Matiye 2
2
Sum kwawe mə ga' fəta bəka mbə kar Zezu
1Zezu vra' so Betlehem wə nya Zude, kə ri məni Herodə suk jwə wə hana. Kəki vra' um, sum kwawe məni we ciciw car ga' fəta bəka, mbə day so Jeruzalem. 2Handay ci vunu: «Vay məni vra' ɓay wə də suk jwə wa sôwâ Zuwif nə wə ka su? Namba we ciciw um car mbə ga' fəta bəka, ɓay namba mbə kədan namba um buru.»
3Kəri məni jwə Herodə mun dan rum, vunduk par num juk kə sôwâ daŋ' məni gay' wə so Jeruzalem ta'a. 4Mum ɓawa sum rôwâ mə du sum po' fur kə sum pay zu dan dlay mə du sôwâ ɓay ci vun ndaya: «Kris də vra' wə ka su?» 5Handay ɗam vun rumu: «Mum də vra' wə so Betlehem wə nya Zude, zə bə ka' dan wây'i:
6Ɓay həŋ, so Betlehem wə nya Zude,
həŋ cu kî wə du so mə mbri mə nya Zude mi.
Zə jwə də pâ mbə rawti riŋ,
mum kə məni də ji sôwâ man, Israyel.»
7Zə rum, Herodə ɗe sum kwawe 'yeŋ ɓay ci vun ndaya: «Ciciw mbə ɗeri kə ma su?» 8Mum faŋ sin nday ta so Betlehem kə in nday ne: «I də ye, ɓay i keɓ vay nə kə ɓayrumu. Kəri məni hi la' za' num si, i faŋ mbə ta' ri rum ne nan kədan na də um bur kə tu rin ta'a.»
9Kəki məni handay mun dan jwə, handay 'ya dle. Handay we ciciw məni handay ke we wə ga' fəta bəka. Ciciw rum wə ta kor nday, ama kəri məni mum mbə day wə ri məni vay nə wə han, mum cara. 10Kəri məni handay we ciciw nə, handay tuk kəɗam juku. 11Handay cok ta rawti so, ɓay handay we vay nə kə ya um Mari, handay kuduk nya kor rum ɓay bur numu. Handay ulay' kwazi' nday, ɓay handay ne kwane ne numu: Njike mə bondo, kwa mə sî ndə urdi mə ɗe kə «aŋsaŋ», kə mbir gu mə ɗe kə «mir». 12Kəki rum, Ifray ta' kwa ne nday kə məsin kədan kuni faŋ də hay' Herodə za' mi. Zə rum, handay tle vari məsin ta nya ndaya.
Sôwâ Zezu ne ta nya Egip kə rumu
13Kəki məni sum kwawe 'ya dle, vay sin Bârî mə wafray mbə hay' Zozef kə məsin ɓay la' ne numu: «A car, a tle vay kə ya um, ɓay a ne də nya Egip kə ndaya, a suk han hâ day ri məni na də wû ini: A gewa ye. Zə Herodə wə də keɓ vay nə kədan mum um ci.»
14Zozef car, tle vay kə ya um ɓay 'ya kə dukri rum ta nya Egip kə ndaya. 15Mum suk han hâ Herodə mara. Kwa rum gi ndəna' kədan nyen mbi dan məni Bârî in kə vun bə ka' dana: «Na ɗe Vay man pâ mbə nya Egip.»
Mar dawre' mə so Betlehem
16Kəri məni Herodə we i sum kwawe ru num, mum tle bak juku. Mum ne vari kədan ci daw njiwkwa daŋ' wə so Betlehem məni gi kim hoɓ ko məni cu day kim hoɓ məto' ce' ndə məni mum mun dan rum kə vun sum kwawe wa dan ri məni ciciw mbə ɗeri. 17Kwa rum gi ndəna' kədan nyen mbi dan məni bə ka' dan mə ɗe kə Jeremi ini:
18«Sôwâ mun wor wə so Rama,
wor rum ci' kə ge wor ɓayrumu#Jer 31.15.
Rakel wə ci' zə daw sə,
ɓay ta cu gak ve kədan
sôwâ sə reɗ vunduk ne mi,
zə daw sə daŋ' mar si.»
Sôwâ Zezu gewa ta so Nazaret kə rumu
19Kəri məni Herodə mar si, vay sin Bârî mə wafray mbə hay' Zozef wə nya Egip kə məsini. 20Mum la' ne numu: «A car, a tle vay kə ya um, ɓay a faŋ də nya Israyel kə nday, zə sôwâ məni ke keɓ vay nə kədan ci kuni, mar si.»
21Zə rum, Zozef car, tle vay kə ya um ɓay faŋ ta nya Israyel kə ndaya. 22Ama mum mun i Arkelawus suk jwə tan Herodə, ba um wə nya Zude. Zə rum mum ne wəlok kədan mum suk wə nya rumu. Ifray mbə ta' kwa ne num kə məsin, ɓay mum 'ya dle ta nya Galile. 23Mum ta suk wə so mə ɗe kə Nazaret. Kwa rum gi ndəna' kədan nyen mbi dan məni sum ka' dan ini: «Sôwâ də um ɗe kə swə Nazaret.»
Zur Zeit ausgewählt:
Matiye 2: KMN
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Le Nouveau Testament et Psaumes en Peve © Alliance Biblique du Tchad, 2014.