Matie 9

Jeju yoot ngerokoinjɔr

(Oo Mrk 2:1-12; Luk 5:17-26)

1Jeju ɓai toot mad, gang bahbo gog, na aw ɓe lon. 2Deg ɗen roat kɨ ngerokoinjɔr mad kɨ to kam tɨrat. Lon Jeju oo kadkam lo deg'n non kad i kadkam Luwah kɨ jeje ye, el ngerokoinjɔr an: I hɔtɔgba, ngonɨm. Majalg loi ĩn kɨ nyàgo kɔ.

3Taa ne kɨmadg ku ngéndang maktubgt elɨn kamdt anan: De'n ndɨn elta kɨmal dɔ Luwaht.

4Na Jeju ger tagahd ad el an: Kɨtɔɗi i ndɨ i gaan ne ta kɨmajal titbe kamsɨt a? 5Oon ye, kɨ ɗa i soot: Kad de el ngerokoinjɔr an: Majalg loi ĩn kɨ nyàgo kɔ a ke kad ela an: I ɓai dõ, i ɓaning? 6Na kɨtakad gerɨn takad Ngon de ndɨ kɨ tɔg dɔningt ne kad nyan go majalg lo de kɔ ye, Jeju el ngerokoinjɔr an: I ɓai dõ, un tɨra loi, na aw ɓe loi.

7Taa ne ngerokoinjɔr ɓai dõ aw ɓe lon. 8Lon bakad koosɨg oon nya 'nten ye, ɓool tɔld, ad ɔsɨn gon Luwah'n ad deg tɔg kɨtɔi titbe.

Jeju kun Matie

(Oo Mrk 2:13-22; Luk 5:27-39)

9Jeju ɓai lot'n non, a tɔi la oo de mad, tɔa i Matie, ndɨ lo tirr nyat. Ela an: I ndulo gom.

Na Matie ɓai, ndulo goa. 10Jeju ndɨ sanya kuju lo Matie, na ngétirrnyag kɨ ngéɗamajalg ngãibe ndɨ san nya nat kɨ Jeju sed ngéndoog loa. 11Parisɨg oon nya 'nten, na elɨn ngéndoog lo Jeju anan: Kɨtɔɗi ngendoosɨ ndɨ san nya sed ngétirrdɔnyag kɨ ngéɗamajalg a?

12Na Jeju oo dɔ ta lod, na el an: Deg kɨngerongang hã a geen dɔktor al, na ngérotog tã. 13Awɨn, na i ndoon ger girr ta 'nten: M'ndig kamkẽ tã, na kadkari dãg kɨjakɔ al. M'ɗe kɨta deg kɨdenesew al, na kɨ m'kun ngéɗamajalg tã.

Ngéndoog lo Jã ndɨjen ta Jeju dɔ kɔg ro nyasat

(Oo Mrk 2:1-2; Luk 5:33-39)

14Kamla ngéndoog lo Jã ɗen ro Jejut, na anan: Kɨtɔɗi jĩ kɨ Parisɨg kɨ ndɨ kɨ j'ɔg roj nyasa kɨ nja nat, na ngéndoog loi ɔgɨn rod nyasa al a?

15Jeju turd an: Lon ngetaa dekɨdẽ kij ndɨ nat ɓaitɔ kɨ namɨng'n kund kɨ lo mburr ngawt ye, namag a hɔn ndo oo? Be al. Na kaglo a ɗe nõ, lon a unɨn ngetaa dekɨdẽ kij dandt kɔ kamla a ɔgɨn rod nyasa ye.

16De kɨ a un takub kɨ kij lan lew konkub goto. Kɨtɔ takub kɨ kij'n non a un tagahj konkub kɨ tant, na tɨla a tee bo tɔi kɨ kete. 17De a ut kasɨnduu kɨkij kam kon ɓirgt al. Kɨtɔ ĩla titbe al a ne, ɓirg a ndun, ad kasɨnduu tĩkɔ, na ɓirg tujɨn. Na ndɨ utɨn kasɨnduu kɨkij kam ɓirgt kɨkij, ad kasɨnduu kɨ ɓirg tu ngomɨnd maj.

