नेल केते तेकर नोःआँ पाड़ी केते, ची ढेर दिन तरअः नोःआँ दसा रे पड़ाव तनाय, हुनी के बेता लियाय “एतान आम बेस अमिनोअ ना-माम।” 7हुनी बेमराहा ईसु के कंहड़ी रूवाड़ोः लियाय “हे परभु ईङ आलकु ओके होः कनिकुआ, जे दाअः हिलायाकु दो ईङ के डोबरा रे अड़गुईङकु, बकिर ईङ सोदोरोअ तरअः पहिल एटाअ अड़गु जुनोआकु।” 8ईसु हुनी के बेता लियाय “बिरिःड में अपन खटिया आलगाय में तेकर दंड़ा-बड़ान में।” 9हुनी होड़ हेने घड़ी बेस नाय, तेकर खटिया ताय के गोअ केते दंड़ा-बड़ान तनाय।
होना हिला सथाअ हिला ताहिना। 10#नहे 13:19; जिर 17:21हिना लःअय जाहुदीकु हुनी के जे बेस थिनाय बेता लियाकु, “तिसिंग दो सथाअ हिला हेके आम के खटिया आआलगाव आम लःअय उचित कनोआँ।” 11हुनी हुंकू के कंहड़ी रूवाड़ोः लिकुआय “जे ईङ के बेस लिङाय हिनी ईङ के अपन खटिया बिरिडेमे आउर दंड़ा-बंड़ान में बेता लिङाय।” 12हुंकू हुनी के कुली लियाकु “हुनी ओके होड़ हेके जे आम के खटिया बिरिडेमे तेकर दंड़ान में बेता लेमेआय।” 13चंगा लिनी होड़ काय पाड़ी केना ची हुनी ओके हेके, एता लःअय ची भीड़ रअः चलते ईसु होनाःड़े तरअः ओचोअ थिनाय। 14नोःआँ बात तयोम बड़े बिनती ओड़ाअ रे ईसु हुनी लोः जुमाव नेनाय आउर हुनी के बेता लियाय, “नेलेमे, आम बेस आमीन नाम फिन आलुम पाप के, नोकान आलु हुयाव ची आम तेंग रे भारी बिपाईत हीःग जुनोः।” 15हुनी होड़ सेन केते जाहुदीकु के उदूः लिकुआय जे ईङ के बेस तदिङाय हुनी ईसु हेके। 16ईसु सथाअ हिला नोकान-नोकान काम कामी केनाय, हिना लःअय जाहुदीकु सताई केनाकु 17ईसु हुंकू के कंहड़ी रूवाड़ोः लिकुआय “ईङ आली बाबा नहाअः जगुत कामी तनाय, आउर ईङ होः कामी तानिङ।” 18नोःआँ चलते जाहुदीकु आउर गी जादे गोगोएःग लःअय टाप दाकु, एता लःअय ची हुनी सथाअ हिला रअः कनहुन भाईर के काय तोड़ाय केना, बकिर परमेसर के अपन आपा कंहड़ी केते अपने के परमेसर बराबईर ठहराअ केनाय।
ईसु आला हाक
19ईसु हुंकू के बेता लिकुआय, “ईङ आपे के सचे कंहड़ीओ दिपीईंग होपोन अपन-हारते एतान होः एरे एतान दड़ीआ, जे आपा के ककामी निलीयाय हिना भाईर कामी दाड़ीआय। एता लःअय ची जे आपा कमीयाय, होपोन होः हिना कमीयाय। 20एता लःअय ची आपा, होपोन के दुलारियाय, तेकर जे जे काम हुनी आएंग कमीयाय होना जामा होपोन के उदूः गियाय, आउर हुनी नोःआँ तरअः बड़े काम उदूः कियाय, जेके नेल केते छकित कोआपे। 21जे लकान आपा गोएःग उनकु के बिरिःड कुआय आउर जिवीःड कुआय हिना लकान होपोन होः जेके चहाआय हुंकू के जिवीःड कुआय। 22आपा ओके आला होः काय न्याया, बकिर नेनेयाय रअः पुरा काम होपोन के एमा तदियाय। 23जेकर से जामा होड़ जे लकान आपा के मरजाईदी-याकु हिना लकान होपोन के होः मरजाईदी कु। जे होपोन के काय मरजादिया हुनी आपा के होः काय मरजादिया जे होपोन के कुलगोःड तदियाय। 24ईङ आपे के सचे कंहड़ीओ दिपीईंग, जे ईङ आला कंहड़ी के आयुम केते ईङ के कुलगोःड लिनी रे बिसवासेआय, का-अन्तोः जिनगी हिनी आला हेके। हुनी डांड़ जुकूर एरे ठहराअ, हुनी दो मराईन के परोम केते जिनगी रे बोलो चुकाव नाय। 25ईङ आपे के सचे कंहड़ीओ दिपीईंग होना बेरा दराआ, हीःग ना गी जब गोएःग उनकु परमेसर आली होपोन आला सबद आयुम केआकु, आउर जे आयुम केआकु हुंकू जिवीःड कोआकु। 