Htû̌sò̌htò̌ 75
75
Cǒmara mî̌ pwa̤ma̤tôma̤bǎ ta̤.
Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû nutôpwa̤ aya. Dě bǎ sǎwǐ sô̌sô̌kû̌ ma̤pî̌kè tǎ̤mǎ̤ ta̤sǎwǐ nutôshǒ. Hǒomî̌ Pha Asa ata̤sǎwǐ dě Hebrǔyô̤̌nu, a kaǎ ta̤sǎwǐnu kû̌ Masakǐla ta̤sǎwǐ dě ta̤sǎwǐ hǒtôshǒ mî̌ a ǐ kò ta̤sî̌yaphlôphǎ.
1Ǒ Cǒmaradû̌, pa hî̌bwǐhî̌sîrî na.
Na ô̌phǔ kû̌ pa akhû̌akhî, pa hî̌bwǐhî̌sîrî na.
Kòyò shôbǐǐlṳ̌ bòkè na ta̤ma̤cû̌klǐkǐya.
2Cǒmara hî̌ kû̌, “He rû̌htò̌ shěkhǎ dǒ he gǔ ma̤tôma̤bǎ ta̤ aya.
3“Bǎ hǎkhû̌ guyṳ̌ akhanu bǎbǎ, kòyò kû̌ ta̤phû̌ta̤li̤ ô̌ dǒ lû̌lô̤ pṳ̂̌ tôcǒ gònò̤̌gòglè bò bǎbǎ, he ma̤tònò ma̤wô̌ tû̌ akòshî̌ pě.
4“He hî̌ kòyò dǒ a bè̌dû̌bè̌pwǎ̤ anǎ̤ tokhlǒ kû̌, ‘bè̌dû̌bè̌pwǎ̤ tǎ̤ sînǎ̤ mǎ̤.’
“He hî̌ pô̤̌ kòyòphû̌mò̤̌ sîtokhlǒ kû̌, ‘phî̌htò̌yô̤̌ tǎ̤ sînǎ̤ tǎ̤mǎ̤.
5“‘Hî̌bǎ htò̌mǒhtò̌phô̌ pe tǎ̤ sîyô̤̌ tǎ̤mǎ̤.
“‘Bè̌dû̌bè̌htò̌yô̤̌ pe tǎ̤ sînǎ̤ mǎ̤.’”
6Ta̤bè̌dû̌bè̌htò̌yô̤̌ kòyò nu a ô̌ dǒ lṳmṳ̌htò̌ tôkhô hè mè̤̌ tô̤̌.
Dǒ lṳmṳ̌lò̤ tôkhô mè̤̌ tô̤̌tô̤̌, dǒ gǎshashigǎ tôkhô mî̌ tô̤̌tô̤̌.
7Pwa̤ma̤tôma̤bǎ ta̤ mî̌ mè̤̌tǒ̤꤮ pwǎ Cǒmaradû̌.
A bè̌lò̤kè tôpwa̤ pě.
A bè̌htò̌yô̤̌lû̌ tôpwa̤ pě.
8Cǒmara tûjû̌pwa̤ pṳ̂̌měǐ shiba dǒ a amè̤̌ ta̤cî̌htò̌ lǒ̤bò kòyòphû̌mò̤̌ ashiba.
Shiba numî̌ a ô̌be kû̌ shisǐyô̤̌ dǒ amè̤̌ ata̤sǎphlǒdû̌ li̤pi̤sǐ.
A lò̌lò̤ dě lǒ̤꤮ bò kòyòphû̌mò̤̌ tokhlǒ ô lô̌khô.
Asî ôbòmǔtegle.
9He dě, he gǔ shôbǐǐlṳ̌ sělěpô̤̌ Cǒmara ma̤hto ta̤ nutokhlǒ tûjû̌pwa̤.
He gǔ sǎwǐhtûsò̌htò̌ Phayakò a Cǒmara.
10Cǒmaradû̌ hî̌ kû̌, “He gǔ phǐtephekèbò kòyòphû̌mò̤̌ nutokhlǒ ata̤shû̌ta̤sho.
“Kòyòcǒkòyòtè̤ ata̤shû̌ta̤sho shû̌htò̌shohtò̌ pě.”
Zur Zeit ausgewählt:
Htû̌sò̌htò̌ 75: KXF
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Wycliffe USA