Dadunu 9
9
Bangsa Israel 'aḏi setia ua
1'A Musa 'o kanau moju toma ngowa'a Israel ma betongo so'o ne:<<'Isene la-la ioronongoḏu mo-moini! Wangere nange-ne ngini ni tola'a i'a ḇanyo Yordan di'a na osama re dusu'u bangsa-bangsa tamanga daeraha, ananga gena-ge ga'a lebe repe re lebe te'e ra ngini, manga limau-limau lai lamo'o rema gegelo-gegelo lai kau'u madutu. 2Ma manusia laḏi te'e re kau'u; ananga gena-ge ngowa'a raksasa Enak 'ai ju'uda, re ngini ni 'isene ḏua ma betongo so'o ne: <Matengo i'a mai ua nga'unu sita'aloko Enak 'ai ju'uda!> 3Mada'a wangere nange-ne, ngini ḏuanga ni sioḏi'i tala masiretene mangale Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'O tagi sisiḏa taninga momina ma tero sa'olo u'u ga'a siro'u. Unanga ḏuanga i'a 'O sita'aloko ananga singadolo Ya'u singi-ngiranga taninga momina. Dadi ngini ḏuanga i'a ni dusu'u re singi-ngiranga reo capati ananga ma tero Ma JOU Ro sijaji pasala ḏua.>>
4<<Wakutu Ma JOU Ma Jou'ongu Madutu ga'a ngini silamo'o re siḏubuso, palisi'i i'a Unanga gena-ge 'o dusu'u ananga di'a ngini; awa ni kanau taninga 'akala re sinyingara ma betongo so'o ne: <Unanga 'O gasa ngini si'a di'a ni ḏegoro tana'a gena-ge sababu ngini ngowa'a loasa re banari> Ma nyonyata, Ma JOU ḏuanga i'a 'O dusu'u bangsa sababu ngowa'a gena-ge manga ga'a ma kajahatana ga'a Ma JOU ḏuanga i'a 'O dusu'u bangsa gena-ge taninga momina. 5Sanga ua, ngini ḏuanga i'a ni osama re ḏegoro tamanga nagara sababu ngini ngowa'a loasa re banari bolo ninga 'akala re sinyingara boloto. Mada'a sababu bangsa gena-ge manga ga'a ma kajahatana Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge 'o dusu'u ananga taninga momina. Re ḏi'i sababu Unanga gena-ge 'o sitotomo jaji ga'a Ro si'a'a rema sasi taninga ngimo-ngimono nena-ne: 'A Abraham, Ishak re Yakub.>>
6<<Sababu gena-ge, ngini balasu ni sahe mode-mode'e Ma JOU Ma Jou'ongu Madutu ga'a ngini ni silamo'o re siḏubuso, sanga ua Unanga gena-ge 'O pula'a tana'a ma rousu di'a ni ḏegoro sababu ngini ngowa'a loasa re banari; ma nyonyata ngini gena-ge ngowa'a tukanga ma lawana. 7Ni 'elingi re sidaioranga awa ma duhu sa'olo ninga ngimo-ngimono 'aḏi si'a'a ra Ma JOU Ma Jou'ongu Madutu ga'a ananga 'aḏi silamo'o re siḏubuso singadolo Unanga gena-ge 'O ruta ra ananga toma daeraha baulaco. Toma 'orasa ananga 'aḏi sisoi'i tala Mesir singadolo ngini ni sapolo 'ane, ngini re ninga ngimo-ngimono, ananga gena-ge 'aḏi lawana Ma JOU. 8Re ḏi'i toma kie Sinai ma cimi, ananga gena-ge 'aḏi si'a'a Ma JOU 'O ruta lai siḏi singadolo Unanga mau 'o singi-ngiranga ananga gena-ge. 9Wakutu ngoi, 'a Musa, to pere toma kie gena-ge di'a to dawongo maḏi bela ḏiḏi ga'a jaji 'i silefo ḏua, jaji gena-ge ga'a Ma JOU 'o si'a'a ra ananga. Ma di'ara wangere nyagi rata re utu nyagi rata, ngoi to tegoro toma kie gena-ge ma tubu, kama oromo re ka'e mai ua. 10Gena ḏua, Ma JOU 'o pula'a maḏi bela ḏiḏi ga'a Unanga masiretene 'A lefo ḏua. Toma maḏi gena-ge 'i silefo ma demo-demo ga'a Unanga ro kanau ra ngini toma u'u ma dara, toma 'orasa ngini gena-ge ni malomu toma kie ma cimi. 11Palisi'i i'a wangere nyagi rata re utu nyagi rata, Ma JOU 'O pula'a maḏi bela ḏiḏi ra ngoi. Enanga gena-ge ga'a 'Ai jaji 'i silefo ḏua.>>
12<<Ḏua Ma JOU 'o kanau ra ngoi, < Te'oso, 'uci capati; sababu 'ani bangsa ga'a ngana na'u sigasa ananga supu toma Mesir sie, ananga gena-ge raḏi si'a'a ga'a ma kajahatana madutu. Ananga raḏi sisoi'i tala capati toma 'ahu ma ngo'omo ga'a Ngoi, Ma JOU Ta'u parenta ḏua singadolo ananga raḏi madaga'a dulada reo ḇesi di'a ya silamo'o re siḏubuso.> >>
Dulada guraci
