Jenesis Nuarin-tas alupas 11.
Nuarin-tas alupas 11.
1 Intas et ethi an nobohtan. 3 Er actaig inmaliyum Bebel. 5 Et auahas intas ura a Atua. 10 Ilpu mapoi Sem. 27 Intas vai Tira etmai Ebram. 33 Et udei inpece Ur a Tira, um yetpan an pece Heran.
1IS tup ethi ache nohra atimi asega an nobohtan, im intas ura.
2Eris ahes ara an nete o un, um atga, ja par ecetai nuarin marara is ethi an pece Sainar; eris amen eahki ara.
3Eris tastas jipe ara, um ika, Ti apan akaija um ago nebrik, um ahen upene. Is hat ura nebrik, is lep ubrei ura intan apol.
4Eris ika ara, Ti apan akaija um actaig inmaliyum, um lep actaig neom ijinies yi ethi yi ahlau jai an nohatag; um ati aktit nidaija, vai ti jim terimterim jipe akaija an nobohtan asega.
5Is asuol se pam a Ihova, mika yi almoi niji eