Dadunu 1
1
'A Musa 'ai bobita ma mulaingi
Ma JOU 'ai bererongo-bererongo di'a sisoi'i tala kie Sinai
1:1-8
1Boku nena-ne ma dara 'a Musa 'ai demo-demo ga'a unanga 'a singadolo toma bangsa Israel wakutu ananga toma daeraha baulaco toma Picaru Yordan, papolo Ḇanyo Yordan ma wangere ma la'o, co-cori limau Suf, toma limau Paran re limau Tofel, Laban, Hazerot re Di-Zahab. 2(Ngowa'a nyengara 'o tagi rou pa'i ma di'ara wangere nyagi moi re rimoi ḇato toma Kie Sinai#1:2 Kie Sinai ma tero Horeb singadolo Kades-Barnea, mete'e daeraha sau-sau ma lomanga Edom.) #1:2 Edom ma tero Seir 3Mada'a ngowa'a Israel 'aḏi sisoi'i tala nagara Mesir togumu i'a, ananga 'aḏi tagi rou singadolo musungu ma soi nyagi rata wakutu 'aḏi ngadolo toma Kades-Barnea toma tanggal rimoi, ngara nyagi moi re rimoi. Ḏua, mo-moini ga'a Ma JOU 'o parenta Musa di'a singadolo toma ngowa'a Israel, unanga 'a si'a'a. 4Gena-ge 'i dadi toma 'orasa 'a Musa 'o sita'aloko Sihon ngowa'a Amori manga 'olana togumu i'a, unanga ga'a 'o parenta toma limau Hesybon, re 'a Og, daeraha Basan manga 'olana, ga'a 'o parenta toma limau Asytarot re Edrei. 5Dadi, papolo ḇanyo Yordan ma wangere ma la'o toma tana'a Moab, 'a Musa 'o mulaingi 'o sitarangi Ma JOU 'ai Hukumu. 'A Musa 'o kanau rema betongo so'o ne: 6<<Wakutu ngene wo tegoro tananga suyu'u toma Kie Sinai ma cimi, Ma JOU, Ma Jou'ongu Madutu ga'a ngene wo silamo'o re siḏubuso, Unanga 'o kanau so'o ne: < Ti'ara ḏua, ngini ni tegoro toma kie ma cimi nena-ne. 7Nange-ne ngini ni ruba ninga suyu'u re ni malage toma ngowa'a Amori manga daeraha ma kie-kie re toma daeraha mo-moini ga'a 'i sigoloḏi, gena-ge toma picaru Yordan, bae daeraha sau-sau re picaru toma 'aḏu, bae daeraha papolo kore sara, gena-ge Negeb re ngoloto golona ma 'uḏu. Gena-ge, ngini ni tagi na ḏegoro nagara Kanaan singadolo kie-kie Libanon papolo kore mie re singadolo toma ngalara lamo'o Efrat papolo wangere ma soḏu. 8Ngoi Ma JOU reto pula'a daeraha gena-ge ra ngini ga'a Ngoi, reto 'a'a jaji rema sasi daeraha gena-ge mo-moini di'a ninga ngimo-ngimono Abraham, Ishak re Yakub re ananga manga ju'uda tala. Sababu gena-ge, ngini ni tagi re ḏegoro toma nagara gena-ge sa'olo ta-ngini.> >>
Musa 'o sitede bi-biri'i—bi-biri'i
1:9-18
9<<Toma 'orasa gena-ge wakutu ngini rema enanga moju toma kie Sinai ma cimi, ngoi to kanau ra ngini so'o ne: <Ngoi masiretene nga'unu ua to sibi-biri'i ngini. 10Sababu, Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'o si'a'a ngini ganapu repe singadolo nange-ne ngini ninga repe ma tero sa'olo mumuḏungu-mumuḏungu toma diwanga. 11Ma JOU, Ma Jou'ongu Madutu ga'a ninga ngimo-ngimono 'aḏi silamo'o re siḏubuso, sieanga i'a Unanga gena-ge 'o sidogo ngini sidu'o soi cala moi moju nange-ne re 'O sibarakati ma tero ga'a Ro sijaji ḏua ra ngini. 