मत्ती 24

मंदिरो बिनाशो बारे भविष्यबाणी

(मरकु 13:1-23; लूको 21:5-24)

1अपेहल यीशु यहुदी मंदिरंङ ज़ि इबि लेहकी तोहई, दंङ दोऊ चेलारे दोबि मंदिरो बणाषी कंड्रिमी थल्जी दोऊ कछंङ अतिरे। 2दोई दोतंङ कुड़ी, “केहच़ी दिह भत्ते खंड्रातंई माह। गेह केतंङ हेले कुट्रातग देर इच्च़ा रघटु टोईच़ी रगला माकेश्रोतो अंऊ माह ठ्रव्लषा योतो।”

मुसीबत ए क्लेश

3अपेहल यीशु जैतून मिंदंङ गोह टोहकठे तोहई, दंङ चेलाज़ि एकांत दोऊ कछंङ अंज़े दोबि कुह्तोर, “ञेंतिंङ कंड्रु कि दि गप्पारे अपेहल शोर? कांह अपिमी ए संसारो अंत ओ छि निशानी शोतो?”

4यीशुज़ि दोतिंङ जुबाब रेंई, “खबरदार तोहई अच़िया केरे भरमासी माजूंस, 5छना कुचे महस मीहच़ी गिऊ अधिकारो दावा लहच़ी अपोर दंङ कोहर, गेह मसीह शुगाह दंङ महस मीहतिंङ धोखा रमोंर। 6अपेहल केहच़ी लड़ाई, दंङ लड़ाई तु गप्पा थक्पोंई दंङ बेंईन थाह, छना कुंई साते ता दी शुहबी ज़रूरी शुह, दंङ दुह टेमारिंङ संसारो अंत मा शोतो। 7छना कुचे इच्च़ा जाति मीहरे ऊईजातिऊ मीहतु खिलाप शोर दंङ इच्च़ा देश ऊई देशो खिलाप शोर, दंङ अकाल शोतो ए भुयंल अपोतो। 8दिह भत्ते गप्पारे तकलीफो शुरूआत शोतो।

9दंङ दोरे मीहरे अंऊ केहतु बिरोध लाहतोर बरदो रंड्रीमी थल्जी केरे च़ुमयतो केरे सचे केओर, दंङ गिऊ टोहकठे बिशवास लहज़िमी रंङ साते भत्ते जातिऊ मीहच़ी केतंङ साते बैर लोहर। 10दंङ महसज़ि गिऊ टोहकठे बिशवास लेह ब्याड़ा लेह केओर दंङ इदि अईदीबी च़ुमज़ि लोहर, दंङ एनातु बिचंङ बैर तोहर। 11महस हप्सी भविष्यकंड्रारे अच़ा अपोर, दंङ महस मीहतिंङ धोखा रमोर। 12दंङ अधर्म बढेकपरिंङ साते एनातु बिचंङ दाह योह्सा योतो। 13पर अंऊ जीवनो अंत तचेक गिऊ टोहकठे पक्‍का विशवासरिंङ बंङज़ोतो, परमेश्वरे दुह बचाके च़रपोतो। 14दंङ परमेश्वरो राज्यो पाहठी दिह रूठे खबर भत्ते संसारारंङ प्रचार शोतो कि भत्ते देशो जाति ज़ि दिबी ग्रहण लहज़िमी मोका खोकसोतो। दोहथल संसारो अंत अपतो।

महासंकटो शुरूआत

15दिऊ थल्जी अपेहल केहच़ी दुह उजाड़के अशुद्ध चीज़ो अतु पाहठी दानियेल भविष्यवक्ताए कुहषी तहरे, पवित्र ठाहरीरिंङ खड़े शुहचे खमोंई (अच़ि पढ़ेकपोंई, दोच़ी समझेक्पोंई।) 16दंङ अंऊ मीहरे यहुदिया प्रदेशंङ तोर दोरे बचेक्पिमी थल्जी गोह टोहकठे अच़ा ईलांई। 17दंङ अंऊ लंङदिंङ तोह दुरेह एनोह समानो थल्जी थाह याहच़ु; 18दंङ अरी रीहरिंङ तोहतोंई, दोरे एनातु खमज़े हपि था ईलांई।

