Matie 13

1Ndɔt'n non Jeju tee kuju, aw ndɨ ber ta bahbot. 2Deg koosɨg kawɨn na kɨ roat, ad al kam toot, ndɨt ber, na koosɨg ɗan dõ dɔ gɔsɨ baht.

Terrta dɔ ngeduw nyakot

(Oo Mrk 4:1-9; Luk 8:4-8)

3Jeju eld nyag ngãibe kɨ terrtag an: Oon be, ngeduw nya tee kad kɨ'n duw nyako. 4Lon ɗa duw nya ye, kumnya madg tuson dɔ ɗobt ad yelg ɗe õn. 5Kɨmadg tuson dɔning wort, lot'n hã ngahn ningbu tit ngãi al, ɓan kanangbe kɨta ngahn ning kɨ wo kɨber al, 6na lon kàd ɓai kɨ dõ ye, gad ad tutɨn kurum kɨta ngɨrad aw ber ngãi al. 7Kɨmadg tuson dan kongt, kong ɓa tɔgɨn, utɨn dɔd. 8Kɨmadg tuson dɔningt kɨmaj, na ndɨ teen kɨ kand'd. Kumnya kɨkɨɗa and ɓu, kɨmad and dɔkɨbojidet, kɨmad and dɔmɨta.

9Kamla Jeju el an: De'n ndɨ kɨ mbin kɨta koon dɔ taa ne, kɨ oo dɔ.

Girr ndoo nyan Jeju a ndoo deg kɨ terrtag

(Oo Mrk 4:10-12; Luk 10:9-10)

10Ngéndoog lo Jeju ɗen roat, elɨna anan: Kɨtɔɗi i ndɨ eldɨn ta kɨ terrtag a?

11Jeju turd an: kɨta ĩn la adsɨn kad i gerɨn nyag kɨ mund lo kõɓe kɨ dɔrãt dõ ye, na adɨn ĩgɨn ɗan non kad gerɨn al. 12Kɨtɔ dekɨɗen hã ndɨ kɨ nya a ne, a adɨna dɔt, na a ndɨ kɨ dan nyat kɨ to mbuj mbuj; na de'n nya loa goto a ne, ĩ kɨ ngon tẽbe'n to jiat nõ kaa a taana. 13Oon be, i kɨta'n non la m'ndɨ m'eldɨn ta kɨ terrtag ye, kɨta ndɨ oon lo kanj koo lo, ndɨ oon dɔ ta kanj koo dɔ ta kɨ ger girra tɔ. 14Titbe la nyag'n non ten dɔdt kad tɔlɨn ne ta ta lo ngekelta kɨ ta Luwaht Ejai'n an:

Koo dɔ ta nõ, a oon titbe, na a i gerɨn girra al,

koo lo kɨ kum taa, a i teen kumsɨ titbe oon ne, na a oon nya al.

15Kɨtɔ ngarkam deg'n ɗan nder gosɨr,

sɨlan mbid dikɨ dikɨ,

utɨn kumd mbukɨ ho,

na ɓeta n'oon kɨ kumd, sɨlan

mbid, na ɓeta n'oon dɔ ta kɨ mbid, adɨn kamd kongkong

na ɓeta ngarkamd tel kɨ romt, ad m'yootd.

16Na ĩn, ĩn kɨ ronel kɨta kumsɨ ndɨ oo, na mbisɨ ndɨ oo dɔ. 17Ta kɨ rota la m'ndɨ m'elsɨ nõ, ngékelta kɨ ta Luwaht kɨ deg kɨdenesew ndigɨn ngãibe kɨ n'oon nyag'n i ndɨ oon nõ, na oon al, kad'n n'oon dɔ nyag'n i ndɨ oon dɔ nõ, na oon dɔ al.

