मरकुस 15

ईशु पिलातुस चे सामणे

(मत्ती 27:1,2,11–14; लूका 23:1–5; यूहन्‍ना 18:28–38)

1ङिओ उभरला तां तुरन्त प्रधान याजक, ते बङका ने, ते शास्त्रीया ने बल्कि सारी महासभा ने सलाह करली ते वाणे ईशु नु ब़न्धवाले, ते ओनु गेहली जती कर पिलातुस चे हाथा मां सोंपती ङिले। 2पिलातुस ने ओकनु पूछले, “का तु यहूदिया चा राजा छी?”

ईशु ने ओनु उत्तर ङिला, “तु आप ही किही पला।”

3प्रधान याजक ओचे उपर घणीया बाता चा दोष लावी पलते। 4पिलातुस ने ओकनु बल्ति पूछले, “का तु कुई उत्तर ना ङी, ङेख ये दुधे उपर कितनीया बाता चा दोष लावी पले?”

5पर ईशु ने बल्ति कोच्छ उत्तर कोनी ङिला, इठे तक कि पिलातुस नु बङा अचम्भा हुला।

ईशु नु मौत ची सजा

(मत्ती 27:15–26; लूका 23:13–25; यूहन्‍ना 18:39—19:16)

6पिलातुस ओ फसह चे तेंहवारा उपर कुई हेक कैदीया नु जानु वे चाहते, लौका वास्ते छोड़ती ङिता। 7बरअब्बा नांवा चा हेक बन्दे वा दंगे-फसादीया चे लारे कैदी हुता, जेह्णे दंगे मां हत्या करली हुती, 8ते भीड़ उपर जती कर ओकनु बिनती करु लाग़ली, कि जिंवे तु अम्चे वास्ते करता आला, उसड़े ही कर। 9पिलातुस ने वाकनु पूछले, “का तम्ही चाहवा कि मैं तम्चे वास्ते यहूदिया चे राजे नु छोड़ती ङिये?” 10कांकि ओ जाणता कि प्रधान याजका ने ओनु साड़ा कनु पकड़वाले हुते।

11पर प्रधान याजका ने लौका नु उभारले कि वे बरअब्बा नु ही वांचे वास्ते छोड़ती ङियो। 12ईं सुणती कर पिलातुस ने वांचे कनु बल्ति पूछले, “तां जानु तम्ही यहूदिया चा राजा किहा, ओचे मैं का करे ?”

13वाणे बल्ति रौला मचाती ङिला, “ओनु क्रूसा उपर चढ़ाती ङे।”

14पिलातुस ने वानु केहले, “कां, ओणे का बुराई करली?” पर वे होर वी जोरा चे किहुं लाग़ले, “ओनु क्रूसा उपर चढ़ाती ङे।”

15बल्ति पिलातुस ने भीड़ नु खौश करने ची इच्छा लारे, बरअब्बा नु वांचे वास्ते छोड़ती ङिले ते ईशु नु कोड़े मरवाती कर सोंपती ङिले कि क्रूसा उपर चढ़ाला जाओ।

सिपाहीया ने ईशु चा मजाक उङारला

(मत्ती 27:27–31; यूहन्‍ना 19:2,3)

16सिपाही ईशु नु किले चे भीतर चे बेहड़े मां गेहती गेले जको प्रीटोरियुम किहवावे, ते सारी पलटन नु हकारती आले। 17तब वाणे ओनु बैंजनी रंगा चा चोला घलाला ते कांटा चा मुग़ट ग़ूंथती कर ओचे ठोङा उपर मेहला। 18ते ईं केहती कर ओनु नमस्कार करु लाग़ले, “हे यहूदिया चा राजा, नमस्कार।” 19वे ओचे ठोङा उपर कान्‍नै मारते, ते ओचे उपर थूकले, ते गोङे टेकती कर ओनु नमस्कार करते रेहले। 20जब वे ओचा मखोल करती चुकले, तां ओचे उपरु बैंजनी रंगा ची ओढ़णी उतारती कर ओची ओढ़णी घलाली, ते क्रूसा उपर चढ़ाणे वास्ते ब़ाहर गेहती गेले।

ईशु नु क्रूसा उपर चढ़ाले जाणे

(मत्ती 27:32–44; लूका 23:26–43; यूहन्‍ना 19:17–27)

21 # रोमि 16:13 सिकन्दर ते रूफुस चा ब़ा शमौन, हेक कुरेनी शक्स, जको गांवा कनु आवे पलता, उठु निकड़ला, वाणे ओनु बिंगारी मां पकड़ले कि ओचा क्रूस चली चालो। 22वे ईशु नु जको “गुलगुता” नांवा ची जग़हा उपर, जाया मतलब “खोपड़ी ची जग़हा” आणले। 23ओठे ओनु मुर्र मिड़ला आला अंगूरा चा रस पीणे वास्ते ङिला पर ओणे कोनी पीला। 24तब वाणे ओनु क्रूसा उपर चढ़ाले ते ओचे ओढ़णा उपर पर्चीया नाखती कर, कि कानु का मिली, वानु बांटती गेली। 25ते हेक पाहर ङिओ चढ़ती आलता, जिसे बेले वाणे ओनु क्रूसा उपर चढ़ाले, 26ते ओचा दोष-पत्र लिखती कर ओचे उपर लाती ङिला कि, “यहूदिया चा राजा।” 27वाणे ओचे लारे ङोन ङाकु, हेक ओचे सज़्ज़े पासु ते हेक ओचे खब़्ब़े पासु क्रूसा उपर चढ़ाले। 28बल्ति पवित्रशास्त्र चा ओ वचन कि ओ अपराधीया चे लारे गिणला गेला, पूरा हुला।#15:28 कोच्छ हस्तलेखा मां हा वाक्य ना मिली

