मरकुस 1

यूहन्‍ना बपतिस्मा ङेणे आले चा प्रचार

(मत्ती 3:1–12; लूका 3:1–18; यूहन्‍ना 1:19–28)

1नरीकारा चा पूत ईशु मसीह चे सुसमाचारा ची शुरुआत, 2जिंवे कि यशायाह भविष्यवक्‍ता ची किताबे मां लिखले आले छै,

“ङेख, मैं आपणे दूता नु दुधे आग़ु-आग़ु भेज़ी,

जको दुधे वास्ते मार्ग़ तियार करी।

3बरब्याना मां हेक हकारने आले ची अवाज आली,

‘प्रभु चे वास्ते मार्ग़ तियार करा,

ते ओचे वास्ते सड़का सिधीया करा।’ ”

4यूहन्‍ना आला, जको बरब्याना मां बपतिस्मा ङिता, ते पापा ची माफी वास्ते मन फिराव चे बपतिस्मे चा प्रचार करता। 5सारे यहूदिया क्षेत्र चे ते यरुशलेम शहर चे सब रेहणे आले, निकलती कर यूहन्‍ना चे गोढु गेले, ते आपणे आपणे पापा नु मनती कर यरदन नदी मां ओकनु बपतिस्मा गेहला 6यूहन्‍ना ऊंठा चे माला ची ओढ़णी घालती कर ओ आपणी कड़ी नु चमड़े चा कमरबन्ध ब़ांहली रेहता ते ओ तिङीया ते शहद खाता। 7बल्ति यूहन्‍ना हा प्रचार करता, “माये बाद मां हेक आणे आला छै जको माये कनु महान छै, मैं ऐचे लायक कोनी कि ओचे पग़्ग़ा मां झुकती कर ओचे ब़ूटा चा तणिया खोल सग़े। 8मैं तां तम्हानु पाणीया लारे बपतिस्मा ङिला, ओ तां तम्हानु पवित्र आत्मा लारे बपतिस्मा ङी।”

ईशु चा बपतिस्मा, ते परखले जाणे

(मत्ती 3:13—4:11; लूका 3:21,22; 4:1–13)

9वा ङिहां मां ईशु गलील प्रदेस चे नासरत शहरा कनु आला यरदन नदी मां यूहन्‍ना कनु बपतिस्मा गेहला। 10ईशु पाणीया कनु निकलती कर ब़ाहरु आला, तां तुरन्त ओणे आसमान खुलते ते पवित्र आत्मा नु कबूतरा चे समान आपणे उपर उतरते ङेखले। 11#मत्ती 3:17; 12:18; मरकु 9:7; लूक 3:22ते आसमाना महु हा आकाशवाणी हुली ते केहले, “तु माया प्यारा पूत छी, मैं दुधे कनु ब़ोहत खौश छै।”

12बल्ति पवित्र आत्मा तुरन्त ईशु नु बरब्याना मां गेहती गेला। 13बरब्याना मां चालीस ङिहां तक शैतान ने ओची परीक्षा गेहली, ते ओ जंगली जानवरा चे लारे रेहला, ते स्वर्ग़दूत ओची सेवा करते रेहले।

माछलीया पकड़ने आला नु हकारले

(मत्ती 4:12–22; लूका 4:14,15; 5:1–11)

14यूहन्‍ना चे पकड़वाले जाणे चे बाद मां, बरब्यान जग़हा कनु आती कर ईशु ने गलील प्रदेस मां नरीकारा चे राज़ चा सुसमाचार प्रचार करला, 15#मत्ती 3:2ते ओणे केहले, “समय पूरा हुला, ते नरीकारा चा राज़ गोढु आती गेला, तम्ही आपणे पापा कनु मन फिरावा ते सुसमाचार चे उपर विश्‍वास करा।”

16ईशु ने गलील ची झील चे किनारे जते हुले, शमौन ते ओचे भऊ अन्द्रियास नु झील मां जाल नाखते ङेखले, कांकि वे मछुवारे हुते। 17ईशु ने वानु केहले, “माये भांसु चाह्‍ले आवा, तां मैं तम्हानु नरीकारा चे गोढु लौका नु गेहती आणे आले इन्सान बणावी।” 18वाणे तुरन्त आपणे आपणे जाला नु छोड़ती कर ओचे भांसु टुरती पले।

19कोच्छ आग़ु बधती कर, ओणे जबदी चा पूत याकूब ते ओचा भऊ यूहन्‍ना नु ब़ेड़ी मां जाल सुधारते ङेखले। 20ईशु ने तुरन्त वानु हकारले, वे आपणे ब़ा जबदी नु मजदूरा लारे ब़ेड़ी मां छोड़ती कर ईशु चे भांसु टुरती पले।

ईशु ने अशुद्ध आत्मा आले बन्दे नु ठीक करले

(लूका 4:31–37)

21बल्ति ईशु ते चैले कफरनहूम शहरा मां आले, ते ईशु तुरन्त सब्त चे ङिओ प्राथनाघरा मां जती कर नरीकारा चे वचन कनु उपदेश ङिऊं लाग़ला। 22#मत्ती 7:28,29ते लौक ईशु चे उपदेश कनु हैरान हुती गेले, कांकि ओ वानु शास्त्रीया आलीकर ना, पर अधिकारीया आलीकर उपदेश ङिता।

23ओही बेले, वांचे प्राथनाघरा मां हेक इन्सान हुते, जाये मां हेक अशुद्ध आत्मा हुती। 24ओणे रौल मचाला ते केहले, “हे ईशु नासरी, अम्हानु दुधे लारे का काम ? का तु अम्हानु नाश करु आला? मैं तनु जाणे, तु कूण छी, तु नरीकारा चे पवित्र इन्सान छी!”

