Pfong Ka̱za 6
6
Ba kruk kpa na
1A̱wwon n dyi A̱truk u a̱ yrang a̱hatimi a̱yring ka̱yat ba̱hatimi a̱tiyring ka, n hok a̱tuba a̱yring ka̱yat nkyang sso ka na̱ hywa di diwan di tat nza ni, “Ba!” 2N cyang, n dyi a̱jijyat ntsaap. A̱ntyok za̱ wrak u a̱ breng ka̱ta, ba ku ryi rawoni, na̱ wruk da̱ a̱ntyok ka̱n za zwang ni a̱ bo naat ya zwang zaan.
3A̱truk u a̱ bo yrang hatimi a̱mba̱hwa nu; n hok kyang sso a̱mba̱hwa na i hywa, “Ba!” 4N bo cyang n dyi a̱shong ntsaap. A̱tuba nu a̱n za̱ wrak ni ba ku ryi dama na̱ ba di zwang i ka̱sa ka, ba̱nyet a̱ ga ya hywaai; rot a̱mi ba ku ryi a̱jinjing ka̱krong.
5Na̱ bo yrang hatimi a̱mba̱tat u, n bo n hok kyang sso a̱mba̱tat a i hywa, “Ba!” N cyang n dyi a̱dindying ntsaap, a̱za̱wrak u na̱ breng kyang maai ba̱nyet mbvak. 6N bo n hok diwan tiyaan nyyai di kyang sso iya ti yya, “Mudu a̱yring nying yak a ban yei alka̱ma ni yet krum pfong nom yring, mudu tat nying yak a ban yei sha'ir ni yet krum pfong nom yring. Ba ta̱rwam ba bu byyan dihywu ti bu nkwwa na.”
7Na̱ bo yrang hatimi a̱mba̱naai u, n bo n hok kyang sso a̱mba̱naai a i hywa, “Ba!” 8N cyang n bo n dyi tsaap zaan zi kyyai bonsom bu dinyring a̱mbvat. A̱za̱wrak u ba ku yei Dikwu, A̱yabyen na̱ ku tssup ba̱ gbigbyak a̱maryim ka. Ba ba̱ ryi cet a̱yring tazwa a̱naai ka̱sa nu, ba hywaai di zwang bu zong bu nhywu ba̱ a̱ka̱tuk nyam i ka̱sa ka.
9Na̱ bo yrang hatimi a̱mba̱pfon nu. N cyang a̱ta̱hwa ka̱bvwa ba̱hyum ka n dyi sso ba̱nyet ji ba hywaai rot ba̱ryat Ka̱za ni bu shaida ka̱ryong ji ba wrak ni. 10Ba yrek na̱wan mba na ntazwa a̱ hywa, “A̱gba̱dang Ka̱za, A̱tyyi njit, A̱zizrak A̱gwam njit, A̱ntyok ka̱ryong, nza̱tuk a nin yya ka̱sa ka shirya in za tan kyang a ba za yya mi ni?” 11Ba sook ba̱jijyat ba̱tro a̱ ba̱ jyet sa̱rei mba, a̱ hywa da̱ mba di ba yen pfwi ba̱cincong, se ba yen hywaai sa̱rei kpikpit ba̱kwwa bu kpikpit ba̱wumbeyang mba ba da̱ni di ba yin ba̱ hywaai ni.
12Na̱ bo yrang hatimi a̱mba̱yekitat a, n cyang n bo n dyi ka̱byen ka ka kyrim di cet ba̱t. Ka̱nu nom ka a̱ brak a̱ tyyi ba̱dindying anye cunccu. Hywan na i seyak shong ba̱sa̱rei anye ba̱sok. 13Na̱ta̱ngwat a̱ ta̱sung a̱ kwei ka̱byen da̱ a̱bvun a̱bvap nyyai tazwa ka̱kon ka̱ram ka wun ku nan ku hywwak krok i. 14Tazwa ji i krung di kikyak ba gut i, ba bo tun sa̱rei a̱huhwan bu na̱byen a̱katyyi ba̱shekwot nyyai na̱bvwa swat nna na. 15Sa̱rei ba̱gwam ka̱sa ba, bu ba̱nyet kwak ka̱son an zwang, bu ba̱nyet nzwa, bu ba̱nyet hyong ncet, bu sa̱rei kpikpit ba̱nyet a, ba̱kwwa bu ba̱nyet swat a̱ccu mba, ba nwa nrang an dya a̱huhwan bu na̱ta̱hwa nkpang. 16Ba yei a̱huhwan bu kpang ji a̱ yya, “Yi bvwot za kwei i gi za nyyak a a̱ssi a̱tuba na a̱ swat a a̱ntwam dityok u ni bu diryen A̱truk ti.” 17Rot a̱ka̱tuk nom diryen mba nu a̱ ba. A̱nyan a̱ ni maai a̱ sseng a̱gagak ba̱ mba?
Zur Zeit ausgewählt:
Pfong Ka̱za 6: kaj
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2011, Wycliffe Bible Translators, Inc. All rights reserved.
