1 Иоанн 2
2
Чаа айтыышкын – ынакшыл
1 # Ин. 14:26; Рим. 8:34; Евр. 7:25Ажы-төлүм! Бачыт кылбазыннар дээш, мен силерге бо дугайында бижип олур мен. А кайы-бирээңер бачытка борашкан-даа болза, Аданың мурнунга Болчукчувус, чөптүг-шынныг Иисус Христос бар болгай. 2# Ин. 1:29; 11:52; 1 Ин. 4:10; Рим. 3:25-26Христос дээрге чүгле бистиң-даа эвес, а бүгү делегейниң бачыттарын арылдырар өргүл-дүр.
3 # Ин. 14:15; 15:10; 1 Ин. 5:3Ооң айтыышкыннарын сагыыр болзувусса, Ону угаап билгенивис ол-дур. 4# Тит. 1:16«Мен Ону билир мен» дээр хирезинде, Ооң айтыышкыннарын сагывас кижи – мегечи болгаш алыс шынны сагывас кижи-дир. 5# 1 Ин. 4:12А Ооң сөзүнүң аайындан эртпес кижиде Бурганның ынакшылы ылап-ла эчизинге чедир боттанган-дыр; Бурган-биле сырый харылзаалыг бис дээрзин оон билип алыр бис. 6«Бурган-биле харылзаалыг амыдырап чор мен» дээр кижи Иисустуң амыдырап чорааны дег амыдыраар ужурлуг.
7 # Ин. 13:34 || Лев. 19:18; 2 Ин. 1:5Ханы ынак эш-өөр, мен силерге чаа эвес, а эң эгезинден-не силерге билдингир турган биеэги-ле айтыышкын дугайында бижип олур мен. Ол эрги айтыышкын дээрге силерниң дыңнап кааныңар сөс-түр. 8# Ин. 13:34 || Ин. 1:9; 8:12; Рим. 13:12; Эф. 5:8; 1 Фес. 5:5Ындыг-даа болза, ооң-биле чергелештир ол айтыышкын чаа болур. Ооң алыс шынныын Христостуң база силерниң амыдыралыңар бадыткаан, чүге дээрге караңгы тарап чидип турар база алыс шынның чырыы чырыда берген.
9 # 1 Ин. 4:20«Чырыкка хамааржыр мен» деп турар кижи Бурганга бүзүрээн акы-дуңмазын көөр хөңнү чок болза, ол караңгыда турар хевээр-дир. 10# Ин. 11:10Бодунуң акы-дуңмазынга ынак кижи чырыкта артып калган, ону бачытче киирип шыдаар кандыг-даа чүүл ам чок. 11А бодунуң акы-дуңмазынга хөңнү чок кижи караңгыда хевээр чурттап турар база кайнаар бар чыдарын боду безин билбес, чүге дээрге караңгы ону согурартып каан-дыр.
12 # Аж.-ч. 10:43; 13:38Ажы-төл, ол дугайында силерге бижидим, чүге дээрге Христостуң ачызында бачыттарыңар өршээттинген-дир. 13# Эф. 6:11 || Ин. 14:7Ада-иелер, силерге бижидим, чүге дээрге эң эгезинде бар турган Кижини билип алган-дыр силер. Аныяк оолдар, силерге бижидим, чүге дээрге эрликти тиилээн-дир силер. Уруг-дарыг, силерге бижидим, чүге дээрге Аданы билип алган-дыр силер. 14Ада-иелер, силерге бижээн мен, чүге дээрге эң эгезинде бар турган Кижини билип алган-дыр силер. Аныяк оолдар, силерге бижээн мен, чүге дээрге күштүг-дүр силер, Бурганның сөзү силерде артып калган-дыр база эрликти тиилээн-дир силер.
15 # Иак. 4:4Бо делегейниң бүгү чүвезинге-даа, ооң бодунга-даа ынак эвес болуңар: бо делегейге ынак кижиниң сеткилинде Адага ынакшыл чок. 16Чүге дээрге бо делегейде бар бүгү чүве – бачыттыг бүдүжүвүстүң күзээни бүгү чүве, бистиң көрүжүвүстүң олчалап алыксааны бүгү чүве, улустуң бо амыдыралынга адыыргаары хамык чүве – ол бүгү Ададан эвес, а бо делегейден келген-дир. 17# 1 Кор. 7:31Бо делегей ооң тывылдырганы хамык күзээшкиннери-биле катай-хаара эстип-хайлы бээр, а Бурганның күзел-соруун күүседип чоруур кижи мөңге амыдыраар.
