Markus 7
7
La'apo sobondarnyo inyo bulah monsio kotor di hadapan Allah
(7:1-23)
(Mat. 15:1-20)
1Boboropo pomimpitn agama Yahudi datakng doi' Yerusalem, ia'an boboropo pomimpitn doi' kolompok Farisi ongko boboropo guru agama Yahudi jam. Sia' datakng ko Yesus. 2Sia' moniant obai boboropo murid-Nyo kinyo mombasu'i jari sobolupm sia' makatn. Monurut Sia', nantai sosuatu inyo campah di hadapan Allah. 3Obai, boko urakng Farisi samo sama'an somuo urakng Yahudi bukai hala monuruti poraturan angki-bayatn sia'. Sobolupm sia' makatn, sia' hala mombasu'i jari agatn caro totontu. 4Aman pulakng doi' pasar, sia' gola' mandi' agatn caro husus sobolupm sia' makatn. Sia' kotakan monaati banya' poraturan inyo bukai jam doi' angki-bayatn sia'; sama'an poraturan mombasu'i cangkir, mangku', pirikng inyo bukai dipulah doi' tombago.#7:4: ongko monopasi tikar tompat kodudu'an pakai' makatn. 5Obai nantai, boko urakng Farisi ongko boko guru agama Yahudi nantai bopandir ko Yesus, “Mapo boko murid Duatn kinyo monaati poraturan angki-bayatn kito? Sia' kinyo mombasu'i jari sobolupm sia' makatn.”
6Timbas Yesus ko sia', “Kaitn bayo pompadah boi'. Watu joman komai, Nabi Yesaya udah momadahan pomandiran Allah mongona'i kaitn. Topat bondar pomandiran Allah ni'in:
‘Banso ni'in bayo momuji Aku agatn saro sia'.
Apo hati sia' kinyo bobondar honda' monyonangan Aku.
7Pocumo ja' sia' monyombah Aku. Obai sia' bayo moajaran poraturan monsio mo.’#7:7: Doi' buku Yesaya 29:13. Watu joman komai, nabi Yesaya momadahan nantai mongona'i banso Israel. Apo watu joman Yesus, pomandiran nantai monjolasan sipat banya' pomimpitn agama Yahudi agatn bondar.
8Kaitn tuyut poraturan angki-bayatn apo molanggar porintah Allah!”
9Yesus bopandir jam, “Kaitn pandai bondar monula' porintah Allah oca' ulih momportahatan poraturan kaitn siku' 10Contohnyo: Musa monulis porintah Allah ni'in: ‘Hormaticam indai bopai kaitn’#7:10: Doi' buku Koluaran 20:12 ongko Ulangan 5:16 ongko ‘Urakng inyo mohayam indai bopainyo gola' dihukupm mati.’#7:10: Doi' buku Koluaran 21:17 ongko Imamat 20:9 11Apo kaitn mongajar: Aman urakng bopandir ko urakng tuhonyo: ‘Lapo inyo gola' ku onju' ko indai ongko bopai, udah ku posombahan ko Allah,’ 12Jadi, kaitn mombebasan urakng nantai doi' kowajibannyo pakai' monulukng indai bopainyo. 13Poraturan nantai inyo kaitn torima' doi' angki-bayatn kaitn mombulah oca' Pomandiran Allah co gola' ditaati agi'. Ongko banya' hal bukai inyo sama'an nantai inyo kaitn labuhan.”
14Lalu, Yesus moningkau urakng banya' agi'. Kato-Nyo ko sia', “Dinga'ancam ongko kotohu'i ni'in: 15Boko hal inyo mansu' ko dalapm kinyo bulah boko monsio monjadi campah. Apo boko hal inyo koluar doi' dirinyo, nantaiam inyo mombulah boko urakng monjadi campah.” [ 16Aman honda' mongoroti, dinga'ancam pomandiran-Ku agatn boi'!]
17Pas Yesus moninggalan urakng banya' nantai ongko mansu' rumah, boko murid-Nyo botakutn ko Sio mongona'i masud poumpamoan nantai. 18Timbas Yesus, “Apo bai kaitn bolupm mongoroti jam? Kaitn gola' tohu obai la'apo pan inyo mansu' ko dalapm nyao kinyo bulah urakng monjadi campah. 19Obai, boko hal nantai kinyo mansu' ko dalapm hati monsio, apo mansu' ko dalapm porutnyo, lalu diboria'an.” (Agatn pomandiran nantai, Yesus monjolasan obai somuo pomakatn kinyo pomali ulih dipua'i).
