Htû̌sò̌htò̌ 28
28
Ta̤kwicaba dǒ lǎ̤ma̤jè̌ aya
Khwǐdawi̤ ata̤sǎwǐ
1Ǒ Cǒmara tûjû̌pwa̤, he lǒ̤dû̌, he kwisǎyṳhtò̌ na.
Jî̌ koo tǎ̤ na nò̌ku mǎ̤.
Na kè̌ dò̌tûklû̌ mî̌, he sô̌sô̌kè kû̌ kòyò lò̤tě̤nṳ̌ dǒ lṳ̌gǎnǎdo nu.#Htû̌sò̌htò̌ 30:3, 143:7
2Bǎ he yṳ̂̌htò̌tô he cǔde dǒ na gûlǎ̤htò̌yô̤̌lǒ plò̌shǐ akhanu, ganǎ̤de he kwisǎyṳhtò̌ na ta̤ma̤jè̌ nu.
3Cî̌htò̌ sada tǎ̤ he kû̌ kòyòkhuhe, kòyò phû̌mò̤̌shǐhtô, kòyò sǎphlǒ phû̌mò̤̌shǐhtô dǒ a jî̌hî̌bǎmô̤hî̌bǎwô̌ shǔ jò ahî̌phòkòshǐ nutokhlǒ tǎ̤ mǎ̤.#Htû̌sò̌htò̌ 26:9
4Ma̤ geshî̌shu sô̌ asî lǐ̤ pô̤̌ agwǎ kû̌ asî ma̤ta̤ kû̌ asî ma̤ ta̤phû̌mò̤̌shǐhtô nutokhlǒ.
Ma̤ geshî̌shu sô̌ asî lǐ̤ pô̤̌ acǔde ma̤ ta̤nu.
Asî ma̤htota̤nu ǐ tîkhî sô̌ asî lǐ̤ pô̤̌ agwǎ kû̌ asînu.#Htû̌sò̌htò̌ 62:12; Tîmôte ginǐ̤bǎ tôbǎ 4:14; Ta̤dǔlè̌lṳ̌htò̌ 18:6, 22:12
5Asî sî̌yatě̤mè̤bò Cǒmara tûjû̌pwa̤ ata̤ma̤ kû̌ acǔde ata̤ma̤ nutokhlǒ tô̤̌.#Yashǎya 5:12
Pô̤̌nudě Cǒmara tûjû̌pwa̤ gǔ cî̌htò̌ asî, a gǔ ma̤pî̌kè bò asî tûjû̌pwa̤.
6Cǒmara tûjû̌pwa̤ ganǎ̤de he kwihtò̌ ta̤ma̤jè̌ akhû̌akhî, htû̌sò̌htò̌ a.
7Cǒmara tûjû̌pwa̤ mî̌ hekhû̌heǎ, helǎ̤ taka.
He nǎla̤ǐ pwǎtǒ̤ a nô̤̌.
A ma̤jè̌ he dě he sǎlě̤sǎlò̤.
He gǔ htû̌sò̌ hî̌bwǐsîrî a kû̌ lî̤hǎwô.#Htû̌sò̌htò̌ 18:2, 59:17, 69:30
8Cǒmara tûjû̌pwa̤ mî̌ ta̤khû̌ta̤ǎ dǒ a kòyò tokhlǒ aya.
A takabǐnṳ̌, a ma̤hǎplǎgeǐ akhwǐ dǒ a rû̌htò̌.#Htû̌sò̌htò̌ 20:6
9Ma̤hǎplǎge na kòyò, ǐshowî̤ǐ pû na û̌tě̤û̌ca.
Htû tûû̌ pwa̤kè̌pǒ̤ asî sô̌sô̌kû̌ kòyò kè̌ sû̌phû̌ tôpwa̤ nu, kè̌ǐ takabǐwô̌ pû asî tûjû̌pwa̤ nî̌.#Khwǐ awǐlǒ tôbǎ 8:51; Htû̌sò̌htò̌ 80:1; Yashǎya 40:11
Zur Zeit ausgewählt:
Htû̌sò̌htò̌ 28: KXF
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Wycliffe USA