Matie 11
11
Jã ngeɗa deg baptem la ndɨje ta Jeju
(Oo Luk 7:18-35)
1Lon Jeju nda mberg'n non ngéndoog lon kɨkɨlah gidaijoo tɨga woi ye, ɓai nõbe a kɨ ndoo deg na la mber Hoita kɨmaj kam ɓebogt lod ho. 2Jã i kam dangait, na lon oo hoi kɨlag'n Krist ɗa ye, la ngéndoog kɨ ndɨjena anan: 3Ĩla ĩ ngeɗe yo? Ke ndɨ kɨ ngoo de mad kɨɗang a?
4Jeju turd an: Awɨn a kɨ ɔrrɨn Jã hoi nyag'n oon dɔ kɨ ĩgɨn oon kɨ kumsɨ. 5Mundog ndɨ oon lo, mootg a ɓan ning, ngébanjg yootɨn, mboog oon dɔ ta, ngékoig tɔsɨ ndoolɨn, na ndɨ lan mber Hoita kɨmaj ngéndog. 6Ngeronel la i de'n ndɨ mbet kadɨm kamɨn al ye.
7Lon ngéndoog lo Jã son ɗobo woi ye, Jeju mbagɨr kelta dan dɔ Jã an: Awɨn kam dɨlalot kɨ de gotot koo ɗit a? Aw kɨ oon kad nya mad kɨ nél ɗa yeea a? Ãã. 8Na awɨn koo ɗit a? Awɨn koo de madt kɨ ngelakubg kɨ gatd i ngãi a? Oon so. Ngélakubg kɨ gatd i ngãi ĩn kam kujgt lo ngarg. 9Na awɨn koo ɗit wa yo? Awɨn koo ngekelta kɨ ta Luwaht a? Ãã, m'elsɨ, de'n aw oona i kɨ tɔi ngékelta kɨ ta Luwaht sãi. 10Kɨtɔ Jã i de'n ndangɨn ta dan ne dɔa kam maktubt anan: Oon. M'ndɨ m'la ngombangkɨla lom kete nõit, kad ɗago ɗob loi nõit.
11Rota la m'ndɨ m'elsɨ ye, ku ĩgɨtɨn dekɨdẽg oojɨnd ye, de mad kɨbo tɔi Jã kɨ ngeɗa deg baptem goto na de'n i kɨdu kɨtɔi kam kõɓet kɨ dɔrãt dõ, i kɨbo tɔia. 12Maɗi nu kaglot lo Jã ngeɗa deg baptem mbã tajigla, deg ndɨ n'arɨn kõɓe kɨ dɔrãt dõ kɨ lo ngetɔgt, na ngétɔgg la ndɨ taan kɨ lo ngetɔgt ye. 13Kɨtɔ ngékelta kɨ ta Luwaht tube, kɨ mberkɨnda lo Moij elɨn ta ndɔ'n ne ndil dɔ kõɓet lo Luwah mbã teen dɔ Jãt kɨ ngeɗa deg baptem deg. 14Ĩla i ndig ger girr ta 'nten maj a ne, Jã'n non la i Eli'n ndɨ ɗe ye. 15De'n ndɨ kɨ mbin kɨta koon dɔ taa ne, kɨ oo dɔ.
16Na kɨ nõ m'a m'ɔjɨn deg kɨ tajigla'n ɗan a? Ĩn tit ngan kɨdug kɨ ndɨn suku, ndɨ kunɨn namdg, 17anan: Kɨ kun nal jadsɨ, na i ndomɨn al, kɨ tɔi panõ, na i ndan kadsɨ i non nẽ al.
18Kɨtɔ Jã ɗe, na oron nyasa kɨ nyakãi, na deg anan: I ngendil kɨmajal, 19Ngon de ɗe, na sa ho, ãi ho, na deg anan: I de kɨ ngesanya boot, ngekãi kasɨnduu boot, i nam ngétirr nya kɨ ngéɗamajalg. Na deg gerɨn terr lo Luwah, i kɨdenesew kɨtakul kɨlaɗaag.
Jeju ndang ɓebog'n oon dɔ ta loa, na mbetɨn tɔrrɨn ndid
(Oo Luk 10:13-16)
20Kamla Jeju mbagɨr ndáng ɓebog'n ɗakɨlag lon kɨ yaya ngãibe tit kɨta tɔrr'n tɔrrɨn ndid al. 21Jeju el an: Beto loi, ɓebo Korrasẽ. Beto loi ɓebo Besaida. Kɨtɔ ĩla neni ɗa'n kɨla kɨ yayag'n m'ɗa kusɨt kam ɓebo Tirrt kɨ ɓebo Sidõ a ne, neni tɔrrɨn ndid maɗi nu kɨ kub kɨlagum rodt, kɨ buhoor dɔdt.
22Na m'ndɨ m'elsɨ, ndɔ gangtat, takɨgang kɨ dɔ Tirrt kɨ Sidõ a to soot tɔi kɨ dɔsɨt. 23Na ĩ Kapernawm, oo a an a unɨn kɨ dõ mbã dɔrãt e? A i ɗisɨ kɨber mbã kɨ kam lot kɨ koo. Kɨtɔ neni ɗan kɨlag kɨ yaya kam ɓebo Sodomt tit'n ɗan ne kamit a ne, neni a ɗa be mbã ɓola. 24Na m'ndɨ m'elsɨ, ndɔ gangtat, takɨgang kɨdɔ dɔning Sodomt a to soot tɔi kɨ dɔit.
I ɗen kɨ romt kad i ngahn lo taakò
(Oo Luk 10:21-22; 1 Kor 1:26-29)
25Kaglot'n non Jeju el an: M'ndɨ m'tɔii Bɔw Bɨraɓe kɨ dɔrãt kɨ dɔning, kɨta yan i ya dɔ nyag'n non ko ro ngéterrgt kɨ ngékumtɔg, na i tee dɔd ad ngan kɨ dug oon.
26Ãã Bɔw, i ɗa titbe, kɨta titbe la neli kad i ɗan ye.
27Nyag tube Bɔw la jimt; de mad kɨ ger Ngon goto, na Bɔw tã; de mad kɨ ger Bɔw goto, na Ngon tã, ala dekɨɗen'n hã Ngon ndig kad n'tee dɔa n'ad gera tã.
28I ɗen kɨ romt ĩn deg tube'n ndɨ ɔrrɨn, ĩn ngétonya kɨ kɔi, na m'a mad i taan kò. 29Unɨn jug lom kɨ kɔsɨt, i ndoon romt, kɨta mĩ de kɨ sayelɨl kɨ ngekamsɔl, na a i ngahn lo taakò kɨta rosɨ. 30Kɨtɔ jug lom i kɨ sɔlom, nya to lom i kɨ kɔi al, tɔ.
Zur Zeit ausgewählt:
Matie 11: MlL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mbai Bible Revision © Bible Society of Chad, 2015.
