Lomɛ́ŋ 7
7
Eŋétépí nyɛ weéŋelí no kikotí
1Paandimán epú iŋaná anútiánanɛ́ɛ, nuémenyen pɔ́ sá sá sá: Á kiákí ɛ́ɛ́ nuémenyen kikotí, kikotí áapian mɔɔnd á kisikɛl kitikit umanyɛɛ́ ɔ́ kusɔ́t. 2Pulínsi nyɛ ɛ́ɛ́: kikotí kí nuɔ́ndɔ́n ɔ́ɔ́kɔɔyɔ ɛ́ɛ́: Akáandɔ tipá ukuyɔɔk ɔ́ nuɔ́ndɔ́n numotí aká ɔnɛ́m manyɛɛ́ ɔ́ kusɔ́t. Índɛ ɔnɛ́m siekúu, kikotí tipá kíand kuɛ́tikɛn wɔ. 3Índɛ usiapítikɛn mɔɔnd omotí kɔ́ɔ́k ɔnɛ́m mɔɔ́sɔ́tɔn, páápílan wɔ́ ɛ́ɛ́ eŋendí musɔm. Índɛ ɔnɛ́m siekúu, ukanyi weéŋelí, unyɛ pákuyɔɔk á nupítíkɛ́n ku mɔɔnd omoti, utíákaandá apá iŋendí isɔm. 4Púnyɛ puandá púmoómí ó pusíó púánɔ́ paandimán páámɛ, tunyɛ panyálimát no kikotí á kiákí ɛ́ɛ́ tumekú papílatán ne Kilíis, nínúan nukanyɛɛ́ kuɔ́pínɔn sɔ́k olotí, wɔ́ umɛɛ́nyɔ́k á pilɔ́ŋ ɛ́ɛ́ túɛ́lɛn Támbákɛ́ɛ epú púnyɛɛ́ peseé. 5Kɔk, aká tumaápá tumɔɔ́sɔ́tɔn kusɔ́t kú imekú, pilɔk pí pilɔ́ɔ́ŋɛ́t epí kikotí meétítíkén mepítínyényí káásɔ́, ɛ́ɛ́ tuɛ́lɛ pilɔk pí mandá pí yuukanɛ́ naasɔ́ é niku. 6Maná ninúan, tukanyi panyáŋímát no kikotí, kiányípá kí túɛtikɛn, á kiákí ɛ́ɛ́ tunyɛ pekúén é púúpú púmaápá putúɛ́tíkɛ́n iŋól. Tukanyɛɛ́ kuɛlɛn Támbákɛ́ɛ puólí á kupá kuukɔ́si kɔ́siɛ, á kipia kí emfunukufúúmɛ kati á kipia kí insúá kínyɛɛ́ kí kikotí kiiŋɔɔ́ŋɔ́.
Puólí pú kikotí
7Kúúkú kɔk, kikotí nyɛ kifal á? Aákóo! maná yeémenyín kifal ó kikotí. Kikotí sɔtɔ kítiɛ́lɛ́ ɛ́ɛ́, etipísémítényí, indisiémenyí imbísémie. 8Kifal kiɛ́piɛtikinɛn ó kikotí, kiépu imbísémie sí moól síond káámɛ ɔ́ nuɔ́l. Índɛ kikotí tipá, kifal nyɛ kisulán. 9Insúá, kɔ́ɔk kikotí manyi kítipá, imɔsɔ́tɔn. Kikotí mɛɛ́lɛ́ kiásiámán, kifal kiásuumɔk, 10niŋúɛ kɔk yeku. Kikotí kiɛ́sikɛnɛnɛ́ kuyɔɔk na mɔɔnd ɔ́ kusɔ́t, kíayɔɔk naamɛ é niku. 11Á kiákí ɛ́ɛ́ kifal, mɛɛ́lɛ́ kípiɛ́tikɛnɛn ó kikotí, kíekimbúlit, kiónd kíiŋɔn. 12Anakáánɛ́ kɔk, kikotí kí muɛ́t óókoólinon ku Támbák, kipia ókoólion ku Támbák kí indɛ́ndɛ́nɛ ne peseé.
