Dadunu 3
3
Ngowa'a Israel 'aḏi sita'aloko 'Olana Og
(Nyo. 21:31-35)
3:1-11
1Gena ḏua, 'a Musa 'o kanau toma ngowa'a Israel ma betongo so'o ne: <<Ḏua, ngene wo tagi toma papolo kore mie toma daeraha Basan. Og, ngowa'a Basan manga 'olana, unanga rai sordado mo-moini 'aḏi tagi di'a parangi ngene co-cori limau Edrei. 2Mada'a Ma JOU 'o kanau ra ngoi,<Musa, mojongo unanga awa. Ngoi ḏuanga i'a to sipula'a unanga sirimoi rai sordado re 'ai nagara ra ngana. Ngana balasu no 'a'a ra unanga ma tero ga'a no si'a'a ra Sihon, ngowa'a Amori manga 'olana ga'a 'o parenta toma limau Hesybon.> >>
3<<Dadi Ma JOU, Ma Jou'ongu Madutu ga'a ngene wo silamo'o re siḏubuso, Unanga gena-ge 'o sipula'a Og, ngowa'a Basan manga 'olana, re 'ai rayata ra ngene. Ananga gena-ge mo-moini ngene wa'u sisengene singadolo matengo i'a mai ua 'ahu moju. 4Toma 'orasa gena-ge, ngene wa rabasa manga limau mo-moini singadolo rimoi i'a mai ua ga'a wa rabasa ua. Limau mo-moini ma repe nyagi rarama (60) ga'a ngene wa rabasa toma daeraha Argob, gena-ge ma balangu toma daeraha Basan ma dara ga'a 'Olana Og 'a parenta. 5Limau mo-moini gena-ge 'i site'e reo gegelo maḏi ga'a kau'u, ngala-ngalana lamo'o 'i lape ḏiḏi re ngalana ma kalam-kalam 'i si'a'a reo tambaga di'a sitaku ngalana lamo'o gena-ge. 'Age ḏi'i limau-limau ma lelegu ma repe ga'a ma gegelo 'i cua. 6Limau mo-moini gena-ge ngene wa siwejere mode-mode'e, re na-nau'u, we-were'a re ngowa 'olo mo-moini gena-ge, ngene wa'u sisengene, singadolo ngowa'a matengo i'a mai riwara ga'a 'ahu ma tero ga'a ngene wa si'a'a ra Sihon ngowa'a Hesybon manga 'olana, unanga 'ai limau-limau. 7Mada'a ananga gena-ge manga haiwani mo-moini ngene wa 'oro, re manga limau-limau ma 'ori i'a rana gena-ge, ngene wa rabasa di'a ta ngene.>>
8Toma 'orasa gena-ge, ngene 'oro toma ngowa'a Amori manga 'olana ngamu ḏiḏi manga tana'a toma Ḇanyo Yordan ma daeraha papolo wangere ma la'o. Daeraha gena-ge mulaingi ḇanyo Arnon ngadolo kie Hermon. 9(Kie Hermon: ngowa'a Sidon 'a si'aro'o Siryon, mada'a ngowa'a Amori 'a si'aro'o gena-ge Senir.) 10'Olana Og ga'a 'o parenta toma limau Basan, unanga 'ai limau-limau, ngene wa rabasa mo-moini: gena-ge ma limau-limau toma tana'a ma rata ma re'u, re limau-limau toma daeraha Gilead re Basan ma dara, singadolo papolo wangere ma la'o ma giḏanga limau Salkha re Edrei. (11Pa'i ngowa'a Basan manga 'Olana Og ḇato ngowa'a Refaim ma ḏo-ḏogumu ga'a 'o 'ahu moju. 'Ai jingi'i 'i si'a'a reo ḇesi, ma giḏanga metere rata re ma roata sa'i metere romoḏiḏi mete'e du-duga ga'a 'i sitatapu ḏua. Singadolo nange-ne ngene nyengara wa oḏi'i moju toma Raba, ngowa'a Amon manga limau.)
Suku-suku ga'a tegoro toma Ḇanyo Yordan ma daeraha papolo wangere ma la'o
(Nyo. 32:1-42)
3:12-22
12'A Musa dadunu 'o kanau toma ngowa'a Israel ma betongo so ne:<<Toma 'orasa gena-ge, ngene wa ḏegoro toma tana'a gena-ge. Toma suku Ruben re Gad, ngoi to pula'a tana'a gena-ge ma balangu nena-ne: papolo kore mie limau Aroer co-cori ḇanyo Arnon, re daeraha kie-kie Gilead ma jule ga'a papolo kore sara, re enanga ma limau-limau toma dara gena-ge. 13Toma suku Manasye ma balangu, ngoi to pula'a daeraha Gilead ma jingianga, re ḏi'i daeraha Basan mo-moini ga'a ma siḏa 'Olana Og 'a parenta, gena-ge daeraha Argob mo-moini.>> (Daeraha Basan mo-moini 'i si'aro'o ngowa'a Refaim manga daeraha.
14'A Yair toma suku Manasye ino 'o 'oro simoini daeraha Argob, gena-ge Basan, singadolo Gesur re Maakha ma bati. Unanga 'a silomanga gamu-gamu gena-ge mete'e 'ai lomanga masiretene gena-ge Hawot-Yair, ga'a ma ngale Yair 'ai gamu-gamu ga'a singadolo nange-ne ngowa'a ya si'aro'o so'o gena-ge.)
