Preritʹ 18
18
Korinthioko talare
1Natayom Pol Ethens bâgiketeʹ Korinth sohorre cane. 2Aṛe Âkila nutumte miṭiʹ Jihudi suliʹ ânido napamne. Pontio prodisâmre Âkilaoaʹ janam holentaya. Romio raja Klaudiuste sanam Jihudiko Rom bâgiketeʹ caʹlaʹ hukum maleʹkoe. Analaʹte thoṛa din lahare Âkila aiʹren girthân Priskilla engeketeʹ Itâli khoiʹ Korinth hiʹlene. Poldo ângkinṭheʹ cane. 3Ângkin laka âniho tâmbu baneyaʹ kâmisane mente ângkin suliʹ taheketeʹ kâmilaʹ lagone.
4Sanam jiruʹaʹ dinre Poldo somaj oraʹ caketeʹ Jisuoaʹ bisoite aloconesane ar Jihudi ar Grik âdmiko Jisuoaʹ ḍaharte agukoʹlaʹ kurumuṭisane. 5Jâkhni Silâs ar Timothi Mesiḍoniâ khoiʹ hiʹnâkin tâkhni Poldo Issoraʹ katha procarketeʹ aiaʹ sanam somai kaṭelaʹ lagone. Ânido Jihudikoṭheʹ sakkho maʹsane je, Jisugi Khrisṭokane. 6Kheʹ Jihudiko jâkhni Polaʹ biruddhore katha menketeʹ âni nindâilaʹ lagonako tâkhni Poldo angkoaʹ biruddhore aiaʹ lugri koṭakeʹtene ar menkede, "Apeyaʹ meyomnaʹ dâido apeyaʹ nijeyaʹ bohoʹ cetanre ujuʹna. Na bisoite ingdo nirdosgiying. Nit khoiʹ ingdo Ojihudikoṭheʹ caʹing.
7Natayom Poldo aṛe khoiʹ caketeʹ Titio Jusṭo nutumte miṭiʹ Issor bhoktoaʹ oraʹ cane, ekeyaʹ oraʹdo somaj oraʹ panjorre tahelentaia. 8Somaj oraʹren miṭiʹ neta Kirispo ar aiaʹ oraʹren sanamkhoiʹ Probhu cetanre pâtyunako. Ar Korinth talaren aimahorgi Polaʹ katha atenketeʹ pâtyunako ar bâptisma engekedako.
9Miʹdin nindâ Probhute sapnate Pol metakidie, alo botoroʹam, katha lorme, thirketeʹ alo tahenam, 10ceklaʹbang Ingdo am suliʹgi miningâ, ekeho amaʹ khuti oho dareʹtamako, karon niâ sohorre Ingren âdmi menaʹkoa." 11Niâ laʹte Poldo miʹ bochor cho mas ana sohorre tahaketeʹ âdmiko Issoraʹ katha cetʹoʹkoe.
12Kheʹ Gallio jâkhni Akhaya prodisâmren sasoniʹ tahelene, tâkhni Jihudi âdmiko sanamkhoiʹ miʹketeʹ Pol sabketeʹ bicâri laʹte koṭre âgukidiako. 13Angko menkedako, "Nâi âdmi Issor upâsonai laʹte uskukokane akaṭaʹdo Mosiaʹ ân biruddhogiâ."
14Kheʹ jâkhni Pol katha menlaʹ caʹsane nengka somai Galliote Jihudiko metakeʹkoe, "Jihudiko, Niâ judi jahan onnai se aima dosnaʹ jahanaʹ bepar hoʹahoteʹ tahale apeyaʹ katha atendo ingâʹ pokkhe ṭhik kâmi hoʹahoteʹ 15Kheʹ katha, nutum ar Mosiaʹ ânnaʹ somporkote judi kuli hoʹa, tâkhni apegi niânaʹ mimangsepe. Ingdo anako sanam beparte oho bicâring." 16Niâko katha menketeʹ ânite bicârnaʹ asonkhoiʹ angko tâṛyukeʹkoe.
17Tâkhni sanam Jihudikote somaj oraʹren neta Sosthini sabketeʹ bicârnaʹ oraʹ lahare dalkidiako, Kheʹ Gallio ana koyoʹketeʹho bang lellede.
Priskilla, Âkila ar Aplo
18Thoṛa din Korinthre kaṭo tayom Poldo pâtyuonkhoiʹ boihakoṭheʹ khoiʹ bidâi engekede ar Âkila ar Priskilla suliʹ daʹ ḍaharte Siriâ disâmre hiʹne. Pol miṭiʹ mânsitlede mente caʹ lahare Kingkriâ bondorre aiaʹ bohoʹ munḍrâleʹtene. 19Ifis sohorre pâhcuketeʹ Poltedo Priskilla ar Âkila bagiṭhokeʹkine. Niâ tayom ânido nijegi somaj oraʹ caketeʹ Jihudiko suliʹ Jisuoaʹ bisoite procarlaʹ lagone. 20Jihudikote jâkhni âni ako suliʹ thoṛa din tahanlaʹ nehorkidiako, Kheʹ ânido bang râjilene. 21Kheʹ aṛe khoiʹ caʹ somai âni menkede, "Issoraʹ ichâ holenkheʹ ingdo arho âcur hijuʹing." Niâtayom âni Ifis khoiʹ jahajte cangene.
22Jâkhni Âni Koisoriâ sohorre pâhcune tâkhni jahaj khoiʹ agroketeʹ Jirusalem cane. Aṛe monḍoliren âdmiko subheccha mako tayom ânido Antiokhiâ cane. 23Aṛe thoṛa din taheketeʹ ânido aṛekhoiʹ Galatiâ ar Forugiâ prodisâmre cane aṛenaʹ miʹ jaga khoiʹ eṭaʹ jagare âcur âcurte celakoaʹ pâtyu ḍherketeʹ angko suktisâlikeʹkoe.
Apolloaʹ biboron
24Apollo nutumte miṭiʹ Jihudi Ifis hiʹne. Âniaʹ oraʹ tahalena Aleksandrio sohorre. Ânido miṭiʹ manja procarok tahalene ar Pobitro Sastro aima manjate baṛesane. 25Ânido Probhuoaʹ ḍahar bisoite cetʹlede ar attanaʹ suktite âdmiko Jisuoaʹ bisoite cetʹokosane. Judiho ânido eken bâptisma emoʹiʹ Johonaʹ katha baṛesane. 26Ânido aima sâhus suliʹ somaj oraʹre katha menlaʹ lagone. Tâkhni Priskilla ar Âkilate âniaʹ katha atenketeʹ ângkinte âni oraʹ âgukidiâkin ar Issoraʹ ḍaharnaʹ bisoite arho manjate âni bujhukidiâkin.
27Jâkhni Apllo Akhayare caʹlaʹ namkede tâkhni Ifisren pâtyuonkhoiʹ boihakote ânido hub makidiako. Akhayaren celakote jate Apllo atangiâko niâlaʹte Ifisren boihakodo ciṭhi olkedako. Issoraʹ dayate Akhayare ekeko pâtyulenako aṛe pâhcuketeʹ Apollote angko aima gorokeʹkoe. 28Ceklaʹbang Jisugi Âni Khrisṭokane, anado âni Pobitro Sastro talakhoiʹ promankede ar sanamkhoiʹaʹ laharigi aima jorte jukti torkoketeʹ Jihudiko harokeʹkoe.
Zur Zeit ausgewählt:
Preritʹ 18: EKL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
©️2025 Bible Students Fellowship of Bangladesh
