Kisah Para Rasul 12
12
Herodes nluan ma rnau Petrus na sel
12:1-5
1Noak a ne, rai Herodes nose ma nluan tomwatar ma romat tomwatar ketnir ma ralele Yesus ma rsiksa sir. 2I nluan ma rfen Yohanes wainy Yakobus, ror smade. 3Herodes nsalan feti ngrie ne nafsenange tomwat Yahudyar, mpa nluan a nbal ma romat Petrus na Yahudyar nir Ler Silai Roti ma To Ragi.#12:3 Ler roti ma to ragi isiny feti: Lere ma Ratu nalin tomwat Yahudyar ma rmpan kawar rbie rof Mesir. 4I nau Petrus na sel betno nluan klopar fat ma ralikur sir ma rajake i. Nof klopar mpane ne suldadwar fafat. I nose farane fali nmpeang ma nsidang Petrus na tomwat ngayadin noak ma Ler Silai Roti ma To Ragi a ne omp.#Kel. 12:1-27 5Petrus namin sel dalam, nempa soranyar rsampayang dedesar ror dalmir kateman ber i.
Malaekat nalin kalin Petrus nof sel
12:6-19
6Na nronram a ne ral rewe besyar du ma rkete Petrus limnir ror suldadwar du ma rarwa. Ma suldadwar du rajak a na fofolat. Ni bobole e, Herodes nose ma nsidang Petrus na tomwat ngayadin sonirlury. 7Metryat e, Mangnrure Ni malaekat namdir a nlosir Petrus ma snyain idak na sel dalam a ne. Malaekat a ne nawawan Petrus ma npangun i betno nfalak, “Mpwote ko musnyalik!” Mpe nof a ne rewe ne nbie nof limnir. 8Ne malaekat a ne nfalak ber i, “Mkwete fetwalam ma mwolw sabatwemar.” Ne Petrus nose nlarat. Betno malaekat a nfalak, “Mfonak nim rabit melawas ma mlwarat yakw.” 9Mpe Petrus nlarat malaekat a ne far burit. Nempa to nafai feti safe ma malaekat nose ne botuan, i nafliak feti natrufe. 10Sir rlanre mangajak anir du betno rait fofolat besi ma nti kote. Fofolat a ne koko i a ntakbanril, ne radu a rti burit ma rmpan far dalamtene matan. Metryat e, malaekat a ne nti a ntate i.
11Ne Petrus betno nfenai ma nfalak, “Hete! Botuan lo, Ratu nluan malaekat ma nma nalin yakw nof Herodes ni kuase ma ntate yakw nbal nof safe safe monuk ma Yahudyar rmpeang ma diat yakw.”
12Lama Petrus nfenai ngrie ne, i nti Maria ni das. Maria ye Yohanes enany. Yohanes ye ma rtar feti Markus. Na iane tomwatar yadin rabut sir ma rsampayang. 13Lama nait e, ndelak fofolat lury. Ne kawar batar sa ngarany Rode nose ma nbanril fofolat. 14Ne Petrus ntar nof burit, mpa kawar a ne nserap liriny. Nempa i to nbanril fofolat fali nsenang resi ma nafla nbali far dalam, ma nafbotin ber tomwatar monuk feti Petrus namin burit. 15Ne rfalak, “Ali mfukat e!” Nempa nfalak dedesar feti botuan i a ne Petrus. Ne sir rfalak, “Iane ni malaekat!” 16Nempa Petrus ndelak fofolat dedesar. Mpa rti rbanril fofolat a ne ma rsalan i. Sir rampriang desar ma ramngangebab. 17Ne Petrus nau limany na sukany nema ramlin. Mpene nasaur ber sir felany farpe ma ninr Mangnrur Silai nalin i nof sel. Betno nfalak, “Mifbotin ber Yakobus ma ninr soranyar a nbal.” Mpe nti burit ma nal far ain walyete.
18Ni bobolisin e, suldadwar ma rajak a ne mayoi mayai ma raenrat sir feti safe diat Petrus ye. 19Ne Herodes nluan ma ranriak Petrus nempa to rtungan i. Mpa Herodes nenrat nareke suldadwar ma rajake Petrus a ne, nempa to rafai sasaf mpa nluan ma rfen sir. Mpene Herodes nti a ntate propinsi Yudea ma nti Kaisarea ma namin iane.
Herodes nmat
12:20-25
20Rai Herodes narese desar tomwat Tirusar ma Sidonar. Mpa dalmir lese ma rabut sir ma rti rakmat i. Rait e, rti rakmat Blastus baluan ma ralonge dalamy ma ntulung sir. Blastus ye mangonbain silayar sa ma nayatur rai Herodes ni istana. Sir rtak ma rangamon ror rai Herodes, fali sir ral tnyamar rof ni nuse.
21Na ler sa e, Herodes nfonak ni rabit melawas ngafele ma namtoran na rai ni kadere ma natanuk ber sir. 22Lama rdengar ma Herodes natanuk e, rdangin i ma rafwayak, “I ye dewa ma natanuk, ma tomwate tate!” 23Noak a ne nbal Mangnrur Silai Ni malaekat ntef i, fali to nose alang ber Ratu. Mpa nmat e, kekewar rane i.
24Mpe Ratu Ni ngribatnir ntafal ma namelir na mpenempen, ma tomwatar ma ralele Yesus rtafal ma yadin.
25Lama Barnabas ma Saulus rsoru nir karyae e, rbali sir rof Yerusalem far Antiokhia. Ne rti e, ror Yohanes ma rtar feti Markus.
Zur Zeit ausgewählt:
Kisah Para Rasul 12: YMD
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
