Pfong Ka̱za 7
7
Ba̱nyet Isreila 144,000 ba a̱ ni shot i
1Nkyang ani na bu seyak, n dyi ba̱pfong Ka̱za ba̱ mba ba̱naai ba sseng a̱za̱ na̱gwut na̱naai ka̱sa na a̱ breng nwun naai a ho na bu hywwak tazwa ka̱sa ji ko tazwa a̱yuywu ba̱shekwot, ko a̱nzan taka̱i ka̱kon. 2N si n dyi a̱pfong Ka̱za a̱yaan na̱ ban nyyai a̱za̱gbang dityin, a̱ breng hatimi Ka̱za, A̱gwam Nsso. Na̱ yrek ka̱nu a̱ yei ba̱pfong Ka̱za ba̱naai ba Ka̱za ka ba̱ ryi cet byyan ka̱sa na bu a̱yuywu ba̱shekwot a ni. 3A̱ hywa da̱ mba, “Yi ryok byyan ka̱byen ko ba̱shekwot ko na̱kon ba, se zi yen tyei ba̱nyet ba a̱ yet ba̱kwwa Ka̱za ba ni hatimi nka na a̱ta̱ssi mba ba̱sa̱rei.” 4Ba n tyyei di ka̱tswa ba̱nyet ka ban tyyi hatimi na ni a̱ yet cyi kop ncyi bu nswak naai ba̱ a̱naai (144,000). Ba ba̱ tssa nyyai an sot swak bu swa nying Isreila ji.
5Nyyai an sot Yahuda ji ba̱nyet cyi kop swak ba̱ hwa (12,000) ba ba̱ tyyi hatimi nu.
Nyyai an sot Ruben ji ba̱nyet cyi kop swak ba̱ hwa.
Nyyai an sot Jada ji ba̱nyet cyi kop swak ba̱ hwa.
6Nyyai an sot Ashira ba̱nyet cyi kop swak ba̱ hwa.
Nyyai an sot Naftali ba̱nyet cyi kop swak ba̱ hwa.
Nyyai an sot Manassa ba̱nyet cyi kop swak ba̱ hwa.
7Nyyai an sot Simiyan ba̱nyet cyi kop swak ba̱ hwa.
Nyyai an sot Lawi ba̱nyet cyi kop swak ba̱ hwa.
Nyyai an sot Isakar ba̱nyet cyi kop swak ba̱ hwa.
8Nyyai an sot Zebulun ba̱nyet cyi kop swak ba̱ hwa.
Nyyai an sot Yusufu ba̱nyet cyi kop swak ba̱ hwa.
Nyyai an sot Banyami ba̱nyet cyi kop swak ba̱ hwa.
Ka̱tswa ba̱nyet i ba̱jijyat ba̱tro
9N bo n cyang n dyi ka̱tswa ba̱nyet. A̱yin a̱n ba̱ twang ba. Ba nyyai kozan ka̱byen bu kozan nwap i ka̱sa ka ba̱ a̱riryem. Ba sseng a̱ta̱ssi a̱ntwam dityok a̱gwam ka bu A̱truk u. Sa̱rei mba koyan a̱ kup a̱jijyat a̱tro a̱ breng a̱pipyyi ntswan a mbvak mba na. 10Ba yrek na̱wan mba na a̱ hywa, “Sucet nyyai di Ka̱za njit ka, a̱tuba nu a̱ swat a a̱ntwam dityok u ni, ba̱ A̱truk u.” 11Sa̱rei ba̱pfong Ka̱za ba a̱ tyong a̱ krang a̱ntwam dityok u bu ba̱nekwo ba bu nkyang nsso iya ba̱na naai. Sa̱rei mba ba ta̱gbok a̱ tuk a̱ccu mba na ka̱byen a̱ta̱ssi a̱ntwam ka a̱ sook Ka̱za ntong. 12A̱ hywa, “Amin. A̱didyep, shii, a̱za̱ncyi, gwai, cet bu cet sa̱rei yet nying Ka̱za har a̱ba̱da. Amin.”
13A̱tuba a̱yring ka̱yat ba̱nekwo ka a̱ n zzim a̱ hywa, “Ba̱nzan a̱ mbaa ni a̱ kup ba̱jijyat ba̱tro ba ni? Ba nyyai ke?”
14N hywa da̱ nu, “Nwan a bvwo, nzuk n nin bvwo kyang ba.”
Na̱ hywa da̱ nzuk. “Nde, mba a̱ yet ba̱nyet ba a̱ wruk nyyai a a̱gba̱dang ka̱bvung u ni. Ba ka̱n tssu ba̱tro mba ba di ba̱sok A̱truk ba a̱ wwon ba̱zizrak. 15Nkpa n byyi ban sseng a̱ta̱ssi a̱ntwam dityok Ka̱za ka a̱ ku yya mpfong ka̱ta̱nom bu ka̱ta̱tuk, ba shyi bat nu na. A̱tuba nu a̱ swat a a̱ntwam dityok u ni a̱ ni ba̱ hwwun bu nshyi nu na. 16Ba bo byyi hok cihywat ko na̱shyi ba. Nom bu sa̱rei kyang a hwwi ni bu ni ba̱ shya ba. 17Rot A̱truk u a̱ shyi a̱katyyi a̱ntwam dityok ka ni a̱ ni ba̱ cam, nu a̱ ni yet a̱ntyok ba̱ tsaai a̱ bo nat ba̱ mba, a̱ ba̱ tsaai a̱ nat i ka̱bvwa ka ba nin shya ba̱shekwot wwat sucet i. Ka̱za a̱ ni ba̱ ryang sa̱rei ba̱ssi mba ba.”
Zur Zeit ausgewählt:
Pfong Ka̱za 7: kaj
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2011, Wycliffe Bible Translators, Inc. All rights reserved.
