मर्कूस 16

येशू मुर्दासे जिन्दा भेलै

(मत्ती २८:१-८; लूक २४:१-१२; यूह २०:१-१०)

1दोसर दिन सझौवा यहूदी आदमीसिके विश्रामके दिन बित्लके बाद मरियम जे मग्देला सहरके रहै, याकूब आर योसेसके मयाँ मरियम, आर सलोमी येशूके शरीरमे लगाबैले सुगन्धित अत्तर किनल्कै। 2ऐतबारके दिन भोरे, यी जनानीसब सुरुज उग्लहैं साथ सारामे गेलै। 3रस्तामे जैबेरियाँ ऊसब एक दोसरके कहैल्कै, “हमरसिके लिए साराके द्वारसे बडका पत्थल के हट्या देतै?” 4जब ऊसब सारा महर देखल्कै ते साराके द्वारमे भेल बडका पत्थल हटैल रहै। 5जब जनानीसब सारामे पहुँचलै आर साराके भितर ढुक्लै तब ऊसब उजरा कपडा लगैल एकटा जवान आदमीके दहिना बगल बैठ्ल देखल्कै, आर ऊसब चकित भेलै। 6जवान आदमी ऊ जनानीसिके कहैल्कै, “चकित नैहो, तुहेंसब नासरत गाँव निवासी येशूके खोजैछैं, जकरा क्रूसमे काँटी ठोकिके मारल्कै रहे। ऊ मुर्दासे जिन्दा भ्याके उठ्लै छे, ऊ एत्ते नैछै, ओकरा राख्ल जगह देख, 7आर तुहेंसब जो ओकर चेलासब आर पत्रुसके कहिदहैं, येशू जिन्दा छै। ऊ गालील जिलामे जैछौ आर तहुँसब सभेको ओत्ते जो। तुहेंसब ओकरा ओत्ते देख्भैं, जेरं ऊ मरैसे पहेला तोरासिके कहैल्कौ रहे।” 8यी बात सुनिके, ऊसब सारासे निक्लीके दौड्लै, कहिनेकी डर आर आश्चर्यसे ऊसब काँप्ते रहै। रस्तामे ऊसब कक्रहौ कुछु नैकहैल्कै, कहिनेकी ऊसब डरैल रहै।

येशू चेलासिके आपन दर्शन देल्कै

(मत्ती २८:९-२०; लूक २४:१३-५३; यूह २०:११-२३; प्रे १:४-११)

9ऐतबारके भरौवा येशू मुर्दासे जिन्दा भ्याके उठ्लके बाद, ऊ सभैसे पहेला मरियम जे मग्देला सहरके रहै ओकरलगत देखा पड्लै। पहेला ओकरासे येशू सातटा भूत निकाल्लकै रहे। 10ऊ जैके येशूके चेलासिके यी खबर सुनैल्कै। ऊसब विलाप करिके कान्ते रहै। 11जब ऊसब ओकरासे येशू जिन्दा भेलै आर मरियम लगत दिखाई पड्लै कहिके जब चेलासब सुनल्कै ओकरासिके विश्वास नैभेलै।

12तकरबाद उहे दिन, ओकर दीटा चेलासब यरूशलेम सहरसे गाँवमहर जैबेरियाँ ओकरसिके लगत येशू दोसर रुपमे प्रकट भेलै। मगर ऊसब ओकरा पहचाने नैसकल्कै 13जब ऊसब ओकरा पहचानल्कै, ऊ दीटा चेला यरूशलेम सहर वापस गेलै। ऊसब ओकर दोसर चेलासिके बतैल्कै कि, ओकरसिके संगे कि भेलै। मगर ऊसब ओकरसिके बात विश्वास नैकैल्कै।

14पाछु येशू एगार चेलासिके लगत खाना खैबेरियाँ प्रकट भेलै। ऊ ओकरासिके धोपल्कै कहिनेकी ऊसब बहुते हठी भेल रहै। येशू मुर्दासे जिन्दा भेल बातके गवाही ओकरा देखेवालासिके बात ऊसब विश्वास नैकैल्कै रहे। 15तब येशू ओकरासिके कहैल्कै, “सारा संसारमे जैके सभे आदमीसिके खुश-खबरी प्रचार कर। 16हमरामे विश्वास करेवाला आर बप्तिस्मा लिएवाला उद्धार पैतै, मगर हमरामे विश्वास नैकरेवाला दोषी ठहर्तै। 17ऊसब जे हमरामे विश्वास करैछै, ओकरासिके यी चमत्कारसब करैके लिए अधिकार हैतै: हमर नाममे ऊसब भूत निकाल्तै, ऊसब नया भाषासब बोल्तै, 18अगर ऊसब बिखवाला साँपसब पकड्तै, साँप ओकरा कोनो हानी नैकर्तै, आर अगर ऊसब कोनो बिखवाला चीज खैतै ते कोनो किसिमसे उटा ओकरसिके नोक्सानी नैकर्तै। ऊसब रोगी-बेमारीसिके उप्परमे आपन हात राख्तै आर ऊसब ठीक भ्याजैतै।”

19प्रभु येशू यी सभे बात चेलासिके कहेलके बाद, परमेश्वर ओकरा स्वर्ग उठ्याके ल्यागेलै आर परमेश्वरके दहिना हातके बगल सम्मानके जगहमे बैठ्लै। 20तब चेलासब सभे जगहमे गेलै आर सभे आदमीसिके बीचमे खुश-खबरीके प्रचार कैल्कै। प्रभु ओकरासिके सहायता कैल्कै आर शक्तिशाली कामद्वारा वचनके साबित कैल्कै कि ओकरसिके सन्देश सच्चा रहै। आमेन।

Zur Zeit ausgewählt:

मर्कूस 16: KYVNT

Markierung

Kopieren

Vergleichen