गलातियो 2
2
पौलुस नै प्रेरित मांनणौ
1 #
प्रेरि 11:30; 15:2 चौदह साल रै पछै म्हैं बरनबास रै साथै यरुसलेम गयो अर तीतुस नै भी साथै लेन गियौ। 2परमेसर म्हारै मन में कयौ के, म्हनै जावणौ चाहीजै। जिकौ सुभ संदेस में यहूदी कोनीं उणौनै सुणाऊ हूं, उण सुभ संदेस रै बारै में मंडली रा परधान लोगां नै एकांत में सुणायो। ताकी ऐड़ौ नीं हो के म्हारी इण वगत री अर पैला री मेनत बेकार हो जावै। 3पर वे तीतुस नै जिकौ म्हारै साथै आयौ हो अर यूनान रौ हो, तो भी उणनै खतनो कराणै वास्तै मजबूर कोनीं करयौ। 4पण ओ सवाल उण झूठै लोगां ऊं उठयौ, जिकौ छांनै छांनै दल में भिळगा हा। जिकौ आजादी यीसु मसीह में मिळी उणरौ भेद लेन वे म्हौनै गुलाम बणाणा चावै। 5म्हौ उण लोगां रै सांमै एक घड़ी भी नीचा नीं रिया, ताकी सुभ संदेस री सचाई थांरै में बण्योड़ी रैवै।
6पर वे लोग किता ही मोटा क्यूं नीं रैवै, उणौरौ कितौ ही मांन क्यूं नीं रैवै, म्हनै उणरी कोई परवा कोनीं। क्यूंकै परमेसर किणी रौ पकसपात नीं करै। वे म्हारै संदेस में कोई कमी नीं काढ़ सकया। 7पर उलटा वे मांन लियौ के, जिण तरैह ऊं पतरस नै यहूदियो में सुभ संदेस सुणावण रौ कांम सूंपयौ, उणीज तरैह ऊं म्हनै जिकौ यहूदी कोनीं उणौ में सुभ संदेस सुणावण रौ कांम सूपयोड़ो है। 8क्यूंकै परमेसर पतरस नै यहूदियो में सुभ संदेस रा परचार वास्तै सगति दी अर प्रेरित बणायौ, उणीज तरैह ऊं परमेसर म्हनै भी प्रेरित बणायौ अर जिकौ यहूदी कोनीं उणौ में सुभ संदेस रा परचार वास्तै सगति दी। 9जिकौ आदमी मंडली रा थम्बा हा, यानि याकूब, पतरस अर यूहन्ना परमेसर री करपा रा उण वरदान नै जांणगा, जिकौ म्हनै मिळयो हो। वे म्हनै अर बरनबास नै आपरा जांण नै म्हौरै ऊं हाथ मिळायो। वे इण बात नै मांनगा के, म्हैं जिकौ यहूदी कोनीं उणौ में कांम करौला और वे यहूदियो में कांम करैला। 10वे सिरफ ओ कयौ के, मांनै गरीबो रौ ध्यांन राखणौ है। इण कांम नै तो म्हैं खुद भी करणौ चावतौ हो।
पौलुस पतरस नै हाका करिया
11पर जद पतरस अन्ताकिया आयौ तो, म्हैं उणरा मूंडा माथै उणनै हाका करिया, क्यूंकै वो गळती कर रियौ हो। 12वो पैला जिकौ यहूदी कोनीं उणौरै साथै खावतो हो। पर जद ऊं याकूब रै उठै ऊं की आदमी आया, तो वो जिकौ खतनो करणै चावता उणौरै डर ऊं यहूदी कोनीं उणौ ऊं आगौ रैवण लागौ। 13दूजा यहूदी भाई भी पतरस री तरैह ऊं दिखावो करनै लागा अर बरनबास भी उणौरै दिखावा में आयग्यौ। 14जद म्हैं देखियौ के, ऐ बातां सुभ संदेस रै हिसाब ऊं सही कोनीं है। तो म्हैं सगळौ रै सांमै पतरस नै कयौ, “जद थूं यहूदियो में जनम लेन, यहूदियो ज्यूं नीं चालै तो थूं जिकौ यहूदी कोनीं उणौनै यहूदियो रा रिवाज मानण वास्तै मजबूर कीकर कर सकै?”
विसवास ऊं धरमी बणणौ
15अपां जनम ऊं यहूदी हा अर अपांरौ जिकौ यहूदी कोनीं उण पापियो ऊं कीं कांम कोनीं। 16#रोमि 3:20; रोमि 3:22तो भी ओ जांण नै के, मिनख मूसा रै कायदे ऊं कोनीं, पर यीसु मसीह माथै विसवास करणा ऊं पाप माफ होवै। इण वास्तै अपां भी यीसु मसीह माथै विसवास करणा ऊं धरमी बण्या। मूसा रै कायदे माथै विसवास करणै ऊं धरमी कोनीं बण्या। क्यूंकै मूसा रै कायदे धरमी कोनीं बणा सकै। 17अपां यीसु मसीह ऊं पाप री माफी लेने धरमी बणौ अर मूसा रै कायदे अपांनै पापी कैवै, तो कांई यीसु मसीह पाप नै बढ़ावै? कदैई कोनीं। 18क्यूंकै, जिण मुसा रै कानुन नै म्हैं छोड़ दियौ अर उण हीज माथै पाछौ चालूं तो म्हैं खुद अपराधी ठैरूं हूं। 19मूसा रै कायदे ऊं देखौ तो म्हैं, मूसा रै कायदे वास्तै मरग्यौ हूं, ताकी म्हैं परमेसर रै वास्तै जीऊं। 20म्हैं यीसु मसीह रै साथै सूली माथै मरग्यौ हूं। अबै म्हैं जीवतौ कोनीं, पर म्हारै में यीसु मसीह जीवता है। म्हैं सरीर ऊं जीवतौ हूं तो, सिरफ उण विसवास ऊं जीवतौ हूं, जिकौ परमेसर रा बेटा माथै है। जिकौ म्हारै ऊं परैम करयौ अर अपणै आप नै म्हारै वास्तै दे दिया। 21म्हैं परमेसर री दया रौ मांन नीं बिगाड़ सकूं, क्यूंकै अगर मूसा रै कायदे ऊं पाप माफ हो जाता तो, यीसु मसीह रौ मरणौ बेकार होवतो।
Zur Zeit ausgewählt:
गलातियो 2: RWR
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© NLCI CC BY-NC-ND 4.0