Aba Vatowo 15
15
Yaubada ikaanasíuna Eberam yaina goi tetelina
1E amo dogoiyadi sikavava, Eberam ikalayáusa go, ina kalayausayana goi Yauwe ina livala ima idigo kana,
‘Eberam, taabu kuumatōita. Yau am lowo bei amatakavatem be nakae am tovaiwówana, e am vaiwówana gagaina toina bei avinim.’
2Go kina Eberamyana idigo kana,
‘Yauwe guna Tomoya, yau bei geya natugumo akámasa go! Tauna kaga ana dedevina neta kónana kuvinigu? Yau guna katumapu moe guna pákwana Eliyesa#15:2 Eliyesa: Ame youyana ana yagoina moe guna Yaubada moe vaita. guma Damasiko.’
3Tuwaina Eberamyana kana,
‘Yau geya tayaamo boda kuvinigu, tauna kunōve. Tutayana akámasa, guna katumapuyana moe koroto guna pákwana, e amo tauyana konagu madabokidi bei ikabidi.’
4E moeko goi kina Yauweyana ina livala aiyuwoina ina Eberam yaina idigo kana,
‘Amo tauyana bei geya im katumapu geya, go sem kom natum toinim wowom goi bei isowóduwo, e moe tauyana bei im katumapu.’
5E tuwo Eberam ikabi ivakede sisowóduwo moetala goi, idigo kana,
‘Eberam, kwandolāga yábana kugīte be utuna kwatuyaivīdi. Aa, neta itoboinem kwatuyaividi!’
Tuwo ikatótula idigo kana,
‘E im boda adi badabada bei nakae.’#Roma 4:18; Iberiu 11:12.
6Eberam inumisa Yauwe yaina, e ina numisayana Yauwe igite, ikamoitamoe bego kina Eberamyana moe tokibóbwata.#Roma 4:3,9,22; Galetiya 3:6; Yemesa 2:23.
7E aiyuwoina Yauwe idigo kana,
‘Yau Yauwe, boi im kasa Ura Babiloniya sinaena akabim amem go, poyapoya ame bei avinim im kaba lovina.’
8Go kina Eberam idigo kana,
‘Go Yauwe guna Tomoya, manakaegu bei ayagoi poyapoya ame moitamo yau toinigu guna poyapoya?’
9E Yauwe idigo kana,
‘Kūna bulumakau bovavina tayamo, goti bovavina tayamo, sipi bolamo tayamo, tamo tamo adi tala aito, bolitutu be nakae bunabuna manuwoyaula kwabīdi kumēdi.’
10Tuwo moitamo ina yoguyoguyadi ikabidi imedi Yauwe yaina go, ikaumatedi. Ikaumatedi ikavava, iboboyuwedi, dadava dadava iyatoidi. Ago mánuwo geya iboboidita. 11Iyatoidi ikavava, mánuwo gagaidi sisou sima bego yoguyoguyadi sakavaidi sikabidi sikanidi go, kina Eberam ivatapiyedi.
12E níyala isousou go, Eberam wowona ikamou imasisi, ikanamatáiya. E kokonótuya gagaina isowóduwo ivatum, tauna imatoita gagaina. 13E Yauwe ikatuwoini idigo kana,
‘Eberam, ame kuyagoidōko: Tubumowo bei ituli ta boda idi poyapoya goi simalatonikasa. Ago niga kidi toni kasa bei tubumowoyadi sipakoidi, e tala ana badabada 400 goi siyogedeegededi.#Tateta 1:1-14; Guinuwa 7:6. 14Ago amo bodayadi siipakoidi bei atakinoidi liuna manuna. Atakinoidi ikavava, tubumowoyadi bei sisowóduwo go, tutayana asayana sikalave, kónana badabadaidi bei sikabidi sinavedi.#Tateta 12:40-41; Guinuwa 7:7. 15E kom go bei kwaitomoya toina namliyeta baige kukámasa, e kuna tamam be tubumowo yaidi goi go, mam tuboina kukámasa, e tomota sivaliwogem. 16E kidi go im bodaoyadi, e tala 400 sikavava, bei sikaluvilamna sima ameko goi go, mainao sieogaoga ituli ta kasa goi. Moitamo. Kidi Emori tubunao ameko goi sikaaiyaka ana kadókana idi goyo nakae itoboinedi adi liuna sibabane namliyeta bei avatapiyedi.’
17E níyala isaliu, e bogina ikamamaníwana go, Eberam ikandobala igite vaega tayamo isowóduwo. Vaegayana tobuna goi aubowo itukotuko be nakae dúgala ininínima, e yoguyogu boboyuwoidi talaidi nauyayanaidi goi sinonoina. 18E amo maliyalinayana goi Yauwe ikanasíuna Eberam yaina idigo kana,
‘Eberam, akatótula bego im boda poyapoya ame bei avinidi. Poyapoyayana ana túwana ame nakae: Itipita ina sákala gagaina Yuparetisi.#Aba Vatowo 12:7, 13:15, 17:8, 24:7; Yoyowo 34:2; Atukeda 34:4; Guinuwa 7:5. 19Keini tubunao idi poyapoya, Kanisi tubunao idi poyapoya, Kadamoni tubunao idi poyapoya, 20Eta tubunao idi poyapoya, Perisi tubunao idi poyapoya, todukeketayao idi poyapoya, 21Emori tubunao idi poyapoya, Kenani tubunao idi poyapoya, Giragasi tubunao idi poyapoya be nakae Iyebusi tubunao idi poyapoya.’
Zur Zeit ausgewählt:
Aba Vatowo 15: GVS
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2019, Wycliffe Bible Translators, Inc. All rights reserved.
