Kisah Para Rasul 21
21
Paulus namin Tirus ma Kaisarea
21:1-16
1Lama makes kam mor mangonbain gerejar na Efesus e, maflolwain mor kabal far nus Kos. Ma ni bobole ne mait nus Rodos, ma mof a ne far kote Patara. 2Na iane, kam msalan kabal sa ma nose ma nti Fenisia. Mpe mfangat kabal a ne ma mti. 3Noak ma kam lolone maflolwain kam mkeban nus Siprus na balisya bayal. Nempa kam maflolwain maloran far Siria ma mti mloi a na kote Tirus, fali kabal ntolar kabanir a na kote ne. 4Na iano kam mlole Yesus Ni manglartar ma mor sir minggu dalam. Ma Ratu Smwangtany nafbotin ber manglartar a ne ma rfalak ber Paulus nema kete nti Yerusalem. 5Lama minggu dalam omp, maloran mamy mpampane. Ne manglartar monuk a ne ror sawnir angkir ror kam far kote burit. Na laran das kam msangitil ma msampayang. 6Mpe matuli kam, ne mfangat kabal ma sir a ne rbali sir far nir dasar.
7Ne maflolwain mof Tirus, tila mait Ptolemais. Na iano mti makmat tomwatar ma ralele Yesus ma mose salam ber sir ma mkoil sir nronram lese. 8Ni bobole ne maflolwain a nbal ma mti mait Kaisarea. Ne mti makmat Filipus ma mamin ni das. Filipus ye mangafwibar Ibar Ngamone nof tomwatar itw ma rfil sir a na Yerusalem.#Kis. 6:5; 8:5 9I anaky batdarar fat ma Ratu nal kuase ber sir ma rafbotin snyurtar nof Ratu. 10Noak ma kam lolone mamin lerar fir a na iane, nabyar sa nof propinsi Yudea nma ngarany Agabus.#Kis. 11:28 11I nma ma nakmat kam ma nal Paulus ni bebebe la nkete limany emany betno nfalak, “Ratu Smwangtany nfalak feti, keta tomwat Yahudyar ma ramin Yerusalem rkete tomwate ma ni bebebe ye farye. Betno ral i ber tomwatar ma to Yahudi sir.” 12Mdengar farane e, maktem tomwatar ma ralele Yesus ma mamin Kaisarea ne mtak desar Paulus ma kete nti Yerusalem.
13Nempa i nfalak, “Kete mtyasing farye, koli myose ma dalangw suse. Yakw ye knwengar motak, ma rkete yakw, nre rfen yakw na Yerusalem fali klwarat Yesus ninr Mangnrur Silai.” 14Kam to mose mteri mal i a mpa to mfalak sasaf. Ma mfalak lan feti, ka weni Ratu nafdiat safe safe monuk ye nlarat Ni mpempeang. 15Kam mamin iane lerar fir a ne, betno masusan mamy kabanir ma mti Yerusalem. 16Ne maktem tomwatar ketnir ma ralele Yesus rof Kaisarea ne mti tomwatar sa ni das. Tomwate ne ngarany Manason, i nof Siprus ma nlarat Yesus dodo lo.
Paulus natungan nor Yakobus
21:17-26
17Noak ma mait Yerusalem, soranyar na iane rlangun kam ror dalmir senange. 18Ni bobole ne maktem Paulus mti makmat Yakobus, ma mangonbain gerejar monuk ma ramin iane nbal. 19Lama Paulus nose salam ber sir e, i nasaur safe-safe monuk ma Ratu nose na ni karyae ne ber tomwatar ma to Yahudi sir. 20Lama rdengar farane, rdangin Ratu. Ma rfalak ber Paulus, “Waingw, mswalan! Tomwat Yahudyar yadin ralele Yesus lo, ma sir ye rlarat dedesar Musa ni faretar. 21Nempa sir rdengar feti ko muftutu tomwat Yahudyar monuk ma ramin nus walyetar nema kete rlarat Musa ni faretar. Ma ko mfwalak a nbal ma kete rsunat angkir ma kete rmorip a rlarat Yahudyar nir adat. 22Ma rdengar feti ko mumin ye lo, mpa tose farpe? 23Ni ngafele e, mlwarat safe ma mfalak ye. Tomwatar fat nof kam ye ryoding ber Ratu lo.#Bil. 6:13-21 24Mpa mor sir far Ratu Ni das silai ma miktem a miflerap tenmir. Ma mwal doit ma mbwayar nir snyompar nema bise ma rfakir ulmir.#21:24 Na Yahudyar nir adat, tomwatar ma ryoding sir ber Ratu lo ka rfakir ulnir Mose farane nema tomwatar monuk rafai feti safe ma rdengar na ko a ne to botuan, fali koko ko a nbal e, mufmpwane Musa ni faretar. 25Ma tomwatar ma to Yahudi sir ma ralele Yesus a ne, kam marengi tetetkar ber sir feti ka kete rane tnyamar ma rloik ber dewayar, kete rane tnyamar ma lolone darnir ma kete rane binatngar ma rmenrak a rfen sir, ma kete ranronr.”#Kis. 15:29
26Ni bobole ne Paulus nor tomwatar fat a ne ma raflerap tenir. Ne i nti Ratu Ni Das Silai ma nafbotin ber mangsompe feti bait lerar fir a nbal betno sir raflerap monuk tenir, nema bise ma leles mpane rloik nir snyompar.