Jeju ɔrr girr terrta kɨ dɔ ngedubnyat

(Oo Mrk 4:13-20; Luk 8:11-15)

18Kɨtɔ 'nten ĩn, kɨ oon dɔ girr terrta kɨ dɔ ngedubnyat. 19Lon de mad oo dɔ ta kõɓe, na ger girra al a ne, ngemajal ɗe gaw ta'n duwɨn ngarkamat nõ. Ĩ la i kumnya kɨ tuso dɔ ɗobt ye. 20Dɔning worg'n kumnya tusot ye, ĩ la i de'n ndɨ oo dɔ ta, na kɨ tajigtbe taa kɨ ronel; 21na lon kamkɔl ke dãro ndo ɓai kɨta ta lo Luwah a ne, kanangbe tɔrr jin girr tat lo Luwah'n taa. 22Kumnya'n duwɨn kam kongt la i de'n ndɨ oo dɔ ta lo Luwah, na soolg kɨ duniat kɨ goolg'n nyamajg ndɨ goolɨn na ndɨ utɨn dɔ ta lo Luwah, ad kanda tee al. 23Dɔning kɨmaj'n duwɨn kumnyat la, i de'n ndɨ oo dɔ ta, na ger girra maj, taa ndɨ tee kɨ kandɨn; kumnya kɨkɨɗa and ɓu, kɨmad and dɔkɨbojidet, kɨmad and dɔmɨta.

Terrta dɔ nyakot kɨmaj kɨ jor

24Jeju tee kɨ terrta mad ad'd an: Kõɓe kɨ dɔrãt i tit de'n dub kumnya kɨmaj kam ndɔɔt lon. 25Na lon deg to ɓin ɓaitɔ ye, madngétaa ɗe dub jor kam tẽit, na tɔi aw. 26Na lon nyako ɓa tɔg, mbã ooj dɔn kamla jor tee kɨ dɔn ho ye. 27Ngéɗakɨla kad ngeɓe ɗe elɨna anan: Bɨraɓe, kumnya kɨmaj ala i dub kam ndɔt loi yo? Na jor'n ɗan ye tee ɗa?

28Eld an: I madngéta mad la ɗa nya'n non ye. Ngéɗakɨla loa elɨna anan: Ye i ndig kad j'aw kɨ retd kɔ ɔ?

29Na eld an: Ãã, be al, na ɓeta lon i ɗa i retɨn jor a ne ɔrrɨn ne tẽi nat sia. 30I soot kad i nyand tu joo ad tɔgɨn nat mbã ɓal ndɔ; dɔnah tet nyakot a ne, m'a m'el ngétet nyako m'an: I kawɨn jor kɨ nat; i dɔɔn sĩgat kad i lan horr kete kamtã; na i kawɨn tẽi kɨ kam damt lom.

Terrta dɔ kum mutardt

(Oo Mrk 4:30-32; Luk 13:18-19)

31Jeju tee kɨ terrta mad tɔ eld an: Kõɓe kɨ dɔrãgt tit kum mutard'n de mad un dub kam ndɔɔt lon. 32Kum mutard duu tɔi kumnyag tube, na lon ɓa tɔg woi a ne, tel bo tɔi mbikam tãg, tel kag, ad yelg kɨ dõ ndɨ ɗe ɗan kujd dɔ jiagt.

Terrta dɔ berrkasɨt

(Oo Luk 13:20-21)

33Jeju eld terrta mad kɨɗang an: Kõɓe kɨ dɔrãgt titberrkasɨ'n dekɨdẽ mad un, lɔi'n nduj kɨ asɨ kam ngotɔrrnya mɨta, mbã ad nduj kɨ lɔi kɨtaagbe ɓai.

Kɨtɔɗi Jeju ndoo deg kɨ terrtag?

(Oo Mrk 4:33-34)

34Nyag'n non tube Jeju el koosɨdeg kɨ terrtag, na eld nya mad kɨɗa kanj terrta al, 35kɨtakad tɔlɨn ne ta ta'n ngékelta kɨ ta Luwaht elɨn anan:

M'a m'tee tam kɨ m'elɨn terrtag,

m'a m'kɨja nyag'n i kɨ yaro lo la girr duniat nu.

Kɔrr girr terrta kɨ dɔ tẽit kɨ jor

36Kamla Jeju nya bakad koosɨg ad awɨn na and kuju. Taa ne, ngéndoog loa ndɔt'n kɨ roat anan: Ɔrrj girr terrta kɨ dɔ jort kɨ kam ndɔɔt'n non.

