Abharuumi 2
2
Nyamuwanga atarisoroora muunu
1Mmbe, awe Omuyawudi weejaasu unu owuramurira abhaanu abhandi bhanu abhakora amangʼana gayo, awe woone utakutura okwibhagira ku-Nyamuwanga! Kutyo owuramurira abhandi, umenye ati, nikwo kutyo owiiramurira omwene, kwa okubha amangʼana amabhiibhi ganu abhakora nigo awe woone owukora. 2Eswe kimenyere ati indamuro ya Nyamuwanga ni ya kimari ku-bhaanu bhanu abhakora amangʼana rwa gayo. 3Awe omuunu unu owuramurira abhaanu abhandi enu awe omwene woone nuukora gayogayo, angu owutoga ati owutura okwiruka indamuro ya Nyamuwanga? 4Nyamuwanga ari na mutima mujomu muno, kaakufwira ekigongo, na asimbiirire muno ku-nsonga yaawo. Nawe awe woori, oweenda okujeera gayo goone kutyo? Utakumenya ati kaakukorera amajomu gaaye, insonga unuge ebhikayo bhyawo? 5Okuriingʼaana na obhukomeeye bhwa omutima gwawo, na okurema kwawo okunuga bhikayo, owiibhiikira ebhirusho ku-rusuku runu Nyamuwanga arikora indamuro yaaye ya obhurengeresi.
6Orusuku ruyo, Nyamuwanga aririya abhaanu wumwiwumwi okuriingʼaana na ebhikorwa bhyebhwe.#2:6 Ringira Ijabhuri 62:12. 7Abhaanu bhanu Nyamuwanga ariyaana obhurame bhunu bhutakuweera, ni bhanu bhakomeeye okukora amajomu, kwa okubha abhaagara okugungibhwa na Nyamuwanga, ekibharo na obhurame bhunu bhutakunyamuka. 8Nawe Nyamuwanga arimarira riisungu ryaye ku-bheemi, bhayo abharema ekimari, mbakora amabhiibhi. 9Abhaanu bhanu abhakora amangʼana amabhiibhi bhoone kutyo, bharinyoora nyanko nene,#2:9 Ringira 2 Abhateesaroonike 1:6-10. ku-Bhayawudi okwamba, na ku-bhaanu bhanu bhatari Bhayawudi. 10Nawe abhaanu bhanu abhakora amangʼana amajomu, Nyamuwanga aribhayaana obhugungyo, ekibharo na omurembe, ku-Bhayawudi okwamba, na ku-bhaanu bhanu bhatari Bhayawudi. 11Nyamuwanga atakusoroora muunu woonewoone.
12Abhaanu bhanu bhatari Bhayawudi bhanu abhakora ebhikayo bhariitwa, raabhé bhakabha bhatakumenya ebhiraagiro bhya Musa. Abhayawudi bhamenyere ebhiraagiro bhiyo, nawe bhakakora ebhikayo, bhariramurirwa okuriingʼaana na ebhiraagiro bhiyo. 13Bhariramurirwa, kwa okubha okuungwa ebhiraagiro era kutakukora Nyamuwanga abharire omuunu obhurengeresi, tari kaabharira obhurengeresi unu kaakora kutyo ebhiraagiro ebhyenda. 14Bhanu bhatari Bhayawudi, bhatakumenya ebhiraagiro bhiyo. Nawe bhakakora amajomu okuriingʼaana na obhwiganiirisha bhwebhwe, okukora kutyo, abhabha mbakora kutyo ebhiraagiro ebhiragirira. Na kuyo okweresha ati bhamenyere okukora ganu ageendwa. 15Ebhikorwa bhyebhwe ebhyeresha ati kinu ekyendwa na ebhiraagiro, kikaamirwe mu-mitima gyebhwe. Na emitima gyebhwe egibhasitaakya kw-ibhaga erindi, na kw-ibhaga erindi ngibheeresha ati bhatari na kikayo. 16Nikwo kutyo iribha ku-rusuku rwa indamuro, bhunu Nyamuwanga ariramurira obhwiganiirisha bhwa abhaanu bhunu bhwiyibhisire, okuturira ku-Kiriisitu Yeesu, okuriingʼaana na Amangʼana Amajomu ganu eniraasha.
