Oje 9
9
Takɨgang dɔ Israelgt kɨtɔ awɨn kɨ ketekete kam yot kɨ ɗa
1Israel, ot ɗa ronel kɨ kamnda
tit'n hã girrdeg kɨ dang dang ɗan ne.
Kɨta i ɗakaya, i nya Luwah loi kɔ,
i ndig nyabaji kaya kɨ ɗa dɔ gar ndah nyakogt tube.
2Nyako kɨ ndah dɔ gart kɨ kand nduu kɨ ɓa lobaat a asɨ kuld al,
kasɨnduu kɨkij a dud.
3A ndɨn kam dɔningt lo Bɨraɓe gog al,
Epraimag a telɨn kɨ dɔning Ejipt't gog,
a san nyasa kɨyerr dɔning Asirit.
4A mbelɨn kadkari kasɨnduu kɨ kũ kɔ kad Bɨraɓe al.
Kadkarig lod kɨjakɔ a nelɨna al.
A ĩn tit nyasa lo deg kɨ ngéhɔndo be.
Deg tube'n a san a telɨn kɨyerr,
kɨta nyasa lod a i kɨta tɔl ɓood koon,
a andɨn ne kam kujt lo Bɨraɓe al.
5A i ɗan ɗi ndɔ kawnat
kɨ ndɔ ɗa nah lo Bɨraɓe a?
6Kɨtɔ oon, deg ndɨ awɨn sãi kɨ dɔning lod kɨnuj.
Kawɨnd kɨnat dɔning Ejipt't,
a duwɨnd ɓebo Mempis.
Hayag a ɓa utɨn londɨd'n nya larjãg lod kɨ gatd i ngãi,
ĩn tit, ngarg a ɓan kam kujkubgt lod.
7Ndɔg kɨta gangta ɗen woi,
ndɔg kɨta nda ngɨra ɗen tɔ.
Israel a ger.
I ndɨ elɨn anan: Ngekelta kɨ ta Luwaht,
kurdɔa oi.
I ngenyahan ndɨ elta papa
kɨta ɗagootal losɨ kɨngãi
kɨ taɗɔɔ losɨ kɨdum.
8Ngekelta kɨ ta Luwaht i ngéngomlo kɨjeje ku degt lo Luwah
ad i Epraim; na yan gum dɔ ɗobgt loa,
ĩn deg ndiant mbã kɨ kam kujt lo Luwah loa.
9I son kam majalt kɨ wokɨɓing
tit'n i ɗan ne lot kɨ Gibea maɗi.
Luwah a ga kamɨn dɔ ɗagootal lod,
na a nda ɔjd kɨtɔ majal lod.
10M'ngaa Israel
tit kand nduu kɨ kam dɨlalot.
M'oo bɔwsɨg
tit kand mbaiɓood kɨ and dasa ɓal kandat kɨdasa be.
Na bɔwsɨg lon ten Baal-Peort,
adɨn rod yo Baal,
telɨn kɨyerr tit yo Baal'n tarɨna nõ.
11Tɔko lo Epraim goto,
ɓai aw kɔ tit yel be.
Koojna goto,
dekɨdẽ Kokam goto,
ndah kohna goto.
12Ke neni ton ngang kaa ne,
m'a m'ad'd oin mbã kad de goto.
Beto lod, lon m'nyad kɨnõbe.
13Epraim lon m'ooa i tit ɓebo kɨ Tir be.
Epraim i kɨ hɔ kam ndɔɔt kɨmaj dum
na Epraim aw kɨ ngang kɨ ro ngetɔldt.
14Ad'd nya mad Bɨraɓe.
Ɗi a i ad'd a?
Ad'd nẽdg telɨn kujg
kɨ mbaad kɨ ãi al tɔ.
15Girr majal lod tube i kam ɓet kɨ Gilgal,
nõbe la m'mbagirr kɔsɨd ta tit ye.
Kɨtɔ kɨlaɗag kɨmajal,
M'a m'tuɓad kam kujt lom kɨtɨga,
M'a m'tard gog al.
Mbaiɓeg lod tube ĩn ngétaɗɔɔg.
16Ndan Epraim ad ngɨraa tut,
a tee kɨ kand gog al.
Ke oojɨn ngang kaa ne,
m'a m'tɔl ngandg kɨ ngétar lod.
17Luwah lom a mbetd kɔ
kɨta oon dɔ ta loa al,
a ĩn ngékaw kɨ njad dõ ku girrdegt kɨ dang dang.
Zur Zeit ausgewählt:
Oje 9: MlL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mbai Bible Revision © Bible Society of Chad, 2015.