37Jeju tur an: De'n dub kumnya kɨmaj i Ngon de. 38Ndɔɔ i dunia; kumnya kɨmaj i ngang kɨ kõɓet, jor i ngan ngeɗamajal. 39Madngétan dub jor i Sɨtan, ɓalndɔ i dɔngoi dunia'n ɗan, ngétet nyako ĩn malaikag. 40Tit'n a retɨn ne jor lan horr ye, i titbe ho la nyag a ɗan ne nya dɔngoi duniat ho ye. 41Ngon de a la malaikag lon ĩgɨn a kawɨn nyag tube'n ndɨ gan deg gigt, kɨ deg tube'n nyaɗad i kɨgo mberkɨndat al, a ɔrrɨn deg'n non kɔ kad andɨn kam kõɓet lo Luwah al; 42na a ũnd kam horr Jahanamat kɨ kõ giling giling; nu la a nont, na ngorɨn ngangd mormor. 43Na deg kɨdenesewg taa ne, a unjɨn gid gid tit kàd be kam kõɓet lo Bɔwd. De'n ndɨ kɨ mbin a ne, kɨ oo dɔ.

Terrta dɔ nyamajt kɨ yaro

44Kõɓe kɨ dɔrãt i tit nyamajg kɨ mbõn i kɨ yaro kam ndɔɔt, na de mad ɓa dɔt; yaro gog; na roa nela ngãi ad aw a kɨ ɗaw nyag lon tube kɔ ndugon ndɔɔn non. 45Kõɓe kɨ dɔrãgt tɔ tit ngeɗagat mad'n a sah med kɔsɨ kɨmaj. 46Lon ngah med kɔsɨ mad kɨ gata i ngãi ye, aw a kɨ ɗaw nyag lon tube kɔ ndugon.

Terrta dɔ bandbɨrat

47Kõɓe kɨ dɔrãgt tɔ i tit bandbɨra'n deg ũn kɨ kam bahbo kat't, ad hɔ kanjg kɨɗen kɨ dang dang kɨ nat. 48Lon ɗoosɨ woi ye, tuin bandbɨra'n non kɨ bɔgbaht, kamla ndɨn ber, kawɨn kanjg kɨmaj maj kɨ nat kɨ kam kúgt (ɗugt) na ũn kɨmajalg kɔ. 49A i titbe ho dɔngɔi duniat: Malaikag a ɗen na a tɔrrɨn deg kɨmajalg kɔ ku degt kɨdenesew; 50a ũn deg kɨmajal kam horr purrt kɨkõ giling giling, nu la a nont na a ngorɨn ngangd mormor ye.

Ta dɔ nyamajgt kɨ kij kɨ kɨkõ

51Jeju el an: Oon girr nyag'n non tube e?

Turɨna anan: Ãã. 52Na Jeju eld an: Titbe taa ne ngendang maktub kɨɗen'n ndoo ta maj dɔ nyagt kɨ kõɓet kɨ dɔrãgt ye, i tit kɨ de kɨ ngeɓe'n ndɨ ɔi nyag kɨ kij kɨ nyag kɨkõ kam nyamajgt lon kɨɓɔ.

Deg kɨ Najaret't mbetɨn Jeju

(Oo Mrk 6:1-6; Luk 4:16-30)

53Lon Jeju el terrtag'n non tɨga woi ye, ɓai nõbe tɔi, 54tel ɗe ɓe lon, ɗa ndoo deg kam kuj kawnat lod, ad taa ya deg'n oon dɔ ta loa ad elɨn anan: De'n ndɨn, ngah terr kɨ kɨlag kɨ yaya'n non ye ko ɗa a? 55I ngon sarpentie ye a la ndɨn ya? Tɔ kõa i Mari ale? Na Jak kɨ Jojep kɨ Simõ kɨ Jud ĩn ngankõa ho ale? 56Ngankõag kɨdẽg tube ndan ɓe nat sej nẽbe ale? De'n ndɨn ngah nyag 'nten tube kokɨɗa a?

57Oon Jeju nya gagigt kɨtad ad adɨna kamd al. Jeju eld an: Ngekelta kɨ ta Luwaht a ngah kɔsɨgon kɨ log tube, na kam ɓe koojat kɨ kam kujt loa taa ne, a ngah kɔsɨgon tit al. 58Ad Jeju ɗa nyag kɨ yaya kam ɓet kɨ Najaret al kɨta kam kongkong lod.

Zur Zeit ausgewählt:

Matie 13: MlL

Markierung

Kopieren

Vergleichen