التكوين 31
31
يعقوب يهرب من لابان
1و في مرة سمع یعقوب أولاد لابان یقولوا: «هدا یعقوب ما خد كل أملاك أبونا، و مجمع ثروته من حلال أبونا» 2و شاف یعقوب إن وجه لابان متغیر علیه. 3و بعدین ﷲ الحَيّ قال لیعقوب: إرّجع إلى أرضّ أبوك و أجدادك، والى عشیرتك وانا بكون ويّاك. 4قام یعقوب رسل خدمه و عیطوا على راحیل و لیئة و طلبوا منهم یروحوا الحَقّل وین ما یعقوب كان یرعى الغَنَم و المواشي. 5و قال لزوجاته: أنا شایف ان ابوكم ما يعاملني زین زي قبل، و لكن اله آبائي كان ويّايي و بعده ويّايي. 6و هدانتون عارفین إني خدمت ابوكم بكل قوتي. 7و لكن ابوكم غدر بي و غیر رایه عشر مرّات في چيفه یدفع ليي حقي. لكن ﷲ ما سمح ان ابوكم يضرني بشي. 8و إدا ابوكم قال لي ان المنقطین بصیروا معاشك، تولد المواشي منقطین. و إدا قال المخططين بكونوا معاشك، تولد المواشي مخططین. 9وﷲ أخد أملاك ابوكم و عطاني إياهم، في نفس الوقت إلا المواشي كانوا فیه يتكاثروا. 10و أنا شفت حلم: وفي الحلم، رفعت عيوني و شفت كل المواعز والخرفان الدكور یتزاوجوا مع المواشي، وكانو المواعز والخرفان الدكور مخططين و منقطين و فیهم بقع سودة. 11و ملاك ﷲ قال لي في الحلم: يعقوب 12هدانا هني إرفَع عيونك وشوف كل المواعز والخرفان الدكور الا یتزاوج ومع المواشي، المواعز والخرفان الدكور المخططين و المنقطین والا فیهم بقع سودة. لأنّي شفت كل الا سواه فیك لابان. 13أنا اله بیت إیِلَ، مكان ما حطّيت الحجرة و وقفتها زي العمود، و مسحتها بالزیت عشان يكون المكان مقدس و مخصص ليي. و وین ما أخدت على نفسك عهد. یلا الحین قوم واترك هالأرض و روح لأرض نسایبك. 14و راحیل و لیئة قالوا: هدا بعد ظلّ لینا ورث من عند أبونا؟ 15مو هو معاملنا زي الأجانب لأنه أكيد باعنا وضیع كل قرش جاه منك یوم استخدمك و استغلك و كسر ظهرك عشان یزوجنا إيّاك. 16كل الثروة الا اخدها ﷲ من أبونا هي أصلاً لینا و لأولادنا، والحین سوّي زي ما قال ﷲ لك. 17قام يعقوب حمل أولاده و زوجاته على الجمال، 18و مشّى كل مواشيه قدامه و جمع كل أملاكه إلا جمعها في فدّان آرام و توجه إلى بیت أبوه إسحاق في أرضّ كنعان. 19و لابان كان رایح (یقص صوف) الخرفان، و قامت راحیل باقت أصنام أبوها. 20و یعقوب خدع لابان الآرامي و ما قال له إنه بفلح، 21و فلح بكل اغراضه الا يملكها، وطلع مستعجل و عبر النهر بسرعة و توجه جهة جلعاد المنطقة الجبلیة 22و بعد ثلاثه أیّام لابان عرف، ان یعقوب فلّح! 23و قام أخد إیاه نسایبه و راح وراه، واخدوا سبعة أيام لين وصلوا عندهم في منطقة جلعاد، المنطقة الجبلیة. 24وﷲ ظهر للابان الآرامي في حلم في الليل و قال له: ويّاني و اياك تتكلّم ويّا یعقوب لا بخیر ولا بشر. 25و یوم لابان وصل، یعقوب كان قاعد ینصب خیمته عند الجبل، و لابان بعد كان قاعد ینصب خیمته ويّا نسایبه في منطقة جلعاد. 26و قال لابان لیعقوب: هدا وش صار لك وش خلاك تخدعني، و تهج ببناتي كأنهم من السبایا الا یاخدوهم غصب بالسیف؟ 27الاویه فلحت بالسكته، و مكرت بي؟ الاویه ما قلت الي؟ لو قلت لي كنت باودّعك و بنفرح و بنغني بالدف و العود. 28ولا خلیتني ابوس احفادي و بناتي و متصرف ببهامه! 29أنا ترى یطلع بإیدي و اقدر اضركم، لكن إلِه أبوك أمَرني ليلة أمس و قال: «ويّاني و ويّاك تتكلّم ويّا یعقوب لا بخیر ولا بشر.» 30و الحین روحة ورحت لأنك حنيت للروحة إلى بيت أبوك، و لكن الاویه بایق أصنامي؟ 31و قال يعقوب: لأنّي خفت تاخد بناتك مني بالغصب. 