13<<Ma JOU 'o kanau moju ra ngoi rema betongo so'o ne: <Ngoi to oḏi'i ananga gena-ge re mode-mode'e ngowa'a tukanga ma lawana. 14Awa dola'aku Ngoi mada'a sieanga i'a Ngoi ḇato, la Ngoi, Ma JOU ḏuanga i'a To singi-ngiranga ananga singadolo ngowa'a ya'u 'elingi ananga riwara. Mada'a Ngoi ḏuanga i'a To sidadi ḇaḇa toma bangsa rimoi ga'a lebe lamo'o re lebe te'e reo ananga gena-ge.> >>
15<<Ḏua ngoi, Musa, to macelolo re sisoi'i tala Ma JOU. Maḏi bela ḏiḏi ga'a jaji gena-ge 'i silefo ḏua, ngoi ta gasa rari giama kaci ḏiḏi kara ngoi to gu-guci kie gena-ge ga'a u'u 'i leja-lejanga. 16Ngoi to oḏi'i mangale ngini mode-mode'e reni 'a'a ḏosa ra Ma JOU, Ma Jou'ongu Madutu ga'a ngini ni silamo'o re siḏubuso. Ngini reni sisoi'i tala capati toma 'ahu ma ngo'omo ga'a Ma JOU Ta parenta ḏua singadolo ngini gena-ge reni 'a'a dulada ga'a ma duhu sa'olo sapi ma nau'u ma ngowa si'a'a reo guraci di'a ninga diri. 17Dadi tamanga biono, maḏi bela ḏiḏi gena-ge ngoi ta 'oro re sitede kara 'a sibau'u toma tana'a singadolo enanga gena-ge 'i wejere pinga-pingana. 18Ḏua soi moju ngoi to mapagara 'ari biono ngadolo toma tana'a ra Ma JOU, ma di'ara wangere nyagi rata re utu nyagi rata, kama oromo re ka'e mai ua. Gena-ge ngoi ta si'a'a sababu ḏosa mo-moini ga'a ananga ya si'a'a; ananga raḏi siḏagi ga'a ma kajahatana ra Ma JOU 'ai momina singadolo si'a'a Unanga 'o dadi ruta ra ngini. 19Ngoi, Musa, to mojongo Ma JOU 'Ai duruta ra ngini ga'a ma tero sa'olo u'u 'i leja-lejanga singadolo Unanga mau 'o singi-ngiranga ngini. Mada'a soi moi moju Ma JOU 'o 'isene ngoi 'ari go-golo'o. 20Ma JOU 'O ruta madutu ra Harun ḏi'i singadolo Unanga mau 'O sisengene 'a Harun. Dadi ngoi to manyiata di'a unanga ḏi'i. 21Ḏua, ngoi, Musa, to gu'u 'ori i'a ga'a ngini ninga ḏosa ma hasili, gena-ge dulada sapi ma nau'u ma ngowa ga'a ngini reni golo'o 'a Harun 'a 'a'a, ngoi to sipoini dulada gena-ge toma u'u ma dara. Gena ḏua ngoi ta siwejere re ta tutu'u singadolo 'alusu ma tero korou'u kara ma korou'u gena-ge ngoi ta upa'a toma ḇanyo ma ngowa rimoi ga'a 'i 'uisi toma kie gena-ge tala.>>
22<<Re ḏi'i toma Tabera, Masa re Kibrot-Taawa, ngini ni si'a'a Ma JOU 'O dadi ruta. 23Re ḏi'i toma 'orasa Ma JOU 'O soma'a ngini ni sisoi'i tala Kades-Barnea re 'O kanau so'o ne: <Tagi sie di'a osama re ḏegoro toma tana'a ga'a Ngoi, Ma JOU 'O pula'a ra ngini> Ngini gena-ge ni lawana Ma JOU 'ai parenta, Unanga gena-ge Ma Jou'ongu Madutu ga'a ngini ni silamo'o re siḏubuso, singadolo ngini ni sigare ua ninga ngo-ngaku ra Ma JOU re ni 'isene Unanga ua. 24Mode-mode'e toma 'orasa ma mulaingi Ma JOU#9:24 Bolo ngoi, Musa, to nana'o ... 'O nana'o ngini, ngini ni lawana Unanga tau-taunu! >>
25<<Sababu Ma JOU ro kanau mangale Unanga mau 'o singi-ngiranga ngini, ngoi to mapagara 'ari biono ngadolo toma tana'a ra Ma JOU ma di'ara wangere nyagi rata re utu nyagi rata. 26Re ngoi to manyiata ma betongo so'o ne: <Ya JOU, MA JOU'ONGU MADUTU, awa No singi-ngiranga 'Ani 'umata re 'Ani warisi nena-ne. 'Umata gena-ge ga'a Na'u situusu sababu 'Ani kuasa ma pari cua, re Na'u sigasa ananga supu toma Mesir Rani de-de'e. 27No 'elingi 'Ani falalomu-falalomu 'a Abraham, Ishak re Yakub. Re No totoho awa ngowa'a gena-ge ga'a tukanga ma lawana, ananga manga kajahatana, bolo manga ḏosa. 28Na'o Ma JOU 'o singi-ngiranga 'Ani 'umata, ngowa'a Mesir ḏuanga ia 'aḏi kanau ma betongo so'o ne: <<Sababu Ma JOU nga'unu ua gasa ananga nena-ne toma daeraha ga'a Na'u 'a'a jaji ḏua di'a pula'a ra ananga, re sababu ḏi'i Ma JOU 'o emono ananga, Unanga ya'u gasa toma daeraha baulaco di'a sisengene ananga. >> 29Mada'a ya Ma JOU No 'elingi mangale ananga gena-ge ga'a Na'u cumutu di'a 'aḏi dadi 'Ani 'umata masiretene, re Na'u gasa sisupu toma Mesir sie Rani de-de'e re kuasa ga'a ma pari cua.> >>
Zur Zeit ausgewählt:
Dadunu 9: SAJ
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
2025 Indonesian Bible Society (LAI)