Matie 28
28
Jeju ɓai lo koit
(Oo Mrk 16:1-8; Luk 24:1-12; Jã 20:1-20; 1 Kor 15:4-7)
1Go ndɔ taakòt, ndɔt kɨ dasabang lo ndɔg kɨtanãimɨta, kɨ sĩ ritit, Mari kɨ Magdalat kɨ Maɗi kɨmad awɨn koo dɔɓadt. 2Na oon, dɔning yee yɨkɨtyɨkɨt: Malaika lo Bɨraɓe ɗisɨ ko dɔrãt, ɗe nduɓɨr mbal kɨ ta ɓenint kɔ, na ndɨ ber dɔt. 3Roa tit tel ndii be, kub loa nda ngũng tit ndàbul be. 4Ɓool tɔl ngéngomlog sɔkɨr, ndadɨn yatɨt, tuson tit dekɨkoig be. 5Na Malaika elta dekɨdẽg an: Ot ɓoolɨn. M'ger kad i ndɨ i sahn Jeju'n gana kagdosɨt. 6Goto labe, kɨta ɓai lo koit tit'n elɨn nõ; i ɗe oon lon tot. 7Na awɨn kanangbe elɨn ngéndoog loa anan: Ɓai ku ngékoigt, na oon ndɨ aw nõsɨt Galilet, nu la a oona tit ye. Ĩla m'elsɨ nõ.
8Telɨn kɔ dɔɓadt kanangbe kɨ ɓool kɨ ronel ngãi, ãin ngɔd ɔrrɨn hoia ngéndoog loa. 9Na oon Jeju a ɗe kɨ rodt na eld an: M'ɗasɨ lapia.
Dekɨdẽg awɨn kɨ roat, hɔn nja, na ɔsɨn dɔd ber nõat. 10Kamla Jeju eld an: Ot ɓoolɨn. Aw elɨn ngankomg kad awɨn Galilet. Nu la a oomɨnt ye.
11Lon ĩn ɗobo ɓaitɔ ye, deg madg ku ngéngom dɔɓadt awɨn kam ɓebot elɨn ngéjanyamosɨkadkari kɨbog ta nyag tube'n ɗa nya nõ. 12Lon ngéjanyamosɨkadkari kɨbog kawɨn na kɨnat sed kɨ kɨbog lo Juipg, na ɔjɨn na ta woi ye, adɨn nar kɨ kɔra asɨ tatbe ngéɗɔɔg, na anan: 13Ka ta 'nten la ka elɨn ye: Ngéndoog loa ɗe ɓoogɨna ndɔ lon kɨ to kɨ ɓin. 14Na ĩla ta'n non so mbi ngekõɓet a ne, jĩ la j'a kɨ gɔra, na j'a kɨ ɗa kad ɓool ɗasɨ al.
15Ngéɗɔɔg taan nar, na ɗan kɨgo tat'n elɨnd. Ta 'nten tɨnda tĩn kɨ ro juipgt mbã ɓone.
Jeju tee hɔi kɨ ro ngéndoogt lon
(Oo Mrk 16:14-18; Luk 24:36-49; Jã 20:19-23; Knk 1:6-8)
16Na ngéndoog loa kɨkɨlah gidaikɨɗa awɨn Galilet, dɔ mbalt'n Jeju dad. 17Lon oona ye, ɔsɨn dɔd ber nõat, na kɨmadg ɓadɨn. 18Jeju ɗe rodt, na eld tag 'nten: Tɔg tube kɨ kam dɔrãt kɨ kɨ dɔningt admɨn. 19Kɨtɔ 'nten awɨn, i telɨn girrdeg tube ngéndoogt lom, i ɗand baptem kam tɔ Bɔwt, kɨ kɨlo Ngon, kɨ Ndil Kɨkunjɗang. 20I ndoond kad ngomɨn go nyag tube'n m'ndasɨ mberd, na oon, m'a mĩ nat sesɨ kɨndɔgbe mbã dɔngoi kohn ɗan.
Zur Zeit ausgewählt:
Matie 28: MlL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mbai Bible Revision © Bible Society of Chad, 2015.