Suldadwar Romar romat Paulus
21:27-36
27Noak ma lerar itw a ne ketla omp, tomwat Yahudyar ketnir ma rof propinsi Asia rkeban Paulus na Ratu Ni Das Silai, mpa sir rajowe tomwat ngayadin ma romat i. 28Ma rafwayak, “Hei tomwat Israelar! Mya ma tsalan! Tomwate ye ma naftutu tomwatar monuk na mpenempen ma rbangal tomwat Yahudyar kit, ma rlangas Musa ni faretar, ma rafbwere Ratu Ni Das Silai. Ma lere ye i nor a nbal tomwatar ma to Yahudi sir rti Ratu Ni Das Silai dalam ma rafaknise ain lelerap ye!” 29Sir rfalak farane fali rsalan Trofimus tomwat Efesus a ne radu Paulus a rmpan na kote Yerusalem, ma rafliak feti Paulus nor i far Ratu Ni Das Silai lo.#Kis. 20:4
30Mpe nuse monuk mayoi mayai, nwayat ma tomwatar rtamyabur ma romat Paulus, ma rakei i rof Ratu Ni Das Silai far burit, ma rfolat monuk ni fofolat finrwar desar. 31Noak ma reng ma rfen i, ibar a ne ti nait komandan feti tomwatar monuk mayoi mayai na Yerusalem. 32Mpe komandan a ne nasnyalik ma nafburat suldadwar ulnir monuk numur nir suldadwar ma rti ain a ne. Noak ma tomwat ngayadin a ne rsalan komandan nor ni suldadwar, to rbabal Paulus lo. 33Ne komandan a ne nti nlosir Paulus ma nomat i, ma nluan ma ral rewar du la rkete i, betno nenrat tomwatar feti tomwate ye ise i, ma ni sal safe. 34Nempa tomwatar ketnir rafwayak farye, ma ketnir a nbal rafwayak farane. Ma rngelir resi mpa komandan to nafai feti safe ma terjadi. Mpe nluan ma ror i far markas. 35Noak ma rait fnite, suldadwar a ne ka rabare Paulus fali tomwatar yadin rasikul sir ma rose ma rbabal i. 36Ma tomwatar ma rlarat i a ne rafwayak, “Tfen i!”
Paulus ntak ma natanuk
21:37-40
37Noak ma rose ma rti markas dalam, Paulus a nfalak ber komandan a ne, “Bise ma kfwalak kabanir sa e?” Ne suldadwar nir ulun a ne nfalak, “Ali ko mufai Yunani liriny e? 38Yakw kufliak feti ko ye tomwat Mesir ma bete ye mose mimiri ma mufla mor mangafene ribun fat far ain letkape.” 39Ne Paulus nfalak, “Yakw ye tomwat Yahudi, kof kote Tarsus. Kote ma namelir na nus Kilikia. Bise mwinrang ma kutanuk kor tomwat ngayadin a ne?”
40Komandan a ne ninrang ma Paulus natanuk. Ne i nti namdir fnite betno nlobik limany ber tomwatar a ne. Noak ma rtatutuk e, natanuk nor Ibrani liriny ber sir.
Zur Zeit ausgewählt:
Kisah Para Rasul 21: YMD
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