12Mada'a sanga ua, ngoi masiretene nga'unu ua to siputusu ninga hali re gamamu, enanga gena-ge ma tero sa'olo gina ga'a ḏubuso woḏi! 13Dadi ngini ni cumutu na-nau'u nga muḏuo i'a taninga suku-suku rimoi re rimoi, ananga gena-ge ga'a 'akala soro'unu, ngowa'a rema wo-waro re sayanga ma jingi'i. Ḏua, ngoi ḏuanga i'a to sitede ananga 'aḏi sibi-biri'i ngini.> 14Toma 'orasa gena-ge, ngini ni sangoro ngoi < Tero mode'e 'oru ga'a ngana na kanau ḏua, enanga gena-ge rousu madutu.> 15Sababu gena-ge, ngoi to soma'a sapolo suku-suku ma bi-biri'i, gena-ge na-nau'u ga'a 'akala soro'unu rema wo-waro re sayanga ma jingi'i kara to sitede ananga 'aḏi dadi ngini ninga bi-biri'i sa'olo sae-sae'e toma ngowa'a nga cala moi, toma ngowa'a nga latu moi, toma ngowa'a nga nyagi romotoa, re toma ngowa'a nga nyagi moi re ḏi'i ngoi to sitede ngowa'a 'aḏi dadi ninga pagawe ga'a 'urusu suku nyagi moi re romoḏiḏi. 16Re toma 'orasa gena-ge, ngoi ḏi'i to sitede ngowa'a lelegu 'aḏi dadi ninga juruhakimi re ta'u parenta so'o ne: <Balasu ni tailako la-la ninga ioronongoḏu manga hali kara ni sieta'a putusanga rema 'adili: bae ngowa'a gia nongoḏu manga hali, bolo ma'u hali reo ngowa'a tagi-tagi ino ga'a 'aḏi tegoro taninga sigolona. 17Wakutu ni sijuruhakimi awa ni pa'ala kaci moi. Ngini balasu ni dawongo manga hali mo-moini ma tero: bae ngowa'a remanga ḏe-ḏegoro, bae ngowa'a manga ḏe-ḏegoro cua. Awa ngini ni mojongo guna ḇato sababu ma putusanga ḏuanga i'a ra Ma Jou'ongu Madutu ino. Mada'a hali ga'a ngini ni basono kangela woḏi, ngini balasu ni sitalaḏi ananga gena-ge ra ngoi, la ngoi nyengara ta putusu hali gena-ge.> 18Dadi toma 'orasa gena-ge ngini rema enanga moju toma Kie Sinai ma cimi, 'oru ga'a ngoi to soma'a ra ngini, ngini balasu na si'a'a.>>
Ngowa'a tamo-tamolo nga nyagi moi re ngamu ḏiḏi manga jarita
1:19-33
19<<Gena ḏua ngene wo sisoi'i tala Kie Sinai re tagi mete'e daeraha baulaco ga'a lamo'o re simojongo ngini ga'a rena oḏi'i gena-ge wakutu ni si'a toma ngowa'a Amori manga kie-kie, ma tero ga'a Ma JOU, Ma Jou'ongu Madutu ga'a ngene silamo'o re siḏubuso, Unanga ro parenta ra ngene. Ḏua ngene wo ngadolo toma Kades-Barnea. 20Toma 'orasa gena-ge, ngoi to kanau ra ngini so'o ne: <Ngini reni ngadolo toma ngowa'a Amori manga kie-kie, ga'a Ma JOU, Ma Jou'ongu Madutu ga'a ngene silamo'o re siḏubuso, Unanga gena-ge ro pula'a di'a ngene. 21Ngini balasu ni waro, Ma JOU, Ma Jou'ongu Madutu ga'a ngini silamo'o re siḏubuso, Unanga gena-ge ro pula'a daeraha gena-ge ra ngini. Dadi, osama, na ḏegoro sa'olo ta-ngini, ma tero ga'a Ma JOU, Ma Jou'ongu Madutu ga'a ninga ngimo-ngimono 'aḏi silamo'o re siḏubuso, Unanga gena-ge 'O soma'a ḏua ra ngini. Awa ni mojongo bolo ninga 'akala re sinyingara 'i dadi rapo'o.> >>