26जे लकान आपा खुदे जिनगी रअः सोत हेके, हिना लकान हुनी होपोन के होः जिनगी रअः सोत बनाव लिदियाय। 27आउर हुनी के नेनेयाय लःअय होः हक एमा तदियाय, एता लःअय ची हुनी मनवा होपोन हेके। 28नोःआँ चलते आपे आलपे मोकाअ, एता लःअय ची होना बेरा दराआ जब हुंकू जामा मारघटा रे एदान कुआ, हुनी आला सबद आयुम केते उडुंग हीःग कोआकु। 29#दानि 12:2जे बेस काम कामी लअकु, हुंकू का-अन्तोः जिनगी लःअय फिन जिवीःड कोआकु, आउर जे बुराई कामी तदाकु हुंकू डांड़ लःअय जिवीःड-बिरिडोः कोआकु।
ख्रीस्त रअः बारे गोवाही
30“ईङ अपन-हारते एतान होः एरिङ एतान दड़ीआ, जे लकान आयुमेईंग हिना मोताबिक नेयाय एमा कुईंग, आउर ईङ आला नेयाय सचा एदनाआ, एता लःअय ची ईङ अपन मरजी कोवान, बकिर जे ईङ के कुलगोःड लिनी आला मरजी पुपुरा चहाईंग। 31जदि ईङ अपन बारे खुदे गोवाही एमेईंग, दो ईङ आला गोवाही सचा कनोआँ। 32मियांड आउर एदानिया जे ईङ आला गोवाही एमेआय, आउर ईङ पाड़ीईंग ची हुनी ईङ बारे जे गोवाही एमेआय होना सचा एदनाआ। 33#सं.जोह 1:19–27; 3:27–30आपे जोहन के कुलीअ ची लियापे, आउर हुनी सचाई रेनअः गोवाही एम तदाय। 34बकिर ईङ अपन बारे रे मनवा आला गोवाही काईंग चहाआ, सेरे होः ईङ नोःआँ बात के कंहड़ीओ दिपीईंग ची आपे के उधार भेटाअः। 35जोहन मियांड जुलोअ आउर लवकाः खाता ढिबरी ताही नेनाय, हुनी आला मरसल रे कटिःग दिरी लःअय रिझोः आपे के बेस आदा लेपेआ। 36बकिर ईङ दुबाःड़े जे गोवाह एदनाआ होना जोहन आला गोवाही तरअः बड़ेआ, आपा जे काम के पुपुरा लःअय ईङ के जिमाओ तदिङाय, जे काम ईङ कामीयींग हिना ईङ बारे रे गोवाही एमेआय, ची ईङ के आपा कुलगोःड तदिङाय। 37#सं.मत्ती 3:17; सं.मर 1:11; सं.लुका 3:22आपा होः जे ईङ के कुलगोःड तदिङाय, आउर ईङ बारे गोवाही एम तदाय, आपे ना दो कहियो हुनी आला सबद आयुम तदापे, आउर ना मुठान नेल तदापे। 38हुनी आला वचन आपे आला मन रे असथीर कापे दोहोया, एता लःअय ची जेके हुनी कुलगोःड तदियाय आपे हुनी रे कापे बिसवासेआ। 39आपे नोःआँ समझाव केते धरम पुथी रेनअः मोताबिक चलाआपे, ची होना तरअः आपे के का-अन्तोः जिनगी भेटाव कोआ, हिना धारम-पुथी ईङ बारे गोवाही एमेआय। 40सेरे होः जिनगी नानाम लःअय ईङ दुबाःड़े हिजोअ कापे नामा।
41“ईङ मनवा पखा तरअः बड़ाई काईंग नामा। 42बकिर ईङ आपे के पाड़ीईंग ची आपे रे परमेसर आला पेरेम कनोआँ। 43ईङ अपन आपा आला नुमू रे हीःग तानिङ सेरे होः आपे ईङ के कापे गरहानिंङा, जदि जाहें अपने नुमू रे हीःग कोआय, दो आपे हुनी के गरहन कियापे। 44आपे हुनी-नुई तरअः बड़ाई नामापे, तेकर होना मरजाईद कापे चहाआ, जे मियांड ठुका परमेसर पखा तरअः हिजोआ दो एता लकान बिसवास सकायापे? 45नोःआँ आलपे समझाअ ची ईङ आपा मड़ांग रे आपे रे दोस लगायींग, आपे रे दोस लालगावी दो मुसा हेके, जेकर रे आपे आसरा तदापे। 46जदि आपे मुसा रे बिसवास ताकेआपे दो ईङ रे होः बिसवास केआपे, एता लःअय ची हुनी ईङ बारे लिखा तदाय। 47जदि आपे हुनी आला लिखा लअः रे कापे बिसवासेआ, दो ईङ आला कंहड़ी रे एता लकान बिसवास केआपे।”
Zur Zeit ausgewählt:
संत.जोहन 5: ASR
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023 NLCI CC BY-NC-ND 4.0