25ईशु ने ओनु धमकाती कर केहले, “चोप रेह, ते ओचे महु निकलती जा।” 26तब अशुद्ध आत्मा ओनु मरोड़ती कर ऊंची अवाजी मां रौल मचाती ओचे महु निकलती गेली 27ऐचे उपर सब लौक अचम्भा करते हुले, आपस मां बहस-बाजी करु लाग़ले, “हा का बात छै? हा तां कुई नवां उपदेश छै, ओ अधिकारा लारे अशुद्ध आत्मा नु वी आज्ञा ङिये, ते वे ओची आज्ञा मनी।” 28ते ओचे नां तुरन्त गलील चे आस-पास चे सारे प्रदेस मां फैलती गेले।

ईशु ने बिमारा नु ठीक करले

(मत्ती 8:14–17; लूका 4:38–41)

29ओ तुरन्त प्राथनाघरा महु निकलती कर याकूब ते यूहन्‍ना चे लारे, शमौन ते अन्द्रियास चे घरे आला 30शमौन ची सासु बुखारा लारे ङुखी हुती, ते वाणे तुरन्त विचे बारे मां ईशु नु बावड़ले। 31तब ओणे लारे जती कर विचा हाथ पकड़ती कर विनु उठाणले, ते विचे बुखार उतरती गेले, ते वा वांची सेवा-टहल करु लाग़ली।

32आथण चे बेले जब सूरज ब़ुङती गेला तां लौक सब बिमारा नु ते वानु जाये मां दुष्टात्मा हुतीया, ओचे गोढु गेहती आले। 33सारे शहरा चे लौक दरवाजे उपर भेले हुती गेले। 34ईशु ने घणा नु जको हर-प्रकार ची बिमारी कनु ङुखी हुते, ठीक करले, घणीया सारीया दुष्टात्मा नु काढ़ले, ते दुष्टात्मा नु ब़ोलु कोनी ङिले, कांकि वे ईशु नु पिछाणतीया।

हेकली जग़हा मां ईशु ची प्राथना

(लूका 4:42–44)

35पुरा फुटले ङिओ निकलणे कनु पेहले, ओ उठती कर निकड़ला, ते हेक सुनसान जग़हा मां गेला ते प्राथना करु लाग़ला। 36तब शमौन ते ओचे साथी ओची खोज मां गेले। 37जब ओ मिड़ला, तां ओनु केहले, “सारे लौक तनु सोते फिरे।”

38ईशु ने वानु केहले, “आवा, अम्ही नेरे किठी आस-पास ची बस्तीया मां जऊं, कि मैं ओठे वी प्रचार करे, कांकि मैं ऐवास्ते निकड़ला।” 39#मत्ती 4:23; 9:35तां ओ सारे गलील प्रदेस मां वांचे प्राथनाघरा मां जती कर प्रचार करता ते दुष्टात्मा नु काढ़ता रेहला।

कोहड़ चे रोग़ीया नु शोद्ध करले

(मत्ती 8:1–4; लूका 5:12–16)

40हेक कोहड़ी ओचे गोढु आला, ओचे कनु बिनती करली, ते ओचे सामणे गोङे टेकती कर ओनु केहले, “अगर तु चाहवी तां मनु शोद्ध कर सग़ी।”

41ईशु ने ओचे उपर तरस खाती कर हाथ बढ़ाला, तां ओनु छूले ते केहले, “मैं चाहवे तु शोद्ध हुती जा।” 42ते तुरन्त ओचा कोहड़ जता रेहला, ते ओ शोद्ध हुती गेला।

43तब ईशु ने ओनु चिताती कर तुरन्त विदा करले, 44ते ओनु केहले, “ङेख, कानु कहीं ना किहो, पर जती कर आपणे आप नु याजक नु ङिखाण, ते आपणे शोद्ध हुवणे चे बारे मां जको चढ़ावा मूसा भविष्यवक्‍ता ने ठहराला छै ओ भेंट चढ़ा, कि लौका चे वास्ते ग़वाही हो।” 45पर ओ ब़ाहरु जती कर ये बाते नु बावड़ती ङिले कि ईशु बल्ति खुलती कर शहरा मां कोनी जा सग़ला पर बरब्याना मां रेहला ओठे वी हर जग़हा कनु बन्दी आवी पलती।

Zur Zeit ausgewählt:

मरकुस 1: ODR

Markierung

Kopieren

Vergleichen