Jakari 9
9
Ngar kɨ Jerusalem ndɨ ɗe
1Takel Bɨraɓe kɨdɔ dɔning Hadrakt,
a duba dɔ Damasɨt,
kɨta kum Bɨraɓe i dɔ degt tube
kɨ girrkooj Israel tube.
2Hamat tɔ'n hã,
i nderbe sia kɨ Tir kɨ Sidõ
ke neni ĩn ngeterr kɨngaĩ.
3Tir ndogbɔrr kɨngang gugɨn dɔn,
kaw nar arjã kɨnat tit bu be
nar ɔrr to tit bɔrr kɨdɔ ɗobgt be.
4Oo, Bɨraɓe a tir nyag loa pur,
a la nyamajg loa kam bahbot
na horr a õa mugɨj.
5Askalon a oo na ɓool a ɗa
Gaja tɔ, roa a ndad yatɨt
Ekrõ tɔ,
kɨta kam kɨndahdɔt loa a tel rosɔl.
Ngar kɨ Gaja a oi,
na Askalon a tel gotɓe.
6Girrdeg kɨ bɔw goto a hɔlondɨ kam Asdodt,
m'a m'nuj dɔngang lo Pilistiag.
7M'a m'ɔrr mosɨ kɨ taat kɨ nyag kɨyerr kɨ ngangat ko
na ndega kɨnãi a i kɨta Luwah loj
a i tit girrkooj kam Judat na Ekrõ
a i tit Jebusiag.
8M'a m'nda gong gugɨn dɔ kuj lom
ndoorɨn madngéta
kɨ ndoorɨn ngekawg kɨ ngetelg
kad ngedakumndo tɔi rodt
nderbe gog al
kɨta tajigla m'ur kumm kɨdɔat.
9Ɗan ronel ngãi, ĩn deg kɨ Siõ,
I kõ kɨ ndisɨ kɨbo ĩn deg kɨ Jerusalem.
Oon maj, ngar losɨ ndɨ ɗe rosɨt,
i kɨdenesew, i ngetetɗɔɔ, i de kɨ sayelɨl,
ndɨ dɔ korrot, ad i ngon ko ro kɨ kõ korro ooja,
10M'a mad pusɨɗɔɔg lo Epraim
kɨ sɨndaɗɔɔg lo Jerusalem goton,
a tuj gãɗɔɔg kɔ,
a la mber lapia kɨ ro girrdegt,
kõɓe loa a ɓai ta bahbot
mbã ta kɨmadt,
a mba girra ta baht
mbã kɨ dɔngoi dɔningt.
Ngar and kam Jerusalemt
11Na ĩn ta, kɨta kunkɔ kɨ un kɨ takul mosɨ kɨ to mbɨnajt sesɨ
m'a m'ɔrr ɓerg losɨ ko kam holɓet
kɨ man gotot.
12I telɨn kɨ longomrot losɨ kɨngang,
ĩn de dangaig kɨ ɓan kot kɨ kam kɨndahdɔt.
Ɓone kaa m'elsɨ kɨtɨga wang,
m'a m'tel m'adsɨ kɨɗang dɔt nja joo,
13kɨta m'ɗug Juda tit gã lom
na m'nda Epraim dɔt tit kɨrã be.
A Siõ, m'a m'un ngani kɨdɨngã
tit kiyaɗɔɔ lo gõɗɔɔ be
ndoorɨn ngani kɨdɨngã, i dɔning Gresɨ.
14Kamla Bɨraɓe a tee hɔi dɔdt dõ,
kɨrãg loa to a teen tit telndii be.
Bɨraɓe a kun tow na a ndia
kam nélmalt kɨko jikõ.
15Bɨraɓe Ngekoosɨg a ngomd,
a lan madngétad yalɨm,
a ɓan dɔd mbujmbuj,
a ãin na a kɨsen tit ngekãikasɨ be,
tit'n tasa kɨ ɗoosɨ kɨ nya be,
tit mosɨ kɨ ãi dɔkum dɨngɨrt.
16Ndɔat'n non Bɨraɓe Luwah lod
a ajd kɨta ĩn deg loa.
Tit'n medkɔsɨg kɨ majɨn dum
kam jog kõɓet,
a ndulon ngẽingẽi kam dɔningt loa.
17Ã, maj loa kɨ majkooa a i ngãibe.
Nyako a ad basag tɔgɨn maj,
an nduu kɨkij a ad ngamandg tɔgɨn ho.
Luwah a badɔ deg lon.
Zur Zeit ausgewählt:
Jakari 9: MlL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mbai Bible Revision © Bible Society of Chad, 2015.