Markus 4
4
Yesus mongajaran mongona'i caro urakng monorima' Pomandiran Allah
(4:1-20)
(Mat. 13:1-23; Luk. 8:4-15)
1Yesus mongajar agi' di pinggir danau. Banya' bondar urakng datakng sampai bosonsongka'an mongorumuni Sio. Jadi, Sio jumpat porohu inyo ado di danau nantai. Sio dudu' kapikng mongajar urakng banya' inyo ado di pantai. 2Yesus mongajar banya' hal ko sia' agatn momakai poumpamoan. Dalapm ajaran-Nyo, Sio bopandir, 3“Dinga'ancam! Ado potani inyo botula' pakai' moabur bonih. 4Pas io tongahan moabur, ado bonih inyo jatu' di jalatn. Boko burukng datakng lalu momansilnyo sampai habis. 5Ado jam bonih inyo jatu' di tanah inyo rado batu, inyo co banya' tanahnyo. Bonih nantai copat lantakng obai tanahnyo lipis. 6Apo boko tontanaman nantai kinyo boakar. Obai nantai, watu dipanjah podi', boko tontanaman nantai monjadi layu, rangkai ongko mati. 7Ado bonih inyo bukai jatu' di tongah rado momant. Rado momant nantai mongkitn bosar ongko mongopih bonih nantai sampai konti' ongko kinyo bobuah. 8Apo ado bonih inyo jatu' di tanah inyo subur. Boko tontanaman doi' bonih nantai lantakng agatn boi', mohasilan banya' buah. Ado inyo mohasilan tigo puluh kali lipat. Ado inyo bukai onam puluh kali lipat. Ado jam inyo mohasilan sampai soratus kali lipat.”
9Lopas jadi mongisahan poumpamoan nantai, Yesus bopandir, “Sopo bokolindakan pakai' mondinga', io gola' mondinga'an ajaran ni'in!”
10Pas Yesus sonsiku'an, koduo bolas rasul-Nyo ongko boko murid-Nyo inyo bukai botakutn mongona'i poumpamoan nantai. 11Jadi, Yesus monjolasan ko sia'. Kato-Nyo, “Kaitn udah dipadahi mongona'i Koraja'an Allah inyo bolupm dikotohu'i urakng bukai. Apo, ko boko urakng di luar, Aku mongajar bomacapm agatn momakai poumpamoan. 12Aku molabuhan nantai oca':
‘Sia' hala borotian porbuatan Allah apo kinyo bobondar mongoroti masudnyo.
Sia' hala mondinga' borito doi' Allah, apo kinyo bobondar mongoroti.
Obai, sia' co moninggalan boko dosa sia' ongko co hidup monyonangan hati Allah. Jadi, sia' culih diamputi.’ ”#4:12: Doi' buku Yesaya 6:9-10
13Lalu Yesus bopandir ko sia', “Aman kaitn co mongoroti poumpamoan nantai, ubo apo kaitn ulih mongoroti somuo poumpamoan inyo bukai? 14Ninam rotinyo poumpamoan nantai. Potani inyo moabur bonih ia'an urakng inyo momboritoan Pomandiran Allah. 15Tanah di jalatn nantai monggambaran boko urakng inyo mondinga'an Pomandiran Allah. Apo, lansukng Rajo Sitatn datakng ongko mombulah sia' tongkolupatn Pomandiran Allah, sampai hati sia' kinyo pocayo. 16Tanah inyo rado batu nantai tontai monggambaran boko urakng inyo mondinga' Pomandiran Allah, copat monorima'nyo agatn sonang. 17Apo sia' bayo pocayo kotakng oca' mo obai kinyo boakar. Aman sia' mohadapi pondorita'an damo disiksa obai sia' pocayo Pomandiran Allah, jadi sia' co honda' pocayo agi'. 18Tanah inyo rado momant monggambaran boko urakng inyo mondinga'an Pomandiran Allah, 19Apo koponsuahannyo, sia' kuatir mongona'i kohidupan di dunia ni'in. Sia' ditipu obai kodampuan ongko boko kohonda' inyo bukai lobih pontikng pakai' sia'. Jadi somuo nantai mongganggu' Pomandiran Allah sampai kinyo bobuah ia'an sia' co hidup sosuai agatn Pomandiran Allah. 20Apo, tanah inyo subur monggambaran boko urakng inyo mondinga'an lalu kuat pocayo agatn Pomandiran Allah nantai. Obai nantai, ado hasil inyo boi'. Ado inyo mohasilan tigo puluh kali lipat. Ado inyo bukai onam puluh kali lipat. Ado jam inyo mohasilan sampai soratus kali lipat.”
