Preritʹ 15
15
Jirusalemnaʹ sobha
1Jihudiâ disâm khoiʹ koekṭeʹ âdmi Siriâ disâmnaʹ Antiokhiâre hiʹnako ar pâtyuonkhoiʹ boihako niâ mente cetʹokolaʹ lagonako, "Mosioaʹ ân lakaketeʹ ape bang sonnotpekheʹ akalakatigi apedo pap khoiʹ oho bacoʹape." 2Anate Pol ar Barnaba saote nako âdmioaʹ aima katha kaṭakâṭi hontâkinâ. Tayomte ṭhikna je, Pol ar Barnaba koekṭeʹ pâtyuonkhoiʹ laite Jirusalem caʹkinhâʹ ar preritko ar monḍoliren harme netako salaʹ niâ bisoite aloconekinhâʹ.
3Antiokhiâren monḍolite ângkin kolkeʹkinâko. Foinikiâ ar Somoriâ prodisâmnaʹ talate caʹ somai Pol ar Barnabate âdmiko lâioʹkoakin, Ojihudiko alka Issor hate âcurkanako. Niâ khobor atenketeʹ pâtyuonkhoiʹ boihako sanamkhoiʹgi aima khusinako. 4Jâkhni Pol ar Barnaba Jirusalemre hiʹnâkin tâkhni monḍoliren âdmiko, harme netako ar preritko agrohoketeʹ angko atangkeʹkoako. Angko talate Issor itâʹ cikâkade ana sanamgi angkote sanamkhoiʹ lâioʹkoako. 5Forisi dolren koekṭeʹ âdmi pâtyulenako. Angko pâtyuonkhoiʹ tengoketeʹ menkedako, "Ojihudiko sunnotkoaʹ dorkar ar angko jate Mosiaʹ ân maneyako analaʹte angkodo hukum makoaʹ dorkar."
6Tâkhni preritko ar monḍoliren harme netakodo niâ bisoite aloconelaʹte miʹ jagare jaoranako. 7Aima alocona tayom Pitorte beretʹketeʹ angko metakeʹkoe, "Boihako, apeto baṛeyape je, aima din lahare apeko talakhoiʹ Issorte ingdo bachongekâdinge jate Ojihudiko ingâʹ moca khoiʹ manja khobornaʹ katha atenketeʹ pâtyuʹako. 8Issortedo sanamkhoiʹaʹ ontor baṛetaboe. Ânite alka abo Pobitro Atta danoleʹboe, Ojihudikoho engkaketeʹgi Pobitro Atta danketeʹ sakkho malede je, angkoho pap khoiʹ baco namkadako. 9Ânido abo ar angko bhitârre alada mente itâʹgi bang dohokade, karon angkodo Issorre pâtyukanako mente Ânitedo angkoaʹ ontorho sâfâkaʹtakoe. 10Tahale aboren sederen âdmiko se abo akaṭaʹ bojha gemer bang darekadabo ana jungâl Ojihudi pâtyuonkhoiʹaʹ kandhaʹre rakabketeʹ cekelaʹ apetedo Issor purikkhailaʹ kurumuṭudape? 11Aledo pâtyuʹale je, Probhu Jisuoaʹ dayate Ojihudi pâtyuonkhoiʹ alka pap khoiʹ bacokanako engkagi aleho bacokanale."
12Tâkhni sobharen sanamkhoiʹ thirngenako ar Pol ar Barnaba talate Issor Ojihudiko talare akako sanam ascarjo kâmilede ana angkoaʹ mocarigi atenlaʹ lagonako. 13Angkoaʹ katha men cabalenkheʹ tayomte Jakob menkede, "Boihako, ingâʹ katha atenpe. 14Issordo Aiʹren nijeren âdmi hoʹ laʹte Ojihudiko talakhoiʹ thoṛa âdmi bachongeketeʹ uduʹkade je, Ojihudikolaʹteho Âniaʹ cintâ menaʹtaya. Niâ kathagi Simon Pitorte abo metakaʹboe. 15Niâ katha saote nâbikoaʹ kathanaʹho mil menaʹa, karon sastrore ol menaʹa,
16'Niâ tayom Ing hiʹketeʹ
Dâudaʹ dhaso tâmbu
arho baneinghâʹ.
Akako dhongsongekana ana arho gatheinghâʹ,
arho ana ṭhikinghâʹ.
17Jate eṭaʹ sanam âdmiko,
mane ekeko sanam Ojihudiko Ingren mente ṭâhu hokana
angkodo Ingâʹ khoj dareʹako.'
Probhu, ekedo nako sanam kâmie ânigi na katha menkade.
18Aima lahakhoiʹgi niâdo Âniaʹ monnaʹ talare tahelentaya."
19Jakob arho menkede, "Niâlaʹte ingâʹ monte mene je Ojihudikodo Issor hate âcuroʹkanako angko kosṭo mado aboaʹ ucitdo bangkana. 20Ana khoiʹ borong abo angkoṭheʹ niâ katha olabo.
Je, angko jate murti pujâ lakanaʹ chut,
bebhicâr,
nimutʹgoiʹ janoaraʹ jil bang jomako ar meyom bang nuiako.
21Niâko hukum angko mado manjaoa, karon Mosi akako menlede anakodo prottek sohorre aimadin laha khoiʹgi procar hoʹkana ar âni akako olṭhokade anakodo prottek jiruʹaʹ dinre somaj oraʹkore pâṛho hoʹkana."
