इब्रानियो 6
6
1इण वास्तै आओ मसीह री सिकसा री सरूआत री बातां नै छोड़नै, म्हौ सिद्धता में बढ़ौ। अर म्हौ नै उणीज सिकसा में पड़ियौ नीं रैवणौ चाहीजै ज्यौ मौत री और ले जावण वाळा करमो रै लियै पचताप, परमेसर में विसवास, 2अर बतिस्मे री सिकसा, माथा ऊपर हाथ राखणै, अर मरयोड़ौ रौ जी उठणौ, अर आखरी न्याव री सिकसा। 3जे परमेसर चावै तो म्हौ ओहीज करौ ला।
4जिणौ एक बार जोत पाई है, जिकौ सरगिए वरदान रौ स्वाद चाख लियौ है अर पवितर आतमा रा भागी हो गिया है, 5अर परमेसर रै उतम वचन रौ अर आवणवाळै जुग री सामरथ रौ स्वाद चाख लियौ है, 6जे ऐ भटक जावै, तो उणौनै मन फिराव रै वास्तै वळै पाछा नवा बणाणा मुसकिल है। क्यूंकै वे परमेसर रै बेटे नै आपरै लियै वळै सूली माथै चढ़ावै है अर परगट में उण माथै कलंक लगावै है।
7जिकौ धरती आपरै ऊपर बार-बार पड़न वाळै पांणी नै सोख लेवे अर उण लोगां रै लायक फसल उगावै है, जिकौ उण ऊपर खेती करावै है, वो धरती परमेसर रौ आसीस पावै है। 8बल्कि जे वो धरती कांटा अर ऊंटकटारा उपजावै है, तो वो बेकार है। उण माथै सराप पड़ नै वाळौ है, अर आखरी में उणनै बाळी जावैला।
9हे प्रिय भाइयो, जे म्हौ इण तरैह ऊं बोल रिया हो, तौभी म्हौ नै पूरौ विसवास है की आप लोगां री दसा इणौ ऊं घणी बड़िया है अर आप मुगति रै मारग माथै चालौ हो। 10क्यूंकै परमेसर अन्यावी कोनीं, की थौरा कांम, अर उण परैम नै भूल जावै, जिकौ थै उणरै नाम रै लियै इण तरैह ऊं दिखायौ, ज्यौ की परमेसर रै लोगां री सेवा की, अर कर भी रिया हो। 11म्हौ चावौ हो की थौरे में ऊं हरैक जीवन भर ऐड़ा इज कठिन मेनत करता रै। जे थै ऐड़ौ करौ हो तो थै पको ही उणनै पाओला जिणरी थै आसा करता रिया हो। 12म्हौ ओ नीं चावौ की थै आळसी हो जाओ। बल्कि थै उणरौ अनुकरण करौ जिकौ विसवास अर धीरज रै साथै उण चीजों नै पा रिया है जिणरौ परमेसर वायदो कियो हो।
परमेसर रौ पको वायदो
13परमेसर अबराहम ऊं वायदो करते वगत जद सौगन खाणै रै लियै किणी नै आपरै ऊं मोटो नीं देख्यौ, तो आपरी इज सौगन खायनै कयौ, 14“म्हैं हकीगत थनै घणी आसीस दूंला, अर थारै वंसज नै बढ़ातो रहूंंला।” 15अर इण रीति ऊं उणै धीरज राखनै वायदो कियोड़ी बातां हासल की।
16मिनख तो आपरै ऊं कोई मोटे री सौगन खाई करै है, अर उणरै हरैक विवाद रौ फैसलो सौगन ऊं पको होवै है। 17इण वास्तै जद परमेसर नै वायदो री वारिस माथै और ही खुली रीति ऊं परगट करणौ चाहयौ, की वो अपणै वायदो नै कदैई कोनीं बदळै ला, तो वायदो रै खातर सौगन खाई। 18तो एठै दो बातां है, उणरौ वायदो अर उणरी सौगन जिकौ कदैई नीं बदळ सकै। अर जिणरै बारै में परमेसर कदैई झूठ नीं कैह सकै। इण वास्तै अपां जिकौ परमेसर रै नजीक चरण लेणे आया हो अर जिकौ आसा उणै म्हौ नै दी है, उणै राखता होया घणा खुस हो। 19वो आसा म्हौरै प्रांण रै लियै ऐड़ौ लंगर#6:19 समंदर में जहाज नै रोकणे रै लियै भारी लोह नै रस्सी ऊं बांधनै पांणी में नोखे है उणनै लंगर कैवै है। है जिकौ स्थिर अर पको है, अर पड़दे#6:19 पुराणा नियम में महायाजक इण पड़दे रै भीतर तांई साल में एक बार जांणै री अनुमति ही। रै भीतर खास पवितर जगा तांई पुगै है। 20जठै यीसु मलिकिसिदक री रीति माथै हमेसां रै लियै महायाजक बणनै, म्हौरै लियै अगुवा रै रूप मे परेवस करयौ है।
Zur Zeit ausgewählt:
इब्रानियो 6: RWR
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© NLCI CC BY-NC-ND 4.0