29 # मरकु 14:58; यूह 2:19 आणे जाणे आले ठोङ हलाती-हलाती कर ओची निन्दा करी पलते, ते ईं किही पलते, “वाह! मन्दरा नु ढावणे आला, ते तीन ङिहां मां बणावणे आला। 30क्रूसा कनु तले उतरती कर आपणे आप नु बचा।”

31येही रीति लारे प्रधान याजक वी शास्त्रीया समेत मखोल करती कर किही पलते, “ऐणे नेरा नु बचाले, ते आपणे आप नु ना बचा सग़ी। 32इस्राएल चा राजा, मसीह, हमा क्रूसा कनु उतरती आओ कि अम्ही ङेखती कर विश्‍वास करु।” ते जको ओचे लारे क्रूसा उपर चढ़ाले गेलते, वे वी ओची निन्दा करी पलते।

ईशु ची मौत

(मत्ती 27:45–56; लूका 23:44–49; यूहन्‍ना 19:28–30)

33ङुपाहरा कनु लाती कर तीजे पाहरा तक सारे देशा मां अन्धारे हुले रेहले। 34तीजे पाहर ईशु ने बङा साङ मारती कर केहले, “इलोई, इलोई लमा शबकतनी?” यानिकि, हे माया नरीकार, हे माया नरीकार, तु मनु कां छोड़ती ङिले?

35जको गोढु भिले हुते, वांचे महु कितना ने ईं सुणती कर केहले, “ङेखा, हा एलिय्याह नु हकारे पला।” 36ते हेके ने द्रोड़ती कर ब़ुड़े नु सिरके मां ब़ोड़ला, ते कान्‍नै उपर मेहलती कर ओनु ब़ुड़ा चूपाला ते केहले, “रुकती जावा, ङेखु एलिय्याह ओनु उतारने वास्ते आवे के ना।”

37बल्ति ईशु ने ऊंची अवाजी मां साङ मारती कर जेन्द छोड़ती ङिली।

38ते मन्दरा चा पड़दा उपर कनु लाती तले तक फड़ीती कर ङोन टुकड़े हुती गेला। 39जको सूबेदार ओचे सामणे भिला हुता, जब ओनु यूं साङ मारती कर जेन्द छोड़ते हुले ङेखले, तां ओणे केहले, “सच्‍चमां हा इन्सान नरीकारा चा पूत हुता!”

40 # लूक 8:2,3 कई असतरीया वी दूर कनु ङेखी पलतीया, वांचे मां मरियम मगदलीनी, छोटे याकूब ते योसेस ची आई मरियम ते सलौमी हुती। 41ते जब ओ गलील मां हुता तां ये ओचे भांसु टुरती पड़तीया, ते ओची सेवा-टहल करतीया रेहतीया। ते नेरीया ब़ोहत सारीया असतरीया वी हुतीया, जको ओचे लारे यरुशलेम मां आलीया हुतीया।

ईशु नु कब्री मां मेहले

(मत्ती 27:57–61; लूका 23:50–56; यूहन्‍ना 19:38–42)

42जिसे बेले आथण हुले तां ऐवास्ते कि तियारी चा ङिओ हुता, जको सब्त चे हेक ङिओ पेहले हुवे वे। 43अरिमतिया चा रेहणे आला यूसुफ आला, जको महासभा चा सदस्य हुता ते आप वी नरीकारा चे राज़ ची बाट ङेखता रेहता। ओ हिम्मत ब़ांथी कर पिलातुस कनु गेला ते ओकनु ईशु ची लाश मांगली। 44पिलातुस नु अचम्भा हुला कि ओ इतनी जल्दी मरती गेला, ते ओणे सूबेदारा नु हकरवाती कर पूछले, “का ओनु मरले आले नु देर हुली?” 45जब ओणे सूबेदारा चे जरिये हाल जाणती गेला, तां लाश यूसुफ नु ङिवाती ङिली। 46तब यूसुफ ने मलमल ची हेक चादर मोल गेहली, ते लाशे नु उतारती कर वे चादरी मां बलेठले, ते हेक कब्री मां जको चट्टान मां खोदली गेलती, मेहले, ते कब्री चे दरवाजे उपर हेक पत्थर रेहड़ती ङिला। 47मरियम मगदलीनी ते योसेस ची आई मरियम ङेखी भिलतीया कि ओ किठे मेहला गेला।

Zur Zeit ausgewählt:

मरकुस 15: ODR

Markierung

Kopieren

Vergleichen