Mataio 22
22
20 PAKANA MA 2.
1Iesu i wapua diat balet u ra kum pirapira welwelara lenkumi, 2A matanitu ko ra maua diara welara ma ra tui ba i pam tokono a lukara na tinaula kup na tunalik a muana, 3ma i tulua diat a nuna kum wetula lena diat benpa diat ba di ben‐walita diat u ra lukara na tinaula: ma diat patut rap ku. 4I tuluai balet rā kum wetula korom diat, ma i lena, Muat a piri lenkumi korom diat di ben‐walita diat, Iau a pam tokonorapta a nug utna na winagan: di umdokopa a nug kum karavau, ma ra kum pika ba i bira, ma di pam tokonota a lig rap: muat wan urin u ra lukara na tinaula. 5Ma diat pet a mampai, ma diat wan ku, rā u ra nuna pinapam, rā bulug u ra nuna kunukul: 6ma ta magan ko diat diat pampa diat a nuna kum wetula, diat pet akakai korom diat, ma diat umdokopa diat. 7A tui kuma i pet na kămkămiak uni, ma i tulua diat a nuna kum tenawineum, ma diat wabapua diat a kum wekuru kuma, ma diat kamarua a nudiat bual. 8I piri balet ta diat a nuna kum wetula lenkumi, I tokono rap a utna na tinaula, ma diat kuma di a ben‐walita diat uni pa diat ka. 9Muat wan weran u ra kum akapi, ma diat rap ba muat we‐torom iai ma diat, muat ben diat urin u ra lukara na tinaula. 10Ma ra kum wetula kuma diat wan u ra kum akapi, ma diat ben ugai diat rap diat wetorom ma diat, a kum akakaina tara, ma ra kum kokoina tara kai: ma diat ki welarapa a tolug a tinaula. 11A tui kai ba i ruk, kuma i ligna bobo diat diat tolug ugai u ra lukara na tinaula, i bobo iai ta muana, ba pa i papai un i ta in a malu na tinaula; 12ma i piri tana, A tepag, u ruk lelawai urin ma pa num ta in a malu na tinaula? Ma i ki mut ma ku. 13Ma ra tui i tula diat a kum wetula lena, Muat kerapa i, muat a og‐a‐pariua i u ra boboto: kura diat tagtagi ma wakirit a lokodi iai. 14Kuma di ben ta mogoro, di tikan wălipa ta kabanadi ma ku.
15A kum te Faresaio diat tolug ugai, ma diat wepak u ra lig diat a walampa i uni u ra nuna pirapira. 16Ma diat tulua diat a nudiat tara‐na‐wawera korom i, lena, diat a wan ugai ma diat a kum takun Erod, ma diat a piri lenkumi, Tenawawera, miat nunurai lena a tenaligtatuna ui, u wawera ligtatuna u ra kum kokoina lig na ra matan Nara, ma pa u burut un te; kuma pa u ururu bia ku u diat a tara. 17Un wapua miat, Awa u kanapi? I ka duk ba dat tari a drawe korom Kaisari, ba pate? 18Ma Iesu i nunura akaina nuknukidiat, ma i piri ta diat, A kum tenawaruwaruka muat; lelawai kuma muat ligna walam iau? 19Muat weai tag ta pakan a măni na drawe. Ma diat kip ta denarion korom i. 20Ma i tiri diat lena, A nion oi bi? ma ra timtimu kai? 21Diat piri tana, A nun Kaisari. Ma i piri ta diat, Muat tari tan Kaisari a kum lig a nun Kaisari: muat tari tan Nara kai a kum lig a nun Nara. 22Ma ba diat walogoropa i, diat kakaian uni, ma diat wan talura i.
23U ra bug kuma a kum te Sadukaio kai diat wan korom i, diat ba diat piri lena, Pa ta lalaun balet na muru, ma diat tiri uni lena, 24Tenawawera, Moses i piri lenkumi, Ba ta muana i wirua ko ra nuna tebuan, ma pa ta na tunalik, i ka ba tenalik balet in taula ma ra tebuan kuma ma in wapuer ta bulumuru korom tenalik. 25Narap diat ki na miat a limadi ma ruadi nadiwaina in muana: a mukana i a taula ma ra tebuan ma i wirua kon i, ma ba pa ta na tunalik i tuturata tenalik u ra nuna tebuan: 26lenkuma bulug a wepatapin diara, ma ra wepatapin ditul, ma diat rap a limadi ma ruadi. 27A tebuan kuma i mat murumuru diat. 28A nun oi a tebuan kuma u ra lalaun balet na muru? kuma diat rap diat taula ma i. 29Iesu i wapua diat lena, Muat rara kuma pa muat nunura a Buk‐tabu ma ra dekdekin Nara. 30Kuma u ra lalaun balet na muru, pa diat taula, ma pa diat petwebat u ra tinaula, diat welara ma ku ma diat a kum agelo u ra maua. 31Kumi kai, u ra lalaun balet ma ko ra mat, pa muat luki utbai a pakan a pirapira kuma Nara i piratai ta muat lena, 32Iau ku a Kalou a nun Isaak, ma ra Kalou a nun Iakob? A Kalou pa nudiat a kum minat, a nudiat ma ku diat lalaun. 33Ma diat a kum tara‐na‐kaiya ba diat walogoroi diat kakaian mat u ra nuna wawera.
34A kum te Faresaio ba diat walogoroi lena i pira‐kutupa diat a kum te Sadukaio, diat tolug ugai korom i, 35Ma rā pa diat a tenatimtimu i tiri walam tama i lena: 36Tenawawera, O oi na pakan a wewadu i muka u ra kum wewadu rap? 37Iesu i piri tana lenkumi: Un mari Ieova a num Kalou u ra balam rap, ma ra niom rap, ma ra nuknukim rap. 38Ia kumi a gala na pirawebat ma ra mukana kai. 39Rā kai kumi i patap uni diara welara mai; Un mari a tepam lenkuma u mari ui. 40A kum pirawebat rap ma ra kum parofita kai diat ketei rap ko ra ru pakan a pirawebat kumi.
41Ba diat a kum te Faresaio diat ki ugai kubai, Iesu i tiri diat lena; 42Awa muat kanapi un Karisito? Na tun oi ia? Diat piri tana, Na Tun David. 43I tiri diat balet lena, Ba lenkuma lelawai David i tara tadaru korom i u ra Niono ba i piri lenkumi, 44Ieova i piri ta ra nug Tadaru, Un ki tau u ra waot na limag un ta pakan a wanua ba ag pakita diat uni a num iabara na tudag i ra kakim? 45Ba David i tara Tadaru korom i, na tunalik lelawai ia? 46Ma pa ta pa diat ma i balu larapai a nuna pirapira, ma pa te ma i ligna tiri balet tak u ra bug kuma.
Zur Zeit ausgewählt:
Mataio 22: RAI
Markierung
Teilen
Vergleichen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Published by the British and Foreign Bible Society in 1896.
