२ कोरेन्ठि 2
2
1मसॆ आन्ना फेरि डुखा आलिर कामानुङ्न काङा आक्कुबि डाब्मा मामिङ्ङा। 2मान्ठाभनॆ काङॆ आन्ना निवाँ टुग्मिडानि हाङ्ग, आसॆ चाइ काङा चेन्चामिङॆ? ऎॽवाचि ग कानुङ् निवाँ टुक्खॆडामि। 3आक्कुबि डाब्ङार आसॆ काङा हाङ्हाङ् मुमा लॆःॽङामि। खोचिबाङ्न निवाँ टुक्मॆ खानावाँ आङ्मा आसिॽल कामानुङ्न काङॆ आन्ना आक्क साब्चिरा साप्हाङ्सानि, मान्ठाभनॆ काङा हाङ्हाङ् मिनुॽङार आन्नास हाङ्हाङ् मिनुकानि लोमॆ कॆ वाप्सिम्पा लॆटुङ। 4मान्ठाभनॆ काङॆ आक्क साब्चिरा निवाँबि ढ्या डुखा मिन्से डिरिक् मिॽवा ठॆःक्से साप्मिम्पा लॆटुङ। आक्क साब्चिरा कॆ आन्ना निवाँ टुक्मिॽमाम् लागि हॆॽनॆ, टर कॆ आन्ना ऎॽवा नाम्नाम् पिसिकानि लोमॆ वाबाम्नॆ कामानुङ् साप्मिम्पा लॆटुङ्।
हिङ्वा याॽमिमि हिङ्वा यङ्निमॆ खानावाँ
5आसॆ चाइ याॽमि निवाँ टुग्मिडु, खोसॆ काङा टेः हॆॽनॆ, टर आक्कबाङ्स डिरिक् आन्ना चोब्न निवाँ टुक्मिडानि। आन्ना याॽलऎबाङ्स एट्टान निवाँ टुक्मिॽमाम् लागि काङॆ ग लोमिम्पा हॆॽनॆ। 6आक्रक्मा याॽमि आन्ना डिरिक्ऎ पिॽमिम्पा डान्डान उम् लागि खेकु। 7ह मसॆ आन्नॆ खो यङ्निटाम्नॆ हाङ् निवाँबि काम्नि मिट्टाम्नॆ, हॆॽनॆहाङ्ग खो एट्टान निवाँ टुक्टिखॆ हाङ् चोब्न खानावाँ याइकु। 8मसॆ कॆ आन्ना लोकानि, होइखेपा सङ्क खो सक्पि आन्नॆ एट्टान नाम्नाम् पिसिटाम्नॆ। 9आन्नॆ काङॆ लोमिम्पा ऎॽवाकॆ खेमुकानिहा कामानुङ् वाब्माम् लागिॽन आक्क साब्चिरा साब्डुङॆ यो। 10आन्नॆ यङ्निडाम्निहा याॽमिचि काङॆ स यङ्निकुङ्चि। ऎॽवाचि काङॆ यङ्निमा लॆःॽमि हाङ्ग, आन्नामि लागिॽन खिरिस्ट येसुमि ङारिङ्पि यङ्निइट्टुङ्चि। 11गरहाङ् साइटानऎ कानि काइसॆ योम्पक्बि आलाम्ढुमिट्टिर कामानुङ् काङॆ ग लॆटुङ्, मान्ठाभनॆ आक्कसॆ मान्टहाङ् बङ्चाकि लोमॆ काङ्कॆ लेकुङ्का।
पावल टोरोआस हाटाबि
12काङा टोरोआसबि खिरिस्टमि नुऎ खानावाँ खेम्मिस्सि टामार, पारभुऎन काङाम् लागि योम्पक मुमॆ लाम्फु टङ्पिॽमिम्पा लॆटिङ।#सॆःक्ढुङ्पा २०:१ 13टर आक्कुबि काङाम् नुसा टिटास आचुब्मार आन्नामि बारेबि काङा सान्टि मामिङ्ङा, मसॆ काङा खोचिनुङ् खाइटिङ्यो कामानुङ् माकॆडोनिया खारिङ।
खिरिस्टबि चोब्न खानावाँ हेचाइ
14टर निवाँहाङ् ओहाक् पिकुङ्, खोसॆ हानाम्स कानि खिरिस्टमि हेचाइमॆ लाम्फुबि लाम्डुमिडि। हाङ् खिरिस्टमि निवाँ चोब्ठाल फुबॽमॆ योम्पक्पि टिडि। 15मान्ठाभनॆ कानि चाइ निवाँहाङ्बि हिङ्ढाङ्पाचिमि हाङ् लुक्खॆॽमॆ लाम् टिङ्खुबाचिमि लुम्पि स खिरिस्टमि काम्नुऎ खानावाँ खेम्मिखुबाचि यो। 16हाङ् सिखॆखुबा याॽमिमि लागि काइसॆ हाङ् हिङ्चाखुबामि लागि हिङ्खामामि काम्नुऎ खानावाँ यो ग। गरक्मा ढ्या योम्पक् आसॆ यिक्हिकुवॆ? 17मान्ठाभनॆ ऎॽवा याॽमिचिऎर काङ्कॆ निवाँहाङ्मि नुऎ खानावाँमि बेप्पारा लॆटिङ्कानि। टर काङ्का निवाँहाङ्ऎन पाङ्हाङ्मिम्पा रेम, खोम् ङारिङ्पिॽन खिरिस्टमि योम्पक् मुखुबा लिसे ढाँटु मान्बङ्चारे यामुकिङ्का।
Zur Zeit ausgewählt:
२ कोरेन्ठि 2: LBR
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023, Wycliffe Bible Translators, Inc. and Nepal Bible Society