20Kato Yesus agi', “Apo inyo koluar doi' hati monsio, nantaiam inyo mombulah boko urakng monjadi campah. 21Obai, banya' pikiran inyo jahat koluar doi' dalapm monsio, ia'an doi' hatinyo. Somuo pikiran jahat nantai mombulah monsio bulah dosa kinyo sonunuh, mongolit, mombunuh, 22bomporajoan agatn inyo bukai doi' bini damo lakinyo, monjadi sorakah, bulah kojahatan, monipu, bulah kinyo sopatn, monjadi tungi-dongki, mohanyam, monjadi buhau, monjadi uyuh diajar. 23Somuo inyo jahat nantai koluar doi' dalapm hati monsio. Nantaiam inyo mombulah boko monsio monjadi campah.”
Botina' bukainyo urakng Yahudi pocayo obai Yesus bokuaso
(7:24-30)
(Mat. 15:21-28)
24Lopas nian, Yesus moninggalan tompat nantai ongko botula' ko doerah Tirus. Di santai, Sio mansu' ko sobuah rumah. Sio co honda' urakng bukai tohu obai Sio ado di santai. Apo nantai co mungkitn obai boko urakng mongotohu'i Sio datakng. 25Ado botina' inyo mondinga' mongona'i Yesus di su'utan. Botina' nantai ado ana' botina' inyo dirasu'i roh jahat. Indai bobia' nantai datakng ko Yesus, tundu' monyungkapan di kaki-Nyo, 26momuhun ko Yesus pakai' monundukng roh jahat nantai doi' ana' botina'nyo. Apo, botina' nantai bukainyo urakng Yahudi. Sio doi' Fenisia di propinsi Siria. 27Yesus bopandir ko io, “Co patut monguti' roti inyo disodiaan pakai' boko bobia' lalu ditikapan ko boko kudu'! Biaram boko bobia' konyang holu'ai!”#7:27: Sobondarnyo, Yesus mongasihi somuo urakng. Sio bayo mongatoan ni'in, moniru pikiran urakng banya', oca' Sio ulih monokatan obai pikiran nantai salah. Banya' urakng Yahudi bopikir Rajo Inyo Dijanjian Allah datakng pakai' monyolamant'an sia' mo. Sia' moanggap banso bukai kinyo cucu'. Apo, Yesus momuji indai ni'in obai io pocayo ko Sio.
28Kato botina' nantai, “Bondar Tuhatn. Apo boko kudu' dibabah meja pan ulih momua'i boko komputikng inyo dijatu'an boko bobia'!”
29Kato Yesus ko botina' nantai, “Obai pomandiran kolai nantai, pulakngcam ninam. Roh jahat udah koluaram doi' ana' kolai!”
30Botina' nantai pulakng ongko moniant ana'nyo monggarikng di kotidu'annyo. Roh jahat nantai udah koluar doi' io.
Yesus monyamani urakng tingal
(7:31-37)
31Lopas nian, Yesus moninggalan doerah Tirus. Sio molalu'i Sidon, ongko molintasi doerah Dekapolis, lalu botula' ko Danau Galilea. 32Di santai, ado urakng inyo tingal ongko angko. Boko urakng mombaba' io ko Yesus lalu momuhun oca' Yesus molota'an jari-Nyo ko urakng nantai pakai' monyamani io. 33Yesus monyongkayoan io doi' urakng banya' nantai. Yesus momansu'an tunju'-Nyo ko kolindakan urakng nantai. Lalu, Sio moigah ongko moncama' lidah urakng nantai. 34Yesus monongadah ko langit, mongosih panjakng ongko bopandir dalapm baso Yahudi, “Efata!” Rotinyo, “Tobuka'cam!”
35Watu nantai jam kolindakan urakng nantai ulih mondinga'am, ongko lidahnyo nyamanam sampai io ulih bopandir am agatn boi'. 36Yesus morarakng sia' mongisahan hal nantai ko sopo pan. Apo mongkitn Yesus rarakng, mongkitn nontu sia' mongisahannyo. 37Somuo urakng kotakan hiratn. Kato sia', “Sio molabuhan somuonyo agatn boi'. Sio mombulah urakng tingal ulih mondinga' ongko urakng angko ulih bopandir!”
Zur Zeit ausgewählt:
Markus 7: TBDS
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
