मत्ती 23

कपटी के शिक्षाई केआं समोझि बिशुण

मरकुस 12:38-40; लूका 20:45-47

1तोउं यीशु हुसुड़े जे त अपु चेली जे बोलु, 2“शुणे, मूसा दुतो नियमे बारे धर्मशास्त्री त फरीसी जरूर बोडे पण्डित बण बिशो असे। 3तोउं त से तुसी जे कुछ बि बोलियेल से करुण त मनुण, पर तेन्के ईं कम न करुण, किस कि से बोते त जरूर, पर अपफ कुछ ना कते। 4से गरकु भरोठु ईं नियम कानुन मेह्‍णु के पिठ छते, जे उछिन्तु ई नउ। पर तस मनुण जे से अपु अंगुल बि हिलाण न चहन्ते। 5से जे सोब कम कते, से सद मेह्‍णु हरालण जे कते। से परमेश्वरे वचन लिखो जंतर बोडु कते त अपु झिणि के झलर लम्मा बड़ान्ते।#मत्ती 6:1 6धाम अन्तर से खरे खरे जगाह त अराधनालय अन्तर बिशुण जे अब्बल अब्बल जगाह तोपते। 7बाजार अन्तर सोबी केआं ‘नमस्ते जी’ शुणुण त मेह्‍णु अन्तर ‘गुरुजी’ बोलाण तेन्हि खरु लगतु। 8पर तुसी ‘गुरुजी’ न बोलाण, किस कि तुं यके गुरु असा, होर तुस सोब यकी होरी भाई भो। 9धरती पुठ केसे जे ‘बोउए’ दर्जा ना देण, किस कि तुं यके बोउ असा, जे स्वर्ग अन्तर असा। 10होर केसे जे अपु ‘मुखिया’ दर्जा ना देण, किस कि तुं यके मुखिया असा, ‘मसीह’। 11से तुं सेवक बणे, जे तुसी अन्तर बोडा त खास असा।#मत्ती 20:26,27; मरकुस 9:35; 10:43,44; लूका 22:26 12जे अपफ बोडा बणान्ता: से घटाई घेन्ता। होर जे कोउं अपफ घटान्‍ता, से बोडा करिन्ता।”#लूका 14:11; 18:14

फरीसी पुठ दोष लाण

लूका 11:37-54

13तोउं यीशु बोलु, “ए कपटी धर्मशास्त्री त फरीसीओ, तुं खेया खाट भोई घेन्ति! तुस मेह्‍णु जे स्वर्गे बत बन्न कते। न त तुस अपफ घेन्ते, होर ना तुस घेणे बाड़ी अन्तर घेण देन्ते।”

14“[ए कपटी धर्मशास्त्री त फरीसीओ, तुं खेया खाट भोई घेन्ति! तुस विधवाई के गी लूट छते, पर हरालण जे चेरे तकर प्रार्थना कते। परमेश्वर सोबी केआं ज्यादा सज्जा तुसी देन्ता।]”

15“ए कपटी धर्मशास्त्री त फरीसीओ, तुं खेया खाट भोई घेन्ति! तुस यक मेह्‍णु अपु कना खरकाण जे तीं हितिन्‍ते।#23:15 मुल भाषा अन्तर इठि “फाट त दरेउ नश घेन्ते” लिखो असु। जिखेईं से तुं कना खिरक घेन्ता त तेस तुस अपफ केआं बि दुगुणा नर्के लेएक बणाई छते।”

16“ए अन्हे बथ हरालणे बाड़िओ, तुं खेया खाट भोई घेन्ति! जे बोते कि देहरे सोहो करियाल त कुछ न भुन्तु। पर जे कोउं देहेर अन्तर लगो सुन्ने सोहो करियाल त से तेस जोई बन्हि घेन्ता। 17अरे मुर्खो त अन्हेओ! कोउं बोडा असा; सुन्ना या देहेर जेसे बेलि सुन्ना शुचा त खास बणता? 18होर तुस फिर बोते कि जे कोउं कुण्डे सोहो करियाल त कुछ न भुन्तु, पर जे कुण्ड पुठ भकत चढ़ो चीजे सोहो करियाल त से बन्हि घेन्ता। 19ए अन्हेओ! कोउं बोडा असा; भकत चढ़ो चीजे या कुण्ड, जेसे बेलि भकत चढ़ो चीज शुचा त खास बणती? 20तोउं त जे कुण्डे सोहो खांता, से तसे बि सोहो खांता जे तेस पुठ भकत चढ़ो भुन्तु। 21होर जे देहरे सोहो खांता, से ना सद तेस देहरे बल्कि तेस अन्तर बिशो परमेश्वरे बि सोहो खांता। 22त जे स्वर्गे सोहो खांता, से परमेश्वरे सिंहासने त तेस पुठ बिशो तसे बि सोहो खांता।”#मत्ती 5:34