22<<Ḏua, ngini mo-moini ni maco-cori ra ngoi re ni kanau ma betongo so'o ne: <Ino ngene wo soma'a ngowa'a nga muḏuo i'a 'aḏi disa waro daeraha gena-ge. Gena ḏua, ananga 'aḏi maḏibo re sihabari ra ngene mangale limau-limau rema enanga, re ma duhu lebe rousu, la ngene nyengara wa sita'aloko re ḏegoro.> >>
23<<Ananga manga go-golo'o ngoi ta dawongo re basono enanga gena-ge 'i rousu. Dadi ngoi to cumutu ngowa'a nga nyagi moi re ngamu ḏiḏi; ngowa'a matengo toma suku rimoi re rimoi. 24Re ananga 'aḏi tagi mete'e kie-kie re 'aḏi ngadolo toma Picaru Eskol, re 'aḏi disa waro daeraha gena-ge. 25Ḏua ananga 'aḏi 'oro ma sowo-sowo'o toma daeraha gena-ge re ya gasa ra ngene. Re ḏi'i ananga 'aḏi gasa habari ra ngene so'o ne: <Ma JOU, Ma Jou'ongu Madutu ga'a ngene wo silamo'o siḏubuso, Unanga gena-ge Ro pula'a daeraha ga'a rousu ra ngene.> >>
26Mada'a ngini ni malawana re mete'e ua Ma JOU 'ai parenta, Ma Jou'ongu Madutu ga'a ni silamo'o re siḏubuso. Dadi, ngini oḏu'u ni tagi osama si'a. 27Ngini ni kuḏubungu taninga suyu'u ma dara re ni kanau ma betongo so'o ne: <<Ma JOU 'o gasa sisupu ngene toma tana'a Mesir di'a sipula'a toma ngowa'a Amori, sababu Unanga gena-ge 'o emono ngene re mau na singi-ngiranga. 28Sanga ua, ngene nyengara wo tagi da'a! Nanga ioronongoḏu ga'a sanga sidingoto gena-ge, ananga 'aḏi siwa-waḏu nanga 'akala re sinyingara sababu 'aḏi kanau ma betongo so'o ne: <Ngowa-ngowa'a toma daeraha gena-ge lebe la-lamo'o re kau'u reo ngene, manga limau-limau la-lamo'o re ma da-daku ngadolo toma diwanga. So'o gena ḏi'i ngomi oḏi'i da'a 'age ngowa-ngowa'a Enak 'ai ju'uda ga'a lese laḏi lamo'o re kau'u.> >> 29Gena ḏua, ngoi to kanau ra ngini: <<Awa ni terewete; awa ni mojongo ananga. 30Ma JOU, Ma Jou'ongu Madutu ga'a ngini silamo'o re siḏubuso, Unanga gena-ge ḏuanga i'a 'O tagi sisiḏa taninga biono. Unanga ḏuanga i'a 'O parangi ananga ga'a 'aḏi lawana ngini ma tero ga'a Unanga 'o si'a'a ḏua toma Mesir, ra ngini ninga momina, 31re toma 'orasa ngini no tagi toma daeraha baulaco ma dara taninga ngo'omo ma giḏanga singadolo ngini sapolo 'ane-ne, ngini ni oḏi'i ḏua rema duhu sa'olo Ma JOU, Ma Jou'ongu Madutu ga'a ngini silamo'o re siḏubuso, Unanga gena-ge 'O kadiarata ngini ma tero sa'olo ḇaḇa 'o toti'i 'ai ngowa'a nau'u.>> 32Mada'a kalaha so'o gena, ngini ni sigare ninga ngo-ngaku ua ra Ma JOU, Ma Jou'ongu Madutu ga'a ngini ni silamo'o re siḏubuso, 33Unanga gena-ge ga'a 'O tagi sisiḏa taninga biono toma ḏo-ḏagi ma dara di'a disa ninga ngi'i, la nyengara ni side'oso ninga suyu'u. Toma 'orasa lobi'i reo u'u ma duhu sa'olo ngasu'u re kakamo toma 'orasa wangere reo kakamo ma duhu sa'olo ngasu'u, di'a sijumu ra ngini toma ngo'omo ga'a ngini na mete'e.
