Preritʹ 12
12
Pitor jelkhoiʹ mukti namkede
1Ana somai raja Herodte ottacarkolaʹte monḍoliren koekṭeʹ âdmi sab âguleʹkoe. 2Ânite Johonren boiha Jakob choṛate goiʹlidie. 3Jâkhni âni lelkede Jihudiko anate kusikanako tâkhni ânite Pitorho sabeilaʹ cane. Niâ ghoṭona baco porobnaʹ somai holena. 4Ânite Pitor sabsoketeʹ jelre bharokidie. Pitor jogoi laʹte solloṭeʹ sonno bhar ma holena, ekedo pon dolre hâṭing tahelenako. Herod ṭhikkede, bacoaʹ porob tayom bicâr laʹte Pitor âdmikoṭheʹ oṛoʹ âguiheʹ. 5Niâlaʹte Pitor jelkhanare aṭko doho hona. Monḍoliren âdmiko kheʹ Issorṭheʹ âni laʹte aima koijongsanako.
6Herodte aka hiluʹ Pitor bicâri laʹte oṛoʹ âguiheʹ ananaʹ lahadin ânido barya sonnoa talare jâpitsane. Ânido barya sikrite tol doho holena ar jogoiʹko jelkhananaʹ duârre jogesanako. 7Emon somai Probhuren miṭiʹ sorgodut aṛe hiʹketeʹ tengone. Anatigi jelkhananaʹ oraʹ marsalte marsal rakabna. Sorgodutte Pitor hormore jore ṭheloketeʹ ânido beretʹkete metakidie, "Saṭlaka beretʹ." Niâte Pitoraʹ baran ti khoiʹ sikrilaraketeʹ ujuʹna. 8Tâkhni sorgodutte Pitor metakidie, "Amaʹ lugri sorogme, jangare jutâ sorogme." Pitor anagi rikâkede. Sorgodutte âni metakidie, "Amaʹ cadre oyoketeʹ ingâʹ taynom taynom hijup."
9Pitor âniaʹ taynom taynom jelkhana khoiʹ barhere hiʹne, kheʹ sorgodut talate ja ghoṭoʹsana, anado je sârigiâ, ananaʹ itâʹgi âni bang bujhu darelede. Ânido monekede dorson lelde. 10Ângkindo palhe ar dosrauniʹ jogoiʹ dol paromketeʹ, lohanaʹ duârṭheʹ hiʹnâkin, duâr ângkin laʹte nije nijegi jhiʹngena ar ângkin ana talate oroʹngenakin. Ângkindo miṭiʹ ḍahar sabketeʹ dara caʹkanakin emon somai sorgodut hoṭat Pitor bâgiketeʹ cangene.
11Tâkhni Pitordo disâ namkede ar menkede, "Nitoʹ ingdo sârigi bujhu dareʹkâning je, Probhute Âniren sorgodut kolketeʹ Herodaʹ ti khoiʹ ar Jihudiko ja riki laʹte sorojontresanako ana khoiʹ ing bacokâdinge."
12Niâ katha bujhu dareketeʹ âni Johonren engat Moriomaʹ oraʹ cane. Ni Johondo Mark mente ṭâhu hoʹsana. Ana oraʹre aima horgi miʹṭheʹkete koijongsanako. 13Pitor barhenaʹ duâr ṭhele lekheʹ Roda nutumte miṭiʹ dâsi atennamkede, 14Pitoraʹ gala cinhuʹ dareketeʹ ânido nâniʹ hubne je, duâr bang jhiʹketeʹgi oraʹ bhitri caketeʹ khobor makeʹkoe, "Pitor duârṭheʹ tengo miniâ." 15Tâkhni celakote âni kuri metakidiako, "Amaʹ bohoʹ kharapkantama." Kheʹ âni bar bar jor maketeʹ menlaʹte angkodo menkedako, "Tahale nâido Pitorren bacoiʹ dutkane."
16Kheʹ Pitordo duâr ṭheletigi tahene. Tâkhni celako duâr jhiʹketeʹgi ânido lel namkidiako ar asarjongenako. 17Ânite angko thir tahan laʹte tite isâra makeʹkoe ar Probhute kalkaketeʹ âni jelkhana khoiʹ oṛoʹ âgukâdie ana baṛesokeʹkoe. Ar niâho menkede, "Niâ khobor Jakob ar eṭaʹ boihakoho makoape." Niâ katha menketeʹ ânido oṛoʹketeʹ eṭaʹ jaga cagene.
18Setaʹlenkheʹ, Pitor aka cane ana laite sonnoko talare hulusthul paṛongena. 19Herod aima manjatigi âniaʹ khojkede, kheʹ ânido bang namketeʹ jogoiʹko jerakeʹkoe ar tayomte angko jogoiʹdo goiʹgirikolaʹ hukum makeʹkoe.
Herodaʹ goiʹ
Niâ tayom Herod Jihudiâ khoiʹ Koisoriâ cane ar aṛe thoṛa din tahane. 20Ana somai Herod Sor ar Sidon sohorren âdmi cetanre edreketeʹ sengel lakane. Tâkhni aṛeniʹ âdmiko miʹṭheʹ milukete Herod saote napamoʹlaʹ canako. Blasto nutumte rajaoaʹ gitiʹnaʹ oraʹre pâtyuoniʹ kâmiâdmi nijeyaʹ pokkhe âguketeʹ angkodo raja saote miṭiʹ mimângselaʹ namkedako, karon raja Herodaʹ disâm khoiʹ angkoaʹ disâmre jomaʹ hijuʹsana.
21Tâkhni Heroddo miṭiʹ din ṭhikkede. Ânido ana din rajaoaʹ lugri soroʹketeʹ bicârnaʹ singhâsonre duruʹketeʹ angko âdmi saote katha menlaʹ lagone. 22Âniaʹ katha atenketeʹ angko garjoketeʹ menkedako, "Niâto debotaoaʹ galakana, âdmioaʹ galado bangkana." 23Heroddo Issoraʹ bang gouroblede mente tâkhnigi Probhuren miṭiʹ sorgodutte âni aghatilekheʹ ânido ruâne, ânioaʹ hormodo tejote jomkeʹtaiako, anate ânido goiʹngene.
24Kheʹ Issoraʹ katha pasnoʹtigi tahana ar aima âdmite Âni pâtyuilaʹ lagonako.
25Niâte Barnaba ar Solaʹ kâmi cabaketeʹ ângkintedo Johon saote engeketeʹ Jirusalem khoiʹ Antiokhiâre âcur canako. Nâi Johongi Mark nutumteho ṭâhuisanako.
Zur Zeit ausgewählt:
Preritʹ 12: EKL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
©️2025 Bible Students Fellowship of Bangladesh