15'A Makhir toma suku Manasye ino, ngoi tu pula'a Gilead ma balangu papolo kore mie, 16re toma suku-suku Ruben re Gad ngoi ta'u pula'a daeraha Gilead ma balangu papolo kore sara singadolo ḇanyo Arnon ma sigolona. Ḇanyo ma golona gena-ge 'i dadi ananga manga bati papolo kore sara, re ananga manga bati papolo kore mie toma ḇanyo Yabok, ga'a ngowa'a Amon manga daeraha ma bati ḏi'i. 17Toma balangu ma wangere ma soḏu, suku ro'ange#3:17 Suku Ruben, Gad re Manasye ma jule. gena-ge manga daeraha ma giḏanga singadolo Ḇanyo Yordan ma picaru. Ananga manga daeraha ma giḏanga toma talaga Galilea ma balangu ma kore mie singadolo Ngoloto Sengene ma balangu ma kore sara; re toma wangere ma la'o ananga manga daeraha singadolo kie Pisga ma cimi.
18<<Toma 'orasa gena-ge, ngoi, 'a Musa, to pula'a parenta nena-ne ra ngini rema betongo so'o ne: <Ma JOU Ma Jou'ongu Madutu ga'a ngini ni silamo'o re siḏubuso, Unanga gena-ge Ro pula'a daeraha ḇanyo Yordan papolo wangere ma la'o di'a ngini na ḏegoro. Mada'a ninga sordado-sordado mo-moini remanga sanapanga taninga suku ro'ange gena-ge, ananga gena-ge balasu 'aḏi riono suku-suku Israel ma lelegu 'aḏi parangi di'a ḏegoro manga daeraha. Dadi, ninga sordado-sordado balasu 'aḏi iwanga lebe siḏa toma ḇanyo Yordan reo suku-suku Israel ma lelegu. 19Pa'i ninga were'a, ngowa 'olo re ninga haiwani biara ḇato ga'a ngoi reto waro ma repe-repe, mo-moini gena-ge sisoi'i toma limau-limau ga'a ngoi reto pula'a ra ngini. 20Ngini balasu ni riono ninga manusia bangsa rimoi singadolo ananga ya ḏegoro tana'a ga'a Ma JOU Ma Jou'ongu Madutu ngini ni silamo'o re siḏubuso, Unanga ḏuanga i'a 'o pula'a ra ananga toma ḇanyo Yordan papolo wangere ma soḏu, re singadolo Ma JOU 'o si'a'a ananga 'aḏi 'ahu kama mojongo ua da'a, ma tero ga'a Unanga ro si'a'a ra ngini 'ane. Palisi'i gena-ge kara ngini matengo re matengo nyengara maḏibo taninga tana'a masiretene ga'a ngoi reto pula'a ra ngini sa'olo ninga warisi.> >>
21<<Ḏua ngoi to parenta ra Yosua so'o ne: <Ngana reno oḏi'i mo-moini ga'a Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge ro si'a'a toma 'Olana Sihon re 'Olana Og. So'o gena ḏi'i, Ma JOU ḏuanga i'a 'o si'a'a toma 'olana mo-moini manga tana'a ngana ḏuanga i'a na osama. 22Awa mojongo ananga, sababu Ma JOU Ma Jou'ongu Madutu ga'a ngini ni silamo'o re siḏubuso, Unanga gena-ge ḏuanga i'a 'O parangi di'a ngini.> >>
Musa sanga simaha ua osama tana'a Kanaan
3:23-29
23<<Toma 'orasa gena-ge ngoi to golo'o mode-mode'e ra Ma JOU ma betongo so'o ne: 24<Ya JOU MA JOU'ONGU MADUTU, pa'i ma mulaingi ḇato No sijumu 'Ani kabasarana re 'Ani kuasa ma pari cua ra ngoi 'Ani falalomu. Jou'ongu ma somoara 'i cua toma diwanga re toma tana'a; pa'i Ma JOU ḇato ga'a nga'unu No 'a'a 'ori i'a hera-heranga! 25Ya Ma JOU, No pula'a loasa ra ngoi di'a iwanga ḇanyo Yordan, la to oḏi'i daeraha ma rousu da'a, gena-ge kie-kie ma rousu da'a kaci moi, re kie-kie Libanon.> >>
26<<Mada'a Ma JOU 'o dawongo ua 'ari go-golo'o gena-ge. Ma sababu gena-ge ngini ni sigare ninga ngo-ngaku ua ra Ma JOU, dadi Unanga 'o ruta lai siḏi ra ngoi. Re Ma JOU 'o kanau, <Gena ḏua, Musa no kanau mangale gena-ge rawara! 27No pere toma kie Pisga ma tubu re no tatamo toma kore mie re kore sara, toma wangere ma la'o re toma wangere ma soḏu. Totoho la-la ino 'oru ga'a no oḏi'i gena-ge, sababu ngana na iwanga ua Ḇanyo Yordan. 28Mada'a no pula'a bererongo-bererongo ra Yosua, re no site'e 'ai 'akala re sinyingara, la unanga 'o dadi nau'u, sababu unanga ḏuanga i'a 'o sibi-biri'i bangsa gena-ge 'aḏi iwanga Ḇanyo Yordan da'a kaci moi di'a ya ḏegoro nagara ga'a ḏuanga na oḏi'i gena-ge.> >>
29Dadi ngene wo tegoro toma picaru limau Bet-Peor ma kaci moi.
Zur Zeit ausgewählt:
Dadunu 3: SAJ
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
2025 Indonesian Bible Society (LAI)