Христостуң дайзыннарынга дөмейлешпеңер
18 # Мф. 24:5; 1 Ин. 4:3; 2 Ин. 1:7 || 1 Тим. 4:1; 2 Тим. 3:1Ажы-төлүм! Сөөлгү шаг-үе келген-дир. Христостуң удурланыкчызының кээриниң дугайында канчаар дыңнааныңар дег, Ооң хөй удурланыкчылары амдыгааштан ынчалдыр көстүп келгеннер. Сөөлгү шаг-үе келген дээрзин оортан билип алыр бис. 19# Ы. х. к. 13:13; Аж.-ч. 20:30 || 1 Кор. 11:19Христостуң ол удурланыкчылары бистиң аравыстан үнген, ынчалза-даа херек кырында биске хамаарышпас чорааннар. Бир эвес олар херек кырында биске хамааржыр турганнар болза, аравыска артып калгайлар эртик. Ынчалза-даа олар дөгере чоруй барган, оларның кайызы-даа биске хамаарышпас чораан деп чүве ынчалдыр билдине берген.
20 # Ин. 14:26; 16:13; 1 Кор. 2:10А Христостуң хайырлааны Ыдыктыг Сүлде ам силерде бар-дыр, ынчангаш дөгереңер алыс шынны билип алган-дыр силер. 21Мен силерге алыс шынны билбес силер дээш эвес, а ону билир бооруңарга база алыс шын мегени төрүвес боорга, бижип олур мен. 22# 1 Ин. 4:3Иисусту «Христос эвес-тир» дээр кижиден артык мегечи бар бе? Ындыг кижи – Христостуң удурланыкчызы-дыр. Ол Аданы-даа, Оглун-даа хүлээп көрбес. 23# Мф. 10:33Оглун хүлээп көрбес кижиниң Адазы-биле харылзаазы база чок, Оглун хүлээп көөр кижиде Ада база бар.
24 # 1 Ин. 3:11Силерге хамаарыштыр алыр болза, эң эгезинде-ле дыңнааныңар медээ сеткилиңерге артар ужурлуг. Ооң дугайында эң эгезинде-ле дыңнааныңар ол медээ сеткилиңерге артар болза, Оглу болгаш Адазы-биле тудуш харылзаалыг артар силер. 25Оглунуң биске аазаан чүүлү дээрге-ле мөңге амыдырал-дыр.
26 # Мк. 13:5; 1 Ин. 3:7; Кол. 2:8; 2 Фес. 2:3Силерни дуурайлаарын кызып турар улустуң дугайында мен ол бүгүнү силерге бижээним бо. 27# Иер. 31:34; Евр. 8:11Ынчаарга Христостан алганыңар Ыдыктыг Сүлде силер-биле кады артар, ынчангаш улустуң силерни сургаан херээ чок; харын ол Сүлде силерни бүгү чүвеге өөредип турар. (Ол Сүлдениң өөредии меге эвес, а шынныг деп билиңер.) Ооң силерни өөреткени дег, Христос-биле харылзаалыг артар ужурлуг силер.
Бурганның ажы-төлү
28 # 1 Ин. 3:2; 1 Фес. 2:19Ынчангаш, ажы-төлүм, Христос-биле харылзаалыг артып каап көрээлиңер. Ынчаарга Ол ээп кээрге, бис Ооң мурнунга арнывыс кыспайн, Ону коргуш чок уткуур бис. 29# Мф. 6:1 || 3 Ин. 1:11Христостуң чөптүг-шынныг амыдыралын билир болзуңарза, чөптүг-шынныы-биле амыдыраан кижи бүрүзү Оон укталган дээрзин база билип алыңар.
Zur Zeit ausgewählt:
1 Иоанн 2: Ы.Б.2025
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Институт перевода Библии, 2025