Abhayawudi na ekiraagiro kya insaaro
17Awe owiibhirikira ati uri Muyawudi. Owiisiga okunyoora obhurengeresi okuturira ku-bhugwati bhwa ebhiraagiro bhya Musa. Na owiikumangya ati uri muunu wa Nyamuwanga. 18Owiirora ati umenyere amangʼana ganu Nyamuwanga keenda ukore, na umenyere okukora amajomu kwa okubha wiiyigisiibhwe ebhiraagiro bhyaye. 19Owiirora ati oweendwa utangashe abhaanu bhanu bhatari Bhayawudi, rwa omuunu unu kaatangasha abhawofu, amwi ati rwa intara inu eyimirikira abhaanu bhanu bhari mu-kisuute.#2:19 Ringira Isaaya 42:6, 49:6, 60:3. 20Owiirora ati uri mwiyigisha wa abhaana, na abhaanu bhanu bhatakumenya ekimari kya Nyamuwanga, kwa okubha ebhiraagiro ebhikukora ubhe na obhwenge bhwone kutyo na umenye ekimari. 21Kubhaki awe owiiyigisha abhaanu abhandi enu awe omwene utakwenda okwiyigira? Owuraasisha abhandi ati bhasige okwibha, kubhaki awe omwene owiibha? 22Awe owiiyigisha abhaanu ati bhasige okutaara ameega, ndora awe omwene owutaara ameega? Awe owubhiiyirirwa ebhisusano bhya emisambwa, kubhaki awe omwene owiibha ebhiinu okusooka mu-maramisho ga ebhisusano bhiyo? 23Awe owiikumangya ati umenyere ebhiraagiro bhya Nyamuwanga, nawe utakukora kutyo ebhiraagiro ebhyenda, na kutyo okweresha ati utakumuyaana ekibharo, na owumujeera. 24Ku-nsonga iyo ni rwa kutyo Amakaamo Amataakatiifu agaaika ati, “Riisiina rya Nyamuwanga erifumwa na abhaanu bhanu bhatari Bhayawudi ku-nsonga ya ebhikorwa ebhibhiibhi bhinu omukora.”#2:24 Ringira Isaaya 52:5; Ejekiyeeri 36:20, 22.
25Owutura okwiyeema ati usaarirwe, raabhe owukora kutyo ebhiraagiro ebhyenda. Nawe raabhe utakukora kutyo ebhiraagiro ebhyenda, okusaarwa kwawo kutari na bhwera, na uri rwa omuunu unu atasaarirwe era. 26Mmbe raabhe omuunu unu atasaarirwe akakora kutyo ebhiraagiro ebhyenda, Nyamuwanga kaamurora rwa omuunu unu asaarirwe. 27Abhaanu bhanu bhatari Bhayawudi bhatakusaarwa bhusimukwa, nawe raabhe abhakora rwa kutyo ebhiraagiro ebhyenda, abhaaja okukuramurira awe unu usaarirwe, na umenyere ebhiraagiro, nawe utakukora kutyo ebhyenda. 28Mmbe mwikare mumenyere ati, omuunu atakubha Muyawudi ku-mangʼana era, na atakubha Muyawudi ati kwa okubha asaarirwe. 29Omuyawudi ni unu koongwa Nyamuwanga okusooka mu-mutima gwaye. Na insaaro inu eyeendwa itari kugwata bhiraagiro bhya Musa, ni inu eyikorwa na Mwoyo Omutaakatiifu mu-mutima gwa omuunu. Omuunu rwa uyo, atakukumangibhwa na bhaanu, tari kaakumangibhwa na Nyamuwanga omwene.
© 2023, Wycliffe Bible Translators, Inc. All rights reserved