Ojihudikoṭheʹ ol ciṭhi
22Tâkhni preritko, monḍoliren harme netako ar monḍoliren eṭaʹ sanam âdmiko ṭhikkedako je, angkote nijeren koekṭeʹ âdmi bacoketeʹ Pol ar Barnabaoaʹ saote Antiokhiâre kolkokohaʹ. Angkote Jihuda ar Sil bachongekeʹkinâko. Nâi Jihuda Borsabba mente ṭâhuisanako. Pâtyuonkhoiʹ boihako talare nâkin barhordo neta tahelenakin.
23Angko saote niâ ciṭhi kol hona,
Antiokhiâ, Siriâ ar Kilikiâren Ojihudi pâtyuonkhoiʹ boihakoṭheʹ
ale preritko ar monḍoliren harme netakodo niâ ciṭhi oldale.
Apeyaʹdo monggol hoʹtapeman.
24"Aledo aten namkedale je, ale tala khoiʹ koekṭeʹ âdmi apeṭheʹ caketeʹ aima katha menketeʹ apeyaʹ mon osthirkaʹtapeyako ar kosṭo makaʹpeyako, kheʹ aletedo nangkanaʹ kâmilaʹ angko bang metakaʹkoale. 25Niâlaʹte ale sanamkhoiʹ miʹmotketeʹ koekṭeʹ âdmi bachoketeʹ aleren dulârniʹ gate Barnaba ar Pol saote apeṭheʹ angko kolkeʹkoale. 26Barnaba ar Pol aboren Probhu Jisu Khrisṭoaʹ nutum laʹte nijeyaʹ jiui maledakin. 27Alete Jihuda ar Sil kolkeʹkinâle jate ale akaṭaʹ oldale ana angkodo apeṭheʹ mocateho men dareʹako. 28Pobitro Atta ar ale niâgi manja monekedale je, niâ dorkari bisoi bâgiketeʹ ar jahanaʹtigi ape cetanre jate bojha bang capopeyale.
29Ana dorkari bisoikodo hoʹkâniʹ apedo murtiṭheʹ utsorgoyonaʹ jomaʹ alo jomape,
meyom alo nuiape, nimutʹgoiʹ janoaraʹ jil alo jomape,
ar jaha lakanaʹ bebhicâr alo rikiape. Nako rikâ khoiʹ sâhingre tahelenkheʹ ape manjaonaʹ rikipehaʹ. Bidâi."
30Pol, Barnaba ar ângkin âdmi kol holenkheʹ tayomte angkodo Antiokhiâre canako. Aṛe angkote monḍoliren âdmiko miʹṭheʹketeʹ ana ciṭhi angko makeʹkoako. 31Âdmikodo ana ciṭhi paṛhonako ar ana bhitârre akaṭaʹ jiui lareʹnaʹ katha tahelena anate angkodo khusinako. 32Jihuda ar Sil âkinho tahelenakin nâbi. Analaʹte ângkinte aima katha menketeʹ aṛeren boihako hub makeʹkoakin ar angkoaʹ pâtyu baṛhoketeʹ angkodo suktisâliketeʹ rakabkeʹkoakin. 33-34Thoṛadin aṛe taheketeʹ mucitʹre ekete ângkin kolleʹkinâko, angkoṭheʹ âcur caʹlaʹte ângkindo boihakoṭheʹkhoiʹ sântite bidâi namkedakin.
35Kheʹ Pol ar Barnaba Antiokhiâre tahenâkin, ângkindo eṭaʹ eṭaʹ aima âdmiko salaʹ Probhuoaʹ katha cetʹokosanakin ar manja khobor procarsanakin.
Pol ar Barnabaoaʹ motnaʹ omil
36Thoṛadin tayom Polte Barnaba metakidie, "Akako jagare alang Probhuoaʹ katha procarkadalang, delaʹ, nitgi anako jagare âcur caketeʹ pâtyuonkhoiʹ boihako salaʹ napamalang ar angko alkaketeʹ caʹkanako ana leltakoalang."
37Tâkhni Barnabate Johon saote engeilaʹ namkede. Nâi Johondo Mark nutumteho ṭâhuisanako. 38Kheʹ Poldo âni saore engedo manja bang monelede, karon ânitedo ângkin Pamfuliâre bâgiṭhoketeʹ cangelene ar ângkin saote ado bang kâmikade. 39Tâkhni Pol ar Barnabaoaʹ talare emon motnaʹ omil hontâkinâ je, ângkindo miʹhorṭheʹ khoiʹ ar miʹhor aladangenakin. Barnabado Mark saore engeketeʹ jahajre rakabketeʹ Saipras dip cangene, ar Poltedo Sil bachongekidie.
40Kheʹ Antiokhiâren boihakote Pol ar Sil Probhuoaʹ tire jimâkeʹkinâko tayomte ângkindo cangenâkin. 41Pol Siriâ ar Kilikiâ talatora caketeʹ sanam monḍolikoaʹ pâtyu baṛhoketeʹ angkodo arho suktisâliketeʹ rakabkeʹkoakin.
Zur Zeit ausgewählt:
Preritʹ 15: EKL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
©️2025 Bible Students Fellowship of Bangladesh
