Matie 10
10
Jeju kun ngéndoog lon kɨlah gidaijoo
(Oo Mrk 3:13-19; Luk 6:12-16)
1Kamla Jeju kun ngéndoog lon kɨkɨlah gidaijoo kɨ ront, na ad'd tɔg kad tuɓan ne ndil kɨyerrg kɔ, kad yootɨn ne mõi kɨɗen kɨ yoto kɨɗen. 2Tɔ ngéndoog kɨkɨlah gidaijoo la ten: Kɨ dasabang i Simõ'n a kunɨna Pierr, kɨ Andre ngonkõa; kɨ Jak ngon Jebede, kɨ Jã ngonkõa, 3kɨ Pilip kɨ Bartelemi, Tomas kɨ Matie kɨ ngetirrnya, Jak ngon Alpe kɨ Tade, 4Simõ de kɨ Kanat, kɨ Judas Iskariot, ĩn un dɔ Jeju.
Jeju la ngéndoog lon kɨkɨlah gidaijoo
(Oo Mrk 6:7-12; Luk 9:1-6)
5Ĩgɨn non la ĩn deg kɨkɨlah gidaijoo'n hã Jeju lad, na ndad mberg 'nten an: Ot kunɨn ɗob kɨ dɔ degt kɨ gerɨn Luwah al, kɨ andɨn kam ɓegt lo Samariag al ho.
6Na maj kad awɨn ro batgt kɨ ɓe lo Israel, kɨ nãin. 7Go ɗob kawsɨt, i lan mberta anan: Kõɓe kɨ dɔrãt i nderbe.
8I yootɨn mõig, i ndoolɨn ngékoig. I yootɨn ngébanjg ad arɨn. I tuɓan ndil kɨmajalg kɔ. I ngahn kari, adɨn kari ho. 9Ot kɔin lɔr, kɨ nar kɨ nda, ke nar ningakasɨ, kam ndardɔɓosɨt; 10ke ɓɔl kawɨmbah, ke kub joo, ke sanjag, ke gɔlkɔp, kɨta ngeɗakɨla asɨta nyasan.
11Ɓebo kɨɗen, ke ngonɓe kɨɗen hã a andɨnt a ne, i ndɨje oon, ĩla de kɨ kasɨ hɔsɨ kɨ ront ndɨt nõ a ne, ka i ndɨn ɓe loa mbã i ɓain ne. 12Lon i ndɨ andɨn kam kujt a ne, elɨn anan: Lapia losɨ.
13Ĩla kuj'n non asɨ kad hɔsɨ kɨ ront a ne, kɨ lapia losɨ ndɨ dɔat; na ĩla asɨ hɔsɨ kɨ ront al a ne, kɨ lapia losɨ tel kɨ rosɨt. 14Na ĩla de hɔsɨ kɨ ront al, oo dɔ ta losɨ al ho a ne, i teen kam kujt'n non, ke kam ɓebot'n non, na i ndan bu kɨ danjasɨt kɔ. 15Ta kɨ rota la m'ndɨ m'elsɨ ye, ndɔ gangtat, takɨgang dɔ deg kɨ Sodomt kɨ Gomor a to soot tɔi ĩ kɨ dɔ deg kɨ ɓebot'n non.
Jeju ndoo ta deg dɔ darondot kɨɓet a ɗe
(Oo Mrk 13:9-13; Luk 21:12-17)
16Oon, m'ndɨ m'lasɨ tit batg be dan bisɨkologt, kɨta 'nten i ndɨn kɨ kumtɔg tit lig be, kɨ ĩn ngenuj nya al tit derrngɔtg be. 17Na oon go rosɨ maj ro degt: Kɨtɔ ɓet a lasɨn ji ngégangtagt, a ndasɨn kɨ ndeh kam kuj kawnat lo Juipg. 18A awɨn sesɨ nõ ngékõɓegt kɨ ngarg kɨtatɔm, kɨtakad i man naj nõdt kɨ nõ ngéger Luwaht al ho. 19Lon a lasɨn jidt a ne, ot soolɨn Kana: Ta ɗi a kelɨn, ke titbãi a turɨn ne ta. Kɨtɔ dɔ kàdt'n non bábá, Bɔwsɨ a adsɨ ta kad elɨn, 20kɨta i ĩng hã a elɨn ta al, na Ndil Bɔwsɨ la ndɨ elta kamsɨt ye. 21Ngonkõ a un dɔ ngonkõ kad tɔlɨna, na bɔw a un dɔ ngonɨn; ngang a ɓai ndoorɨn ngékoojdg, ad tɔlɨnd. 22Deg tube a ɔsɨsɨn ta kɨtatɔm. Na de'n a hɔ ron bá mbã dɔboia a ne, ĩ la a aj ye. 23Lon deg a dan rosɨ ndo kam ɓebot mad a ne, ka ãin na kɨ kɨmadt. Ta kɨ rota la m'ndɨ m'elsɨ ye: A i lan go ɓebog kɨ dɔning Israelt wɔ al ɓaitɔ, na ngon de a ɗe.
