۲تسالونئکلی‌لره 2
2
مسئحئن گلئشی
1ائندی قارداشلار، ربّئمئز عئسا مسئحئن گلئشی و بئزئم اونون یانیندا ییغیلماغیمیز باره‌ده سئزدن خاهئش اله‌یئرئک کی، 2«ربّئن گونی چاتیب» دئین هر هانسی بئر روح، بئر کلام، و یا گویا بئزدن گلن بئر نامه، فئکرئزی تز لرزه‌یه سالدیرماسین، یا دا پرئشان اله مه‌سئن. 3قویمایین هچ کئم سئزی هچ بئر نحو ائنن آلداتسین. چونکی او زاماناجاق کی، اوّل ائماندان دؤنمه زامانی گلمه‌یه و هلاکت اوغولی اولان او شرئعتسئز آدام ظوهور اله مه‌یه، او گون گلمیه‌جک. 4او آدام هر تاری و یا عئبادت اولونان شیه ضئدّ دوروب، اؤزونی اوجالداجاق، اِله کی، تارینین معبدئنده اَیله‌شئب، اؤزونی تاری کئمی گؤرسده‌جک.
5مگر خاطیرلامیرسیز کی، حله یانیزدا اولاندا بو شیلری سئزه دیئردئم؟! 6سئز بئلئرسئز کی، ائندی اونا نه مانع اولور، اِله کی، او اؤز واختیندا ظوهور اله‌سئن. 7چونکی شرئعتسئزلئیئن سئرّی اله ائندی ده ائشله‌یئر؛ آمّا فقط او زاماناجاق کی او کی ائندئیه‌جک مانع دئر، آرادان قالخیزیلسین. 8او زامان او «شرئعتسئز» آدام ظوهور اِلئیهجک و رب اونی آغزینین نفسی ائنن اؤلدوروب، گلمه‌یئنئن شؤوکتی ائنن محو الئیه‌جک. 9یعنی، او ظوهور اله‌ین آدام شیطانین عمللرئنئن اَساسینا گؤره، بوتون قودرت و علامتلر و یالانچی عجایئبلر ائنن، 10و هلاک اولانلارین آراسیندا هر جور پئسلئیئن حئیله‌سی ائنن گله‌جک. چونکی حقئقتئن محبّتئنی قبول اله مه‌دئلر کی، بله نئجات تاپسینلار. 11بو سببدن تاری اولارین اوستونه سهوه چکن بئر گوج گؤندَ‌ره‌جک کی، یالان اولانا ائنانسینلار 12اِله کی، حقئقته ائنانماییب پئسلئکدن لذّت آپارانلارین هامیسی موحاکئمه‌یه چکئلسئنلر.
مؤحکم قالین
13آمّا بئز، ای ربّئن عزئزلری اولان قارداشلار، سئزه گؤره گرک همئشه تارییا شوکور اله‌یک. چونکی تاری باشلانیشدان سئزی موقدّس روحون تقدئسی و حقئقته اولان ائمانین واسئطه‌سی ائنن نئجات اوچون سچئب. 14و بونون اوچون ائدی کی، سئزی بئزئم خوش خبرئمئزئن واسئطه‌سی ائنن دعوت اله‌دی. اِله کی، ربّئمئز عئسا مسئحئن جلالینی قازاناسیز. 15بونا گؤره، قارداشلار، مؤحکم قالین و او تعلئملره کی، ائستر سؤز، ائستر نامه وسئله‌‌سی ائنن بئزدن اؤیرندئز، باغلی قالین.
16قوی ائندی عئسا مسئحئن اؤزی و آتامیز تاری کی، بئزی سوئب و بئزه ابدی تسلّی و فیضی ائنن یاخشی اومئد ورئب، 17هر یاخشی عمل و سؤزده اورَکلرئزه تسلّی ورئب، قووّتلندئرسئن.
@ 2024 Korpu Company