Ansa 30
30
Kadanshi ka Agu
1Kadanshi ka akaka ka Agu kolobo ka Jake,
Vuma vu nanlo va u dana ta̱ Itiyelu n Ukalu.
2A̱ ka̱tsuma̱ ka uma n laꞋa le ta̱ tsulau
mi n kuyeve tsu vuma ba.
3N la̱nsa̱ cicoꞋo ba,
mi kpamu n kuyeve a ukuna
u Ka̱shile ba.
4Yayi u saꞋwai kubana gaɗi ɗa u bonoi?
Yayi u saꞋwai ku kukunkuku wunla̱i e kukiye ku ni?
Yayi u saꞋwai ku ka̱ta̱la̱ mini o motogu ma̱ ni?
Yayi kpamu u shikpa̱i uteku wu uduniya?
Yayi kula ku ni, kpamu yayi kula ku maku ma̱ ni?
Dana mu, vu yeve baci.
5Kadanshi ka Ka̱shile ra̱ka̱ ki m ma̱ta̱ɗa̱ ba,
a̱yi ma̱ra̱ga̱ maꞋa wa aza a na i a̱ kula̱nsa̱
ubuta̱ u kusheɗeku wa̱ ni.
6Ka̱ta̱ vu doku a kadanshi ka̱ ni ba,
talo wa kuɓarangu wu
ka̱ta̱ vo okpo kayaꞋin ka aꞋuwa.
7Vuzavaguɗu ili ire i ɗa mi o kufolono wu,
ka̱ta̱ vu sa̱nka̱ mu ba kafu n kuwa̱.
8Takpa ukuna wa aꞋuwa daꞋangi nu mpa,
ka̱ta̱ vu neke mu uciyi wa̱ a̱bunda̱i ko unambi ba,
ama neke mu una̱ wi ilikulyaꞋa i kanna lakam.
9ta baci nannai ba, mi ta̱ a kuciya̱
udukuyan wa̱ a̱bunda̱i ali n dana,
<<Yayi Vuzavaguɗu?>>
ko kpamu mu okpo vuza vu unambi
ali n yaꞋan uboki,
ta n kugoyo kula ku Ka̱shile ka̱ va̱ nannai.
10Ka̱ta̱ vu la̱nga̱sa̱ kula ku kagbashi
a̱ ubuta̱ u vuzagbayin vi ni ba,
ta baci nannai ba, wi ta̱ a kushika wu,
vi ta̱ tana a kutakacika adama a nanlo.
11Uma o yoku i ta̱ lo a na a ci shika isheku i le.
kpamu a tsu zuwaka ina̱ku i le una̱singai ba,
12aza a na a ci ɗika ka̱ci ke le i ta̱ ciɗa,
tana i ta̱ n unata,
13aza a na makyan dem kindi ku le ku kugoyi ku ɗa,
i a kuɗika ka̱ci ke le ili i yoku i ɗa,
14aza a na anga e le otokobi a ɗa,
aza a na atakpamkpatsu e le kpamu muwun n ɗa,
adama a na a takuma aza a unambi aduniyan,
n aza a yali a̱ ka̱tsuma̱ ka uma.
15Kutsa̱n ki ta̱ n nkere nre. E ci ɗeke le ta̱, NeꞋe mu, neꞋe mu.
Ili tatsu yi ta̱ lo i na i ci cuwa̱ ba,
ali ili i na̱shi i na i tsu dana, <<U yawa ta̱ ba.>>
16Ele ɗa, asaun, n kamatsatsu kana ki madari,
iɗika i na i ci cuwa̱ m mini ba,
n akina a saꞋawa kudana, <<U yawa ta̱ ba.>>
17Vuza vu na baci goyoi esheku a̱ ni,
yaba dem vu na u zoꞋosoi a̱na̱ku a̱ ni,
agawan a̱ ka̱ra̱Ꞌa̱ i ta̱ a ku kongoro yi a̱shi,
ka̱ta̱ asakali a takuma le.
18Ili i tatsu yi ta̱ lo i na i ci neke mu mereve,
ili i na̱shi i na mi a kufuɗa kuyeve ba,
19i ɗaɗa, uteku tsu na ka̱kuru ka ci imkpa gaɗi,
tsu na koko ka tsu wala a gaɗi vu katali,
tsu na kpantsu ku tsu wala a mala,
n ukuna u mavali m mavuka.
20Na ɗa tsu na vuka vu tsugbani vu ci yaꞋan.
u ci lyaꞋa ta̱ ka̱ta̱ u gboro una̱ u ni
ka̱ta̱ u dana, <<Mpa n yaꞋan unushi ba.>>
21Ili i tatsu yi ta̱ lo
i na aduniyan e ci jeꞋeke ikyamba,
ili i na̱shi i na i a kufuɗa kugbama asuvu ba,
22kagbashi ka na ko okpoi mogono,
kalau ka na ka̱ cuwa̱i n ilikulyaꞋa,
23mavuka ma na a iwain ɗa u ciya̱i vali,
m mekere ma kagata ma na ma isai tsugbayin tsa̱ a̱na̱ku a̱ ni.
24Ili i na̱shi yi ta̱ lo aduniyan i na yi kenkeꞋen
ama i ta̱ n cicoꞋo ka̱u,
25a̱yinga̱nla̱i ili i wuma i ɗa i na yi n utsura ba,
ama n nannai dem o tsu foɓo ta̱ ilikulyaꞋa i le n irana.
26OsoꞋo nnama n ɗa n na mi n utsura ka̱u ba,
ama n nannai a tsu maꞋa ta̱ iꞋuwa i le a atali,
27akyun i m mogono ba,
ama n nannai dem a ci yaꞋan ta̱ nwalu n tsugbayin,
28i ta̱ a kufuɗa kuka̱na̱ kalagadau n kukiye,
n nanai dem a̱ ci ciya̱i le ta̱ e efeku o ngono.
29Ili i tatsu yi ta̱ lo i na i tsu rono a̱tsuma̱
a iɗika a nwalu n ulami,
ili i na̱shi i na i tsu wala uyotsongi n utsura u le.
30Kawu vu utsura a̱ ka̱tsuma̱ ka nnama m kakamba,
a̱yi na u tsu katsukpa ili ba,
31kepeꞋen ki isali m ma̱ga̱ji,
m mogono ma na mi n osoji uka̱ra̱Ꞌi n a̱yi.
32Vu yaꞋan baci tsulau
ɗa vu cikpai ka̱ci ka̱ nu,
ko vu foɓusoko baci vuza vu yoku ka gbani-gbani,
to vu paɗa biꞋi bini ka̱ta̱ vu sheshe ka na va kuyaꞋan,
33tsu na ku kuciwa ku mani ku tsu tuka̱ m maniꞋin,
kutsugba ku vunu ku tsu zuwa ta̱ ma̱ga̱n ma̱ ta̱sa̱,
ta uzami u kadanshi u tsu tuka̱ n vishili nannai.
©️2025 Language Development and Translation Initiative (LDTI)