Monsio gola' mondinga'an pomandiran Yesus agatn boi' ongko bobagi agatn urakng bukai
(4:21-25)
(Luk. 8:16-18)
21Yesus pan bopandir, “Aman ado urakng inyo mohidupan lampu, io kinyo monungkau'inyo agatn roga' bodamo molota'annyo di babah tompat kotidu'an. Apo io molota'an lampu nantai di pucu' meja oca' ruakan nantai torakng. 22Samo sama'an nantai jam, somuo inyo diombakan tajahan kotiat'an; somuo rahasia tajahan dikotohu'i ongko ditorakan. 23Sopo bokolindakan, dinga'an cam pomandiran-Ku agatn boi'.”
24Lalu, Yesus bopandir ko sia', “Dinga'ancam boboi'! Ukuran inyo kaitn pakai' moukur urakng bukai, Allah tajahan momakai ukuran inyo samo nantai pakai' moukur kaitn. Ongko malahan kaitn tajahan dionji'i lobih banya' agi'. 25Obai urakng inyo udah bisi, tajahan dionji'i lobih banya' agi'; apo urakng inyo co bisi, lapo inyo ado di io tajahan dikuti' doi'nyo.”#4:25: Yesus momakai poumpamoan ni'in pakai' monjolasan mongona'i Kobondaran huatan Koraja'an Allah. Boko urakng inyo bondar-bondar monorima'-Nyo tajahan mongoroti lobih banya' ongko lobih dalapm. Apo urakng inyo monula'-Nyo kinyo paca'an mongoroti la'apo pan.
Koraja'an Allah samo sama'an bonih inyo lantakng
(4:26-29)
26Yesus pan bopandir, “Koraja'an Allah samo sama'an kisah ni'in. Ado urakng inyo moabur bonih di tanah. 27Timpu malapm, io tidu'. Timpu bonyarian, io huas. Huatan, bonih nantai torus lantakng ongko botunas. Io co tohu ubo apo caronyo nantai tojadi. 28Agatn siku'nyo mo, tanah mongoluaran hasilnyo. Mulonyo, ado tangka'inyo, lopas nian ado bigi'nyo lalu buahnyo. 29Aman buahnyo udah mansa', urakng nantai mohanyinyo obai udah watunyo pakai' dihanyi.”
Koraja'an Allah samo sama'an bigi' tontanaman inyo kotakan kocit inyo lantakng
(4:30-34)
(Mat. 13:31-35; Luk. 13:18-19)
30Yesus pan bopandir, “Kito ulih mombandikan Koraja'an Allah agatn la'apo? Kito ulih monggambarannyo agatn poumpamoan mono? 31Koraja'an Allah samo sama'an bigi' sonsabi inyo diabur. Memang bigi' nantai inyo kotakan kocit doi' somuo jonis bonih di bumi. 32Apo, watu bigi' sonsabi nantai lantakng, io monjadi lobih bosar doi' somuo tontanaman bukai. Boko dahatn tontanaman nantai cukup bosar sampai boko burukng ulih bosayakng ongko bolindukng di santai.”
33Ubo nian am Yesus mongajar urakng agatn momakai banya' poumpamoan sama'an nantai, sosuai agatn komampuan sia' pakai' mongoroti. 34Yesus hala momakai poumpamoan aman Sio mongajar boko urakng nantai. Apo aman Sio siku' agatn boko murid-Nyo, Sio monjolasan somuonyo ko sia'.
Yesus bulah bonakau botongga'
(4:35-41)
(Mat. 8:23-27; Luk. 8:22-25)
35Timpu babahari nantai jam, Yesus bopandir ko boko murid-Nyo, “Hincapm kito botula' ko soborakng danau.” 36Jadi, sia' moninggalan urakng banya' nantai ongko botula' bosamo Yesus. Sia' jumpat porohu bokas Yesus udah dudu' pakai' mongajar tontai. Ado boko porohu bukai inyo tuyut jam. 37Watu sia' di tongah danau nantai, ntobukan ado bonakau datakng. Boko golumbakng monipau porohu sia' ongko mansu' ko dalapm sampai porohu nantai hampir bisi agatn ara'i. 38Apo, timpu nantai, Yesus tongahan toidu' di buai komudi porohu momakai bantal. Jadi, boko murid-Nyo monggagaian Sio. Kato sia' ko Sio, “Guru, pasti kito tajahan mati! Hibo Duatn co poduli?”
39Yesus huas, lalu mohakap bonakau nantai ongko bopandir ko danau nantai, “Botongga'cam! Languntcam!” Lansukng bonakau nantai botongga'am ongko danau nantai langunt. 40Lalu, Sio bopandir ko boko murid-Nyo, “Hibo kaitn gola'? Kaitn soharusnyo lobih pocayo agi' ko Aku!”
41Sia' Kotakan gola'. Kato sia' siku'-monyiku', “Urakng ni'in kotakan luar biaso. Bonakau ongko danau pan taat ko Sio!”
Zur Zeit ausgewählt:
Markus 4: TBDS
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