Mɔɔnd á kipia kí kilɔk
13Akáánɛ́ kɔk puutámb moól ne niku káámɛ ó pusíó á? Aákóo! kifal kímónyoól ne niku. Kímatápúkínɛn á puandá puutámbɔ́ á kumfá niku. Ɛ́ɛ kitíínyi kupá kúɛ́yɛ́ kú kifal, yá anakáánɛ́ kifal mɔɔ́ŋɔ́ ó kikotí ɛ́ kuɛlɛ kilɔk kukányɛn. 14Tuémenyen kémuémue ɛ́ɛ́ kikotí óókoólinon é kiliínditié kí Támbák, maná niŋúɛ inyɛ mɔɔnd kati imbekíe, ewú pémeétú ɛlɛɛ́ kiɔ́lí kí kifal. 15Kémuémue, indipá yɔɔ́pɔn epú yɛɛlɛnɛ́ɛ, epú yɔɔyɔnɛ́ indipá yɛɛlɛ pɔ, maná epú imfɛ́mɛnɛ́, púúpú yɛɛlɛnɛ́ɛ. 16Índɛ kɔk yɛɛ́kɛɛlɛ epú indiányipá yɔɔyɔ, inyɛ ekelú no kikotí, yoókoond imenyen ɛ́ɛ́ kikotí nyɛ peseé 17Indipá kɔk niŋúɛ yɛɛlɛnɛ́ nɔ maná kifal kinyɛɛ́ káámɛ. 18Á kiákí yeémenyen ɛ́ɛ́ peseé tipá káámɛ́, anakáánɛ́ kúnyɛ ɛ́ɛ́ utipá káámɛ ɔ́ nuɔ́l, púnyɛ kémuémue ɛ́ɛ́ káámɛ kí imbítákítɛ́n yaákaamba kuɛl peseé, maná indipá ni imbekí i kuwóónyi. 19Anakáánɛ́ kúnyɛ ɛ́ɛ́ peseé yaambanɛ́ɛ, indipá yɛɛlɛ wɔ, kilɔk indíányípá yaamba, kíikɛ́ɛ yɛɛlɛnɛ́ɛ. 20Kɔk, índɛ epú indiányípá yaamba púúpú yɛɛlɛnɛ́ɛ, anakáánɛ́ kúnyɛ ɛ́ɛ́ pútipá púólinon káámɛ, maná kifal kinyɛɛ́ káámɛ kíkɔtɔnɛ́ pukáánɛ́ puólí. 21Yɛɛ́kɛɛ́nɛn kɔk akáánɛ́ ɛ́ɛ́: aká yaambanɛ́ ɛ́ɛ́ yɛ́ɛl peseé, kifal kínyɛɛ́ mekúye naamɛ ɛ́ kuɛl. 22Á kiákí ɛ́ɛ́ káámɛ kí iŋɔnyɛ́, yɔɔ́kɔɔ́pɔn peseé no kikotí kí Támbák. 23Maná káámi kí imekú kikotí kimotí áanuanan ne kííkí ɔtɛ́m wáámɛ áátapanɛ́ɛ. Kikotí kikáánɛ kíiŋákanɛ́ iŋól i kikotí kí kifal kinyɛɛ́ káámɛ ɔ́ nuɔ́l. 24Ɔsɔ́k naamɛ! ɛ́nyɛɛ́ waányííŋáŋunanɛ́ ɔ́ nuɔ́l enue núyuukanɛ́ naamɛ é niku? 25Nukúm pá na Támbák é Yésus Kilíis Ɔkɔ́n waasɔ́! niŋúɛ omoómí kɔk, káámɛ kí imbítákítɛ́n, yaákaamba kukɔtɔn kikotí kí Támbák, maná á kati kuɔ́tɛ waamɛ u imekú yɔɔ́kɔtɔn kikotí kí kifal.
Zur Zeit ausgewählt:
Lomɛ́ŋ 7: yav
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2026, CABTAL