24Ngendoonya tɔi bɨrangendoon al, ɓer tɔi ngeen al ho. 25Asɨ kad ngendoonya ĩ tit bɨrangendoon be, na asɨ kad ɓer tit ngen be ho. Ngeɓe na kunɨna Beljebul ye la, ngékɨɓe loa tã ã?
Jeju el ngéndoog lon kad ɓoolɨn deg al, na maj kad ɓoolɨn Luwah
(Oo Luk 12:2-9; Mrk 8:38)
26Kɨtɔ 'nten ot ɓoolɨnd; kɨta nya mad kɨ kut dɔ kɨ a unɨn nya dɔt al goto, ke nya mad kɨ yadɔ kɨ de a ger al goto. 27Ta'n m'ndɨ m'elsɨ gid tilt ndɨn, elɨn dankàda wang. Ta'n m'ndɨ m'ɔj kɨ mbisɨt, i lan mbera dõ dɔ kujgt. 28Ot ɓoolɨn deg'n ndɨ tɔlɨn dãro, na asɨn tɔl ro de kɨkeme al. Maj kad i ɓoolɨn Luwah'n asɨ nuj ro de kɨ dãro de tu kam Jahanamat. 29A ɗawɨn tĩtĩg joo kum sile kɨɗa ale? Na kɨkɨɗa kudt a so ber kɨkanj ndig lo Bɔwsɨ al. 30Kɨ losɨ taa, mbã bisɨdɔsɨg kaa dan kɔrd tube. 31Kɨtɔ 'nten ot ɓoolɨn, gatsɨ tɔi kɨlo tĩtĩg ngãibe.
32Kɨtɔ 'nten dekɨɗen a elta lom kɨtɨga wakɨsɨ nõ degt an: Nĩ de lom a ne, mĩ m'a m'elta loa kɨtɨga wakɨsɨ nõ Bɔwmt kɨ kam dɔrãt dõ m'an i de lom ho. 33Na dekɨɗen a maj ta gerɨm nõ degt a ne, mĩ m'a m'maj ta gera nõ Bɔwmt kɨ kam dɔrãgt dõ ho.
Jeju an n'ɗe kɨ lapia hã dan degt al na ɗɔɔ tã
(Oo Luk 12:51-53; 14:26-27)
34Ot gaan Kana: M'ɗe kɨ lapia dɔ degt kɨ dɔningt nẽ. M'ɗe kɨ lapia al, na kɨ kiyaɗɔɔ. 35Ãã m'ɗe m'nda ndoor mbɨna ngont kɨ bɔwa, mbɨna ngon kɨdẽt kɨ kõa, mbɨna mumt kɨdẽ kɨ muma kɨdẽ ho. 36Madngéta de a ĩn deg kɨ kam kujt loa.
Kɔrr ta ro kɔ balang kɨta ndulo go Jeju
(Oo Mrk 8:34-35; Luk 14:26-27)
37De'n ndɨ tar bɔw'n ala kõn tɔim a ne, asɨ ta kĩ ngendulo gom al; de'n ndɨ tar ngonɨn kɨdɨngã, ke kɨdẽ tɔim a ne, asɨ kĩ ngendulo gom al. 38De'n un kagdosɨ lon, na ndulo gom al a ne, asɨ kĩ ngendoo lom al. 39De'n ngom ron a ne, a laa kɔ, na de'n ndɨ la ron kɔ kɨtatɔm a ne, a ngaha.
Nyabajig
(Oo Mrk 9:37-41)
40De'n ndɨ hɔsɨ kɨ ront a ne, ndɨ hɔm kɨ ront. Na de'n ndɨ hɔm kɨ ront a ne, ndɨ hɔ Ngelam kɨ ront ho. 41De'n ndɨ hɔ ngekelta kɨ ta Luwaht kɨ ront kɨta kiã ngekelta kɨ ta Luwaht a ne, a ngah nyabaji kɨ kasɨ kɨ lo ngekelta kɨ ta Luwaht. De'n ndɨ hɔ dekɨdenesew kɨ ront kɨta kiã dekɨdenesew a ne, a ngah nyabaji kɨkasɨ kɨ kɨ lo dekɨdenesew. 42Dekɨɗen a un man ta man kɨ sɔl kam kɨlamant ad kɨkɨɗa ku ngangt'n non kɨta kiã ngombangkɨla lom a ne, m'elsɨ ta kɨrota a nal nyabajin al bat.
Zur Zeit ausgewählt:
Matie 10: MlL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mbai Bible Revision © Bible Society of Chad, 2015.