32و الحین الا تشوف اصنامك عنده، عقابه بيكون الموت. یلا فتش قدام نسایبنا، فتش في كل أغراضي. و إدا شفت لك شي خده و یعقوب ما كان على علم ان راحیل كانت بایقتنهم. 33ودخل لابان خیمة یعقوب و لیئة و خیمة الجواري ثنتینهم و ما شاف شي. وطلع من خیمة لیئة ودخل خیمة راحیل. 34وكانت راحیل ماخدة الأصنام و خاشتنهم داخل جیوب سرج الجمل و قعدت علیه و قام لابان دور في الخیمة بكبرها و ما شاف شي. 35وقالت راحيل لابوها: ما علیه أبوي لا تعصب علي، إني ترى ماني قادره أوقّف، لأن جایتني الدورة الشهریة. و یوم دور لابان و خلص ما شاف شي. 36و قام هاج یعقوب و عصب، و قامت هدره ويّا لابان: «وش دنبي أنا وفي ویش غلطت ويّاك أنا عشان تلحقني؟ 37هدانت فتشت كل أغراض بیتي، تیلا قول الي إدا شفت شي من أغراضك؟ تیلا اعرضه قدام نسایبي و نسايبك و هم یحكموا بینا. 38صار لي ويّاك عشرین سنة، ويّا عنزاتك و نعجاتك، و إعتنیت بهم، لدرجة ان ولا مره اجهضوا ولا عمري اكلت كبش من أغنامك. 39بس أنا الا كنت احمل نفسي الخسایر ولا عمري جبت لك شي میت منهم، لأنّي تحملت كل الخسایر بنفسي، ولا جبت لك طاري و اعتبرتهم ناقصین من الا لي. وهدا الا أنت بغیته، و مو مهم جیفا نقصوا، سواء كان حیوان إفترسهم والا أحد جا و باقهم، أنا كنت كله احسبهم ناقصين من الا لي، وانا الا كنت اكرف لیل و نهار. 40كان الحر يهلكني في النهار و الثلج في اللیل، و النوم یطیر من عیوني. 41و هالعشرین سنه وانا في بیتك، أربعطعشر سنة منها خدمتك عشان تزوجت بناتك، و ست سنوات عشان غنمك، و غیرت معاشي عشر مرّات! 42و لو ما كان إله أبوي، إله إبراهیم والا یهابه إسحاق كان ويّاي كان طلعت من عندك و ایدي فاضیة. بس ﷲ كان شایف جیفا أنا انذلیت و شقیت، عشان چدي لامك أمس.» 43و قال لابان: البنات بناتي و الأولاد أولادي والغنم غنمي، و كل شي تشوفه عیونك حقي. وش اقدر اسوي في بناتي و أولادهم الحین؟ 44خلاص خلینا نتفق و یصیر بینا عهد الیوّم، و یكون هالشي شهادة بیني و بینك. 45قام یعقوب أخد حجرة و وقفها زي العمود 46و قال یعقوب لنسایبه: جمّعوا حجارة. و قاموا جمّعوا الحجارة و حطوهم فوق بعض وصاروا كومة حجارة و قعدوا یاكلوا فوقها. 47و سمَّى لابان داك المكان یجََرْ سَهْدُوثاَ وَ مَعْناَهاَ: كومة الشهاَدَةِ بلِغَُةِ لاباَنَ الآرامیة، و لكن یعقوب سماها جَلْعِیدَ وَ مَعْناَهاَ: كومة الشهاَدَةِ بلِغَُةِ یعَْقوُبَ العبریة. 48وَ قاَلَ لاباَنُ: و كومة الحجارة هدي صارت شهادة بيني و بينك. عشان چدي سماه جلعید، 49والمكان صار معروف باسم مصفاة و معناه بُرج المراقبة، و لأن لابان قال: ﷲ الحَيّ هو الرقیب بیني و بینك، لما نكون بعاد عن بعض. 50وان عاملت بناتي بسوء و لو تزوجت علیهم، احنا ما ورانا أحد یشهد علینا و یحاسبنا، غیر ﷲ، و ترى ﷲ هو الشّاهِد بیني و بینك. 51شوف كومة الحجر هدي والعمود الا خلیتهم بیني و بینك، 52هالكومة صارت شهادة والعمود صار شهادة بعد. لا أنا بتجاوز كومة هالحجارة عشان أضرك ولا أنت تتجاوز كومة الحجارة ولا العمود عشان تضرني. 53و إلِهَُ إبراهیم وألهِةُ ناحور، وألهِةُ أبوهم، بیحكموا بینا. و قام یعقوب حلف بهيبة إله أبوه إسحاق الا یهابه. 54و قام يعقوب دبح دبیحة للرب فوق الجبل عشان العهد الا صار بینهم، و عزم نسایبه یاكلوا إیاه. و أكلوا و باتوا إیاه على الجبل. 55و یوم جا الصبح قام لابان و بوس احفاده و بناته الثنتین و بارَكهم و قام توجه عشان یرجع بیته.
Zur Zeit ausgewählt:
التكوين 31: QNAV
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Qatifi New Arabic Version © 2024 Strategic Resource Group
