Matie 14
14
Koi Jã ngeɗa deg baptem
(Oo Mrk 6:14-29; Luk 9:7-9)
1Kaglot'n non Herod kɨ ngekõɓe oo hoi Jeju. 2El ngan ngékɨlag lon an: De'n non i Jã kɨ ngeɗa deg baptem. Ĩla ɓai ku ngékoit; ĩ nõ la tɔg ɗa nyag kɨ yaya ndɨ ɗan kɨla kamat ye.
3Kɨtɔ maɗi Herod ad hɔn Jã, dɔɔna, lana dangait kɨta ta lo Herodiad; kɨ nẽ Pilip, kɨ ngonkõ Herod; 4kɨta Jã el Herod an: I goɗobat al kad i taa nẽit.
5Herod ge ngãi kɨ'n tɔl Jã, na ɓool koosɨg'n oon ta kiã ngekelta kɨ ta Luwaht. 6Na lon ndɨ ɗan nah ndɔ kooj Herod ye, ngon Herodiad kɨdẽ tee ndom dan mbahgt, na nel Herod, 7ad un kɔ'n kɨ yokɨnda ada an: Nya ɗi ndɨjen a ne, n'a n'ada. 8Taa ne, kõ ngon sɨlaa ad el Herod an: Adɨm dɔ Jã ngeɗa deg baptem labe kam bugurt.
9Kam ngar il bɨrɨm, na kɨta yog'n nda nõ mbahg'tn ndɨn sia ta nyasat ye, ndamber kad adɨna dɔ Jã; 10la ad gangɨn dɔ Jã kam dangait. 11Ɗen kɨ dɔa kam bugurt adɨn ngon kɨdẽ. Ngon kɨdẽ ta ad kõn. 12Ngéndoog lo Jã ɗe unɨn ruma a kɨ duwɨn na aw ɔrrɨn hoia Jeju.
Jeju ad nyasa deg dub mi
(Oo Mrk 6:30-44; Luk 9:10-17; Jã 6:1-14)
13Lon Jeju oo hoi nya'n non ye, ɓai nõbe al kam toot aw sãi lot mad kɨ de gotot. Taa ne, koosɨdeg oon dɔ ad teen kam ɓegt lod kɨ dang dang awɨn goat kɨ njad. 14Lon Jeju ɗisɨ kam toot, tee tɨga ye, oo koosɨdeg ngãibe, ad ta õ kama kɨtatɔd, na yoot mootg lod. 15Lon lo sɔl woi ye, ngéndoog loa ɗen roat anan: Lo 'nten i dɨlalo kɨ de gotot, na kaglo tɔi woi ho ye i nyakoosɨdeg ad awɨn, kam ngan ɓegt kad ndugon nyasad.
16Na Jeju eld an: I goot kad awɨn titbe al: Na ĩn kɨɓeg kɨ adɨnd nyasa.
17Na elɨna anan: Nya mad goto jijt la, na bɨna nduj kɨ lɔi mi kɨkanj joo be koon.
18Jeju eld an: I ɗen ne kɨromt so.
19El koosɨdeg kɨ ndɨn ber dɔ mut, ɔi bɨna nduj kɨ lɔi kɨkanj kɨ joo'n non, na un kumɨn kɨ dõ dɔrãt, ndub Luwah, kamla hɔ bɨna tet, ad ngéndoog, na ngéndoog taa luɓon koosɨdeg. 20Ĩn tube san, ndenɨn; na ngéndoog loa ɔin budag kɨ nãi, ɗoosɨ jàng kɨlah gidaijoo. 21Ĩgɨn san ye, ĩn dekɨdɨngãg kɨ asɨn dub mi nõ kari, kɨkanj tɨda dekɨdẽg kɨ ngang.
Jeju ndia dɔ baht
(Oo Mrk 6:45-56; Jã 6:15-21)
22Kanangbe, Jeju ɔsɨ ngéndoog lon tõtõ kad andɨn kam toot, kɨ awɨn kete nõt ta baht ko nu, na ɗa ɓaitɔ, kɨ'n nyakoosɨdeg n'ad awɨn kamtã. 23Goot, lon nyakoosɨdeg ad awɨn woi ye, al dɔ mbalbot kɨ nelta kɨ Luwah, sãi kad degt. Lon lo sɔl woi Jeju ndɨ nõbe kɨ kɨɗanbe. 24Na too i de'n bahbot woi, hul man ndɨ ɔsa pɨkapɨka kɨta nél ndɨ la kɨdɔdt. 25Denlot kɨ tet, kɨ ko kɨnja kaw wai, Jeju a ɗe kɨ rodt, a ndia dɔ baht. 26Lon ngéndoog oona a ndia dɔ baht ye, kamd gang ngalang, anan: I ma de.
Ɓool tɔld sɔkɨr ad koon mbiting. 27Jeju eld ta kanangbe an: Iren kamsɨ, i mĩ, ot ɓoolɨn.
28Pierr tura an: Bɨraɓe ĩla i ĩ a ne, elɨm ad m'aw roit dɔ mant.
29Jeju el an: I ɗe.
Pierr tee kam toot, ndia dɔ mant, ndɨ aw kɨ ro Jejut. 30Na lon oo nél la kɨ tɔgɨn ye, ɓool ɗaa ad mbagɨr kun man, ga tan kot an: Bɨraɓe ajɨm.
31Kanangbe Jeju la jin hɔan, ela an: De kɨ ngekadkam kɨ tẽbe, kɨtɔɗi i ɓadɨn a?
32Lon andɨn kam toot nél dɨba. 33Deg'n ndɨn kam toot ye, ɔsɨn dɔd ber nõ Jejut, na elɨna anan: Rota ĩ ngon Luwah.
Jeju yoot ngémõig kɨ Jenejaret't
(Oo Mrk 6:53-56)
34Lon gangɨn bah woi kamla, got teen dɔning Jenejaret't. 35Deg kɨ dɔningt'n non gerɨna, i Jeju, la elɨn kɨgo log tube'n gug dɔd, ad deg ɗen kɨ ngérotog tube roat. 36Kɔna kad nyad ad n'ɔdɨn takub loa koon. Deg tube'n ɔdɨn ye yootɨn.
Zur Zeit ausgewählt:
Matie 14: MlL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mbai Bible Revision © Bible Society of Chad, 2015.