Ma JOU 'o sihukumu ngowa'a Israel
(Nyo. 1:34-40)
34<<Wakutu Ma JOU 'o 'isene ninga guḏubungu gena-ge, Unanga 'o ruta re masisasi so'o ne: 35<Matengo i'a mai ua ra ngini, ngowa'a Israel ma jira nena-ne manga sigolona, ḏuanga i'a ni oḏi'i daeraha ma la-la, ga'a To 'a'a jaji ḏua rema sasi di'a To pula'a taninga ngimo-ngimono, 36ḏuga-ḏuga pa'i 'a Kaleb, 'a Yefune 'ai ngowa'a nau'u. Unanga ḇato ḏuanga i'a 'o osama daeraha gena-ge. Ḏi'i unanga re 'ai ju'uda Ngoi ḏuanga i'a Ta'u pula'a tana'a ma balangu #Yos. 14:6-15 ga'a Kaleb ra to'u, sababu unanga 'o 'isene mode-mode'e Ngoi, Ma JOU!> 37Re 'a Musa 'o kanau toma ngowa'a Israel ma betongo so'o ne: <So'o gena ḏi'i Ma JOU 'o ruta ra ngoi. Ma sababu ngini ni sigare ninga ngo-ngaku ua ra Unanga. Dadi, Unanga 'o kanau ra ngoi: Ngana ḏi'i mai osama ua da'a. 38'A Yosua, 'a Nun 'ai ngowa'a nau'u, 'ani falalomu, unanga ḏuanga i'a 'o osama toma tana'a Kanaan. Ngana balasu no site'e 'ai 'akala re sinyingara, sababu unanga 'o sibi-biri'i ngowa'a Israel singadolo tana'a gena-ge 'i dadi ta-ananga.> >>
39<<Re Ma JOU 'o kanau toma ngowa'a Israel mo-moini ma betongo so'o ne:<Ngini ninga ngowa'a ga'a ce-ceka'a moju, ga'a ngini ni kanau ananga ḏuanga i'a ngowa'a lawana ya'u tawana, ananga gena-ge ga'a nange-ne 'aḏi siwola-wola nyangu, bae 'oru ma rousu bolo 'oru ma jira, ananga ḏuanga i'a 'aḏi osama toma daeraha da'a. Re ra ananga Ngoi ḏuanga i'a Ta'u pula'a nagara Kanaan re 'i dadi ta-ananga. 40Mada'a ngini nena-ne, ni maḏibo tagi papolo Ngoloto Teberau toma daeraha baulaco ma dara.> >>
Ma JOU 'o marimoi ua parangi papolo kore sara
41<<Ḏua, ngini ni sangoro ra ngoi re kanau ma betongo so'o ne: <Ngomi remi 'a'a ḏosa ra Ma JOU. Dadi ngomi ḏuanga i'a mi tagi parangi, ma tero Ma JOU, Ma Jou'ongu Madutu ga'a ngene wo silamo'o re siḏubuso, Unanga 'a soma'a ngomi.> Ḏua ngini matengo re matengo ni gu'u ninga pakakasa parangi mo-moini, sababu ngini ni ta'ajiri kangela ua di'a tagi parangi papolo kie-kie toma nagara Kanaan ma dara.>>
42<<Mada'a Ma JOU 'o kanau ra ngoi: <Siajele ra ananga: Awa ngini ni tagi di'a parangi, sababu Ngoi To marimoi ua ra ngini ninga sigolona. Ḏua, ngini ninga lawana ḏuanga i'a nu'u sita'aloko singadolo 'aḏi sidorusu ngini.> >> 43Dadi ngoi to kanau gena-ge ra ngini mada'a ngini ni 'isene ua, re ngini ni malawana Ma JOU 'ai parenta re ngini ni momole re ni tagi papolo kie-kie. 44Ḏua ngowa'a Amori ma repe ga'a tegoro toma kie-kie gena-ge 'aḏi supu di'a parangi ngini. Ananga ma repe ma tero wowunu 'aḏi kunu'i ngini singadolo toma nagara Edom re 'aḏi sita'aloko ngini toma limau Horma. 45Gena ḏua, ngini maḏibo re ni 'aḏi ra Ma JOU 'ai momina, mada'a Ma JOU 'O oḏu'u 'isene ninga iḏingi, Unanga 'o totoho ua ninga la'o ma ongoro.
46Dadi, ngini tegoro ma di'ara ḏua toma Kadesh, gena-ge 'orasa ma giḏanga.
Zur Zeit ausgewählt:
Dadunu 1: SAJ
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
2025 Indonesian Bible Society (LAI)