Jeju yoot dekɨdẽ ngemõi mosɨ, na aj ngon Jairus kɨdẽ

(Oo Mrk 5:22-43; Luk 8:40-56)

18Lon Jeju ndɨ eld tag'n non ɓaitɔ ye, de mad kɨ i kɨbog lo Juipg ɗe, ndɨ kɨ dɔgojɨn, ɔsɨ dɔn ber nõat, na an: Ngonɨm kɨdẽ oi tajigla, ye i ɗe, i nda jii dɔat, na a ɓai ndɨ kumkajir.

19Jeju ɓai dõ, na aw goat, kɨ ngéndoog lon.

20Na oon, dekɨdẽ mad kɨ mosɨ ũa ɓal kɨlah gidaijoo ɗe ko gid Jejut, ɔd ta kub loa. 21Kɨtɔ el kamɨnt an: Ĩla m'ngaa ɗob kɔd ta kub loa koon a ne, m'a m'yoot.

22Jeju tur ron, na lon ooa ye, ela an: Ngonɨm kɨdẽ, i hɔ roi bá, kadkam loi yooti.

Kagloat'n non dekɨdẽ yoot.

23Lon Jeju tee ta kujt lo kɨbo lo kuj kawna lo Juipg, na oo ngékun towg kɨ deg koosɨg ɗa kɨsen ye, 24eld an: I hɔn rosɨ kɨgog. Ngonkɨdẽ oi al, na ɓi la to ɓi ye.

Na deg gona raka. 25Lon tuɓa bakad koosɨg kɨtɨga woi a ne, Jeju ud kuju, hɔ ji ngon kɨdẽ, ad ngon kɨdẽ ɓai dõ. 26Hoi nya 'nten tĩ kɨgo log tube kɨ dɔningt'n non.

Jeju yoot mundog joo

27Jeju ɓai nõbe a tɔi, na mundog joo a ndulon goa a kon kɨ ndid kɨbobo anan: Ngon Dabid, oo kumtondo loj.

28Lon Jeju ɗe ud kuju ye, mundog ɗen roat, na Jeju eld an: Adɨn kamsɨ kad m'asɨ ɗa nya 'nten e?

Turɨna anan: Ãã Bɨraɓe.

29Taa ne, Jeju ɔd kumd na an: Kɨ ɗa adsɨn kɨgo kadkamt losɨ.

30Kumd tee. Na Jeju ndad mber kɨtagɨn an: Oon dɔ maj: Ot kadɨn de mad ger nya'n ɗa nya ten.

31Na be kaa ne, tee ɔrrɨn kaha kɨgo log tube kam dɔningt'n non.

Jeju yoot de'n ndil kɨmajal i kamat ad elta set

32Lon tee ndɨ awɨn ye, oon deg madg ɗen roat kɨ de mad kɨ elta set kɨta ndil kɨmajal i kamat. 33Na Jeju tuɓa ndil kɨmajal kɔ, ngengangã dɔɔ elta. Bakad koosɨg'n ɗan ye, ta yad ad anan: De oo nya kɨ titbe Israelt nja kɨɗa al.

34Na Parisɨg anan: I kɨ tɔg ngar lo ndil kɨmajalg la ndɨ tuɓan ndil kɨmajalg kɔ ye.

Kõkam lo Jeju kɨta koosɨdeg

(Oo Mrk 3:6-19; Luk 6:12-16; 10:2)

35Jeju a lago ɓebog tube kɨ nganɓeg, a ndoo deg kam kuj kawnat lo Juipg, a la mber Hoita kɨmaj lo kõɓe, a yoot mõig kɨ dang dang, kɨ yotog tube. 36Na lon oo bakad koosɨg ye, ta õ kama kɨtad, kɨta ɔrɨn rɔkɨ, na tɔgd goto, tit batg kɨ ngekuld goto be. 37Taa ne, el ngéndoog lon an: Nyako mbuj ngãibe, na ngéjaa ĩn tẽbe. 38Kɨtɔ 'nten i kɔ'n Bɨraɓe kɨ ngenyako kad la kɨ ngéɗakɨla kam ndɔɔt lon kad jan nyako loa.

Zur Zeit ausgewählt:

Matie 9: MlL

Markierung

Kopieren

Vergleichen