19दुह ध्याड़ारिंङ अंऊ खोकटुंङ शोतो दंङ अंऊ पानू रंड्रा शोतो, दोतु टोईच़ी हाय-हाय! 20प्रार्थना लोहवा लोंहई कि केतिंङ सोहईरिंङ या अरामो ध्याड़ारिंङ पोकफी माजूंस। 21छना कुचे दोहथल धिठ्रोह भारी मुसीबत (कलेश) अपतो, छना ठ्रोह संसारो शुहरूबे तोग ता शुहचे माह ए दिबे थल अपेहला शोतो। 22अगर दोरे ध्याड़ारे घटाशी माशुहचंङ दंङ इच्च़ा ला जीव बचेकी माह शुंईयां, पर शत्‌ह लहसी दोतु बजाहज़ि दुह ध्याड़ारे घटेक्पोर।

23दुह टेमारिंङ अच़िया केतंङ साते कोतो, ‘खंणु, मसीह देहर तोह। छिता दोहर तोह ता विशवास था लांही।’

24छना कुचे ता हप्साड़ भबिष्यद्वाक्ता ए हप्साड़ मसीह खड़े शुहचे योतो, दंङ मोह्ड़े निशानी ए अद्धभुत कम कमोर अगर शुहचे इलि साते ता अंङषी दुरेह ला बहकाएकि च़रपोर। 25खंणु, गेह तुहई केतिंङ भत्ते धिर कुचे केहषी तातग। 26दिऊ थल्जी अगर दोच़ी केतंङ कुड़िर, खांई दुह सुनसान ठाहरीरिंङ तोह दंङ धकतेखा, हुंज़ा था ईलांई; खांई दुह कोठरिऊ अंद्रेग तोह, दंङ विशवास थलांई। 27छना बिजली पूर्व दिशाज़ि हुंज़े पशिचम दिशा तचेक चमकेपी, ध्वांए गेह मीहू योह अपिला शोतो। 28अंऊर शाऊल लोथडारे शोर दोरे गवाह रे ठ्रोहका शोर।

मीहू योहो यह्च़ा अपि

29दुह मुक्को क्लेशो थल एके हंयार शुहचे योतो, दंङ लहज़ा प्रागे लाह अच्च़ा योतो, कररे सरगंङज़ि दह्चे योर दंङ सर्गो मोह्ड़े शक्ति त्रुलज़ा योर। 30दंङ गेह मीहू योहऊ निशानी सर्गंङ तंङफोतो धरतीऊ भत्ते खानदानी मीहच़ी एनातु काह रटेकपोहर; दंङ गेह मीहू योह बि मोह्ड़े सामर्थ ए ठाटबाठरंङ सर्गो बदडातु टोईच़ी अपि तंङफोर। 31दोई तुरहीऊ जोहरे सगतंङ साते एनोह दूतारे च़रपोतो, दंङ दोरे धरतीऊ कुंणी-कुंणी ऊ गिऊ अंङषी मीहतिंङ ठ्रोहका लोहर।

अंजीरो बुटो कथा

32अंजीरो बुटो दोरच़ी दी कथा सिखेक्तुंई, अपेहल दोऊ ब्रन्ज़ रेह न्खी शुहबी दंङ लप हुची चुक्सोर; दंङ केतिंङ पता लेहकी य्वात कि फल रंड्रीमी ध्याड़ा पिचे इलज़ा। 33झांह अपेहल केहच़ी भत्ते गप्पा रेह शुहबी खमोंई दंङ ञेंहनी च़रतेनि कि गेह मीहू योह अबिमी तोह देर तचेक कि अच़ा ए अंजा। 34गेह केतंङ साते हेले कुट्रातग, अपेहल तचेक दिहरे गप्पा पूरा माह शोहर दोहथर तचेक दिह पीढ़ीऊ अंत मशुह। 35सर्ग ए धरती योह्सा योतो, दंङ गिऊ गप्पारे अपेहल योह्सोतो माह।