23“ए कपटी धर्मशास्त्री त फरीसीओ, तुं खेया खाट भोई घेन्ति! तुस पुदिना, सौंफे त जीरे दसवाँ हेस्सा त परमेश्वरे नओं पुठ देन्ते, पर नियमे सुआ जरूरी बोकी के ख्याल ना रखते। तुसी न्याय, दाह त विश्वास करण छड़ दुतो असा। तुसी एन्हि बजन छड़णे तेन्हि करणे जरूरत थी। 24ए अन्हे बथ हरालणे बाड़िओ! तुस माछि त ताल कइ किढ़ छते, पर ऊंट निगल छते!”

25“ए कपटी धर्मशास्त्री त फरीसीओ, तुं खेया खाट भोई घेन्ति! तुस कटोर, मंगाई बाहरीआ त मजते, पर तेस अन्तर लुटो त लालच बइ कमाओ खांजे भरते। 26ए अन्हे फरीसीओ! पेहले कटोर त मंगाई अन्तरा माज कइ साफ करे, तोउं बाहर बि से साफ भोई घेन्ते।”

27“ए कपटी धर्मशास्त्री त फरीसीओ, तुं खेया खाट भोई घेन्ति! तुस तेन्हि कब्री के ईं असे जेन्हि पुठ चूना लोओ असा, होर जे पुठा हेरण त अब्बल लगते। पर अन्तर मरो मेह्‍णु के हलोटे त हर किस्मी गन्दगी भरिए भुन्ति। 28तिहांणि तुस बि बाहरीआ धर्मी केते, पर तुं अन्तर कपट त अधर्म भरिए असा।”

29“ए कपटी धर्मशास्त्री त फरीसीओ, तुं खेया खाट भोई घेन्ति! तुस भविष्य वक्ती के कब्र बणान्ते त धर्मी के कब्र सजान्‍ते। 30तोउं तुस ईं बोते, ‘अगर अस अपु बाव-दादुए टेम भुन्तेथ त भविष्य वक्ती मरण अन्तर तेन्के साथ ना देन्तेथ।’ 31त तुस अपफ अपु बारे उगाही देण लगो असे कि तुस भविष्य वक्ती मरणे बाड़ी के औलाद भो। 32खरु असु। तोउं तुसी अपु बाव दादु पापी के घड़ा पूरा भर छड़े।”

33“ए जहरिले कीड़ी के गभुरुओ! तुस नर्के सज्जा केआं कीं बचते?#मत्ती 3:7; 12:34; लूका 3:7 34हेरे, अउं तुसी केईं भविष्य वक्ती, ज्ञानी मेह्‍णु त सही बोक शिचालणे बाड़े शास्त्री लंघान्ता, त तुस तेन्हि बिचा आधी मार छते, आधी क्रूस पुठ ढनान्ते त आधी अराधनालय अन्तर चाबुके बइ मडवान्ते त शेहर शेहर दौड़ान्‍ते। 35तोउं सृष्टि शुरुवात केआं अभेईं तकर जत बि धर्मी मेह्‍णु के लहु धरती पुठ बोहिए असु, से सोबी के हिसाब तुं मगिर लगियेल। होर सोबी केआं पेहला मारो हाबिल#शुरुवात 4:8 केआं नी कइ अखिर अन्तर मरो बिरिक्याहे कुआ जकराये#2 इति 24:21 तकर, जे तुसी देहेर कुण्ड बुच मार छड़ा, एन्हि सोबी के सज्जा तुसी मेती। 36अउं तुसी जे बोता कि ई सोब बोकी हिसाब इस जमाने मेह्‍णु देण एन्ता।”

यीशु यरुशलेमे मेह्‍णु जे रोलुण

लूका 13:34-35

37“ए यरुशलेम शेहरे मेह्‍णुओ, ए यरुशलेम शेहरे मेह्‍णुओ! तुस, जे भविष्य वक्ते मार छते, होर जे बि मेईं तुसी केईं लंघा, तेन्हि मरण तकर घोड़िआन्ते। मेईं कत लिंगि चहु कि जीं कुकिड़ अपु कुकिड़ियांचु किठेर कइ अपु पंखोड़ पड्डे रखती, तिहांणि अउं बि तुसी किठे कर छउं। पर तुसी न मनी। 38त अब तुसे जाणे, त तुं कम जाणे। 39किस कि अउं तुसी जे बोता कि अब जपल तकर तुस न बोलियेल कि

‘धन्य असा से, जे प्रभु नओं जोई एन्ता’#छुआंरी 118:26

तोउं तकर तुस मोउं न हेर बटते।”

Zur Zeit ausgewählt:

मत्ती 23: pgg

Markierung

Kopieren

Vergleichen