माथ 2
2
पुरुबरेन गोनोकको ञापामेन
1हेरोद राज ओकतेरे जिहुदा़ रेयाक् बेथलेहेमरे जिसुइ जानामेन खान, ञेलपे पुरुब खोन गोनोक होड़ जेरुसालेमते हेच्कातेको मेनकेदा, 2“ओकारे मेनाया जिहुदिकोरेन जानाम आकान राज दो? एनते उनिरेन इपिल पुरुबरेले ञेलआकादेया, आर उनि सेवावाय ला़गित् ले हेच् आकाना।” 3आदो हेरोद राज ओनाय आँजोमकेत् खाने आ़ँदुक्मा़ँदुक् चाबायेना आर उनि साँवते गोटा जेरुसालेमरेनको हों। 4आर सानाम माराङ नायकेको आर दिसा़म होड़रेन सोसतोर बाडायको जारवाकाते ओनको ठेने कुलिआना, “मा़सि दो ओकारेये जानामोक्आ?” मेनते। 5ओनकोको ला़इयादेया, “जिहुदा़ रेयाक् बेथलेहेम नागराहारे,” एनते ना़बि होतेते नोनकागे ओल आकाना,
6“ए बेथलेहेम जिहुदा़ रेयाक् टोठा, जिहुदा़रेन आ़युरको मोदरे ओकालेकाते हों बाम हुडिञा, एनते आम खोन मित्टेन आ़युरिच् ए ओडोकोक्आ, उनि दो इञरेन होड़ इसराएले गुपिकोवा।”#मिका़ 5:2
7खानगे हेरोद दो ओनको गोनोक होड़को ओको ओकोते होहो आ़गुकाते इपिले ञेललेन ओकतेतेत् ए कुलि ठिककेत्कोवा। 8आर नोनका मेनकाते बेथलेहेमतेये कोलकात्कोवा, “दु सेनकाते गिदरा़ रेयाङ सुच् सुतरुच् सुटिकपे आर उनिपे ञामलेरे ला़इ तोरावा़ञपे, जेमोन इञ हों सेनकातेञ सेवावाय।” 9ओनको दो राजाक् काथा आँजोमकातेको चालावेना आर ञेलपे पुरुबरेको ञेललेदे इपिल दो ओनको लाहा लाहातेये चालावेना, आर गिदरा़ ताहेंकान ठा़ँइ सेटेरेन खान इपिल दो ओंडेगेये तेङगोयेना। 10आदो उनि इपिलको ञेलकेदेते आ़डि आँटको रा़सका़येना। 11आर ओड़ाक्रे बोलोकाते गिदरा़को ञेलकेदेया, मा़रिया़म ठेन, आर ओमबाक्कातेको सेवावादेया आर आकोवाक् मोटरा राड़ाकाते सोना, सोवानाक् धुप आर मुर सांदेसको सामाङादेया। 12आर हेरोद ठेन आलोको रुवा़ड़ा मेनते कुकमुते इसोर खोन चेहावकाते एटाक् होरते आकोवाक् दिसा़मतेको रुवा़ड़ चालावेना।
मिसोरते जिसुइ इदि ओचोयेन
13आदो ओनकोको चालावेन खान, ञेलपे प्रोभुरेन मित्टेन दुत कुकमुते जोसेफ ठेने ञेल ओचोयेना आरे मेतादेया, “मा बेरेत्मे गिदरा़ आर एङगाततेत् सोतोक्किनते मिसोर दिसा़मते दा़ड़मे आर आ़उरिञ मेताम हा़बिच् ओंडे बाड़े ताहेनमे, एनते हेरोद दो गिदरा़ गोजे ला़गित् ए सेंदरा ला़गिदोक् काना।” 14आदोए बेरेत्एनते गिदरा़ आर उनिरेन एङगाततेत् सोतोक्केत्किनते ञिंदा़रेगे मिसोर दिसा़मतेको चालाव फाराक एना। 15आर हेरोद आ़उरिये गुजुक् हा़बिच् ओंडेगेको ताहेंयेना, जेमोन ना़बि होतेते प्रोभुइ रोड़लेत् काथा पुरा़उक्, एनकाथाय “होपोनिञ दो मिसोर खोनिञ होहो आ़गुकेदेतिञा।”#होसिया़ 11:1
गिदरा़को गोच् ओचोयेन
16आदो हेरोद ओनको गोनोक होड़को दोखाकेदेया मेनतेये बाडायकेत् खान आ़डि बा़ड़िच्ए एदरेयेना, खान ओनको आ़किलानको खोने बाडायलेत् ओकते लेकाते होड़ कोलकाते, बेथलेहेम आर ओना गोटा टोठारेन बेबाक कोड़ा गिदरा़, बार सेरमा आर ओना खोन का़टिच्कोय गोच् माराव ओचोकेत्कोवा। 17उनरे जिरिमिया़ ना़बि होतेते रोड़लेन काथा पुरा़वेना ओनेये मेनलेत्, 18“रामारे मित्टेन आड़ाङ आँजोमेना, राक् जोङ आर आ़डि हाय हायोक्, राहेल आच्रेन गिदरा़कोय राक्आको काना आर जिवि राड़ेजताय बाय रेबेनलेना, एनते ओनको दो नित बा़नुक्कोताया।”#जिरिमिया़ 31:15
मिसोर दिसा़म खोन रुवा़ड़ोक्
19आदो हेरोद ए गोच् एन खान, प्रोभुरेन मित्टेन दुत मिसोर दिसा़मरेये ताहेंकानरे जोसेफ ठेने ञेल ओचोयेना आरे मेतादेया, 20“मा बेरेत्मे, गिदरा़ आर उनिरेन एङगाततेत् सोतोक्किनते इसराएल दिसा़मते चालाक्मे एनते गिदरा़ रेयाक् जिवि सेसेंदराको दोको गोच् एना।”#एकसोडस 4:19 21खानगेये बेरेत् एना आर गिदरा़ आर उनिरेन एङगाततेत् सोतोक्केत्किनते इसराएल दिसा़मतेये हेच्एना। 22मेनखान जिहुदा़रे आच् आपात हेरोद बोदोलते आ़रखिला़उसे राज आकान ताहेंकाना मेनतेये आँजोम बाडायकेत् खान, ओनते चालाक् दोए बोतोरेना, आर कुकमुते इसोर ठेने चेहावेनते गा़लिल टोठातेये चालावेना, 23आर नासारेतको मेताक् नागराहाते सेनकातेये ताहेंयेना जेमोन ना़बि होतेते रोड़लेन काथा पुरा़उक्, “उनि दो ना़सरिको मेताया।”#मा़रकुस 1:24; लुक 2:39; जोहान 1:45; जेसाया 13:5,7; 11:1; 53:2
Zur Zeit ausgewählt:
माथ 2: NTSPt25
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The New Testament Books in Santhali Language © The Word for the World International and Santhali Translation Project, Nepal, 2025