चेहकी बंगजू

(मरकु 13:32-37; लूको 21:34-38)

36पर गिऊ अई फेरा अपिमी पाहठी सही टेम अच़िला माह ञेंहऊ, माह स्वर्गदूताज़ि, माह गेह योह बि, सिर्फ बाहबि दुह ध्याड़ाओ पाहठी पता तोह। 37छना नूह ओ ध्याड़ारिंङ तोईरे, ध्वांए मीहू योहऊ अपिला शोतो। 38छना कुचे छना तिऊ प्रलय ओ तुहई कि ध्याड़ाङ अंऊ ध्याड़ा तचेक नूह जहाज़ंङ मचहढेकाते, दोतिंङ तचेक मीहच़ी ज़ोआतेर तुंङमातेर, दोतु विचंङ ब्याहरे शवातेर। 39दंङ तिऊ प्रलय ओ अंज़े दोरे रेंज़ा माहशिली दोहथल तचेक, दोतिंङ छले शुहंङसी माहदी; ध्वांए गेह मीहू योहऊ अपिला शोतो। 40दुह मुक्का झुह्ट गंङमी रीहरिंङ खड़े शोर, इच्च़ाबि लेहपच़े ऊईतु केह्षा योतो। 41झुह्ट मेच़ामिकु घट्ट पिहट्री शोर, इच्च़ा लेहपशे ऊईतु केह्षा योतो।

42दिऊ थल्जी केहच़ी चेहकी तोईनी, छना कुचे केहच़ी माह ञेंहई कि केहतु प्रभु अपेहल अपतो। 43पर दिह ञेंए केहई कि अगर घरबारो घ्राहकाबि पता शुई कि चोहर अपेहल अपिमी तोह, दंङ दुह चेहके बंङज़ोतो दंङ एनोह घरबारंङ चोरी शुहबी माहरेंईगा। 44दिऊ थल्जी केरे लाह त्याहर तोंई, छना कुचे अंऊ घड़ीऊ पाहठी केहच़ी सोचेक्सी मा, दुहए घड़ी गेह मीहू योह अच्च़ा अपोग।

विशवास जोगे दास ए माज़ी दास

45दिऊ थल्जी इच्च़ा वफादार, समझदार परगर दुह शुबी, अतिंङ दोऊ मालिके दोबि एनोह ऊई चुंङो परगरातु ध्यान तहच़ि ए दोतिंङ बगत रंड्रीमी ज़िम्मेवारी रेह तरच़ी। 46धन्य शुह दुह परगर अतिंङ दोऊ मालिक अंज़े ध्यांए लेह तंङफोतो। 47गेह केतंङ हेले कुट्रातग दोई दुह एनोह भत्ते धिरो अधिकारी लोहतो। 48पर अगर दुह मांजी परगरे चेहपोतो कि गिऊ मालिको अपिमी अईता ध्याड़ा तोह। 49दंङ एनोह साथी परगरातिंङ तेंङपोतो, दंङ तुंङज़ातंङ जोओतो तुंङमोतो।

50दंङ दुह परगरो मालिक झांह ठ्रोह ध्याड़ारिंङ वापिस अपोतो, अपेहल दुह दोऊ थल्जी रुमज़ा मशोतो, दंङ झांह ठ्रोह घड़ी अतु पाहठी दोई माह ञेंहतु। 51दंङ दोई दोबि महस मोह्ड़े सज़ा रमोतो दंङ दोऊ हिस्सा कपटी मीहतंङ साते ठहराएपोतो; दोहर क्रपिए छ्वा रुहक्च़ी शोतो।”

Zur Zeit ausgewählt:

मत्ती 24: LBFNT

Markierung

Kopieren