Alumi 4
4
Mpyani ang'wa Ibulahimu
1Ʉsese kʉlʉnge ʉlɨgwa, Ibulahimu tata witʉ kɨmʉɨlɨ, anga ng'waa mʉntʉ, nʉwanso aɨʉlɨngile ʉlɨ ikani ɨlɨ nɨla kʉgombeka kʉng'wi Itunda? 2Anga itule Ibulahimu aɨʉmʉgombile kɨna ʉkete ntendo nza kʉng'wi Itunda, ʉgwa ʉkʉtula ʉkete nɨkakisania pang'wi Itunda. 3Kʉnsoko, yandɨkilwe itɨ Mʉwandɨkwa nʉ wang'wi Itunda kɨna, “Ibulahimu aʉmʉhʉɨɨe Itunda, ni Itunda wɨkamʉgomba kɨna mʉntʉ nʉtyatile ɨtai. 4Mitʉma mʉlɨmo wɨlɨpwa kɨnyamʉlɨmo kakwe, kɨnyamʉlɨmo nɨkanso shanga kɨpegwa kakʉgombeka kʉng'wi Itunda. 5Ingɨ gwa mʉntʉ wɨhi waleke kʉsania ntendo yakwe, ingɨ nʉamʉhʉɨɨle Itunda nʉwɨalekela mɨlandʉ antʉ nɨabɨ, ʉgwa Itunda wɨgoza ʉhʉɨɨli wa mʉntʉ nʉwanso, wɨgomba kɨna ʉtyatile tai. 6Daudi nʉyo ʉlʉngile itɨ mʉwiloi nʉwa mʉntʉ nʉgomilwe ni Itunda ʉkete ʉkendepwa nʉwanso.
7“Akembetilwe antʉ nɨakʉlekelwa ɨmɨlandʉao,
mɨlandʉao ahegigwa!
8Ʉkembetilwe mʉntʉ ʉyo
nɨshanga ʉkʉaɨligwa ʉbɨ ni Isekʉlʉ wakwe!”
9Itɨɨ, ʉkembetwa ʉwʉ nʉtambʉe ʉ Daudi kʉ antʉ nɨatawe kigandane, ang'wi nʉ kʉ antʉ nɨshanga atawe kiganda? E, e, ingɨ ga nɨantʉ nɨshanga atawe kiganda, kʉnsoko kakondya kʉlʉnga itɨɨ, “Ibulahimu aʉhʉɨɨe, ni Itunda wɨkamʉgomba kɨna mʉntʉ nʉtyatile tai ane.” 10Itɨɨ, matungo kɨɨ Ibulahimu naɨʉaɨɨgwe ni Itunda kɨna mʉnya tai? Itɨɨ, naɨwakɨlɨne kʉtalwa kigandane ang'wɨ naɨwatalwa kiganda? A! a! shanga naɨwatalwa kiganda, ingɨ naɨwakɨlɨ kʉtalwa kiganda. 11Ibulahimu aɨʉtawe kiganda panyambele, nʉʉtalwa kiganda nʉwanso aɨkɨlɨngasɨɨlyo kakʉkamɨnkɨɨlya kɨna Itunda aɨʉmʉgombile Ibulahimu kɨna ʉkete ntendo nza kʉnsoko aʉhʉɨɨli wakwe naɨʉkete naɨwakɨlɨ kʉtalwa kiganda. Kʉlʉlo Ibulahimu wɨkatula tata nʉwa antʉ ɨhi, palʉng'wɨ nʉkʉtula shanga atawe kiganda, aɨʉmʉhʉɨɨe Itunda, Itunda ʉkʉgomba kʉtula antʉ nɨakete ntendo nza. 12Hangɨ Ibulahimu tata nʉwa antʉ nɨatawe kiganda, ingɨ shanga kʉnsoko atawe kiganda, ingɨ kʉnsoko ahʉɨɨe anga ʉtata witʉ Ibulahimu naɨʉhʉɨɨe naɨwakɨlɨ kʉtalwa kiganda.
Ilago lang'wi Itunda lɨsɨngɨɨligwa kʉ ʉhʉɨɨli
13Itunda aɨʉmʉɨɨe ʉ Ibulahimu nʉ wileli wakwe kɨna ihɨɨ ɨhi ɨkʉtula nsao akwe. Ilago nɨlanso shanga kʉnsoko Ibulahimu aʉtyatile malagɨɨlyo, ingɨ kʉnsoko aʉhʉɨɨe, kʉlʉlo Itunda wɨkamʉgomba kɨna ʉkete ntendo nza. 14Kʉnsoko anga itule ilago ɨlɨ akʉpegwa antʉ nɨatyatile malagɨɨlyo, ʉgwa kʉhʉɨɨla yʉkʉtula kʉtilɨ anga ng'waao wɨhi, itɨ gwa Itunda ʉkʉtula walongopa. 15Malagɨɨlyo ɨsasha Itunda wahung'we ikuo, ingɨ gwa anga itule kʉtilɨ anga malagɨɨlyo, shanga ihumɨkile kʉbunangwa malagɨɨlyo. 16Kʉnsoko, ikani ɨlɨ lɨza kʉkɨɨla kʉhʉɨɨla, kʉlʉlo gwa ilago ɨlɨ lɨpumigwe kʉnsoko a ʉkende wang'wi Itunda, hangɨ kɨna kʉlʉkʉʉlʉ ilago nɨlanso ingɨ la antʉ ɨhi. Shanga kʉ antʉ wawa du nɨaambile malagɨɨlyo, ingɨ ga nʉkʉ antʉ nɨishiɨ kʉ ʉhʉɨɨli anga Ibulahimu. Nʉwanso yʉyo tata witʉ kɨhi. 17Anga ʉandɨkwa wang'wi Itunda nʉandilwe, “Nʉkʉɨkile ʉtule wɨtata nʉwa antʉ amahɨɨ ɨdʉ.” Lʉkani nʉlanso nʉlʉtambʉwe latai pang'wi Itunda kʉnsoko ʉ Ibulahimu aʉmʉhʉɨɨe Itunda nɨ wɨapangataalya antʉ nɨakule, kʉngulu yakwe, maintʉ nɨkʉtile igela. 18Ibulahimu aɨʉhʉɨɨe nʉ kʉsʉmbɨɨlya palʉng'wɨ nʉkʉtula lʉkani nʉlanso aɨlʉkaku kʉhʉɨɨla, kʉlʉlo waile tata kʉ antʉ amahɨɨ ɨdʉ anga niyandɨkile mʉ Ʉandɨkwa nʉwang'wi Itunda. “Wileli wakwe ʉkʉtula antʉ ɨdʉ anga inzota.” 19Ibulahimu aɨmʉnyampala anga wamyaka igana itɨ, ingɨ ʉhʉɨɨli wakwe shanga aɨkepile palʉng'wɨ nʉkʉtula aʉlɨngile kɨna ʉmʉɨlɨ wakwe aɨwaile anga wakule, hangɨ nʉ mʉsʉngʉ wakwega, ʉ Sala, aɨmʉgʉmba.” 20Ibulahimu shanga aɨwikankanilye ilago lang'wi Itunda, wɨkalija ngulu mʉʉhʉɨɨli wakwe, wɨkamʉkʉlya Itunda. 21Ibulahimu aɨʉlɨngile kɨna Itunda ʉhumile kʉtimɨlya ilago lakwe nʉtambʉe. 22Yɨyo nsoko, “Itunda aɨʉmʉgombile kɨna ʉkete ntendo nza”. 23Makani naandɨkilwe kɨna, “Itunda aɨʉmʉine kɨna ʉkete ntendo nza,” shanga ʉkʉtambʉlwa ʉ Ibulahimu du. 24Ikani ɨlɨ nɨlakʉgombwa ni Itunda ingɨ litʉ nʉsese ga nɨkʉmʉhʉɨɨe Itunda naɨʉmiʉkilye ʉ Yesʉ, Isekʉlʉ witʉ. 25Itunda aɨʉmʉpumilye ʉ Yesʉ wabʉlagwe kʉnsoko amɨlandʉ itʉ, wɨkiʉkigwa ingɨ ʉsese kʉhume kʉgombwa kɨna kʉkete ntendo nza.
The New Testament in Isanzu @The Word for The World International and Isanzu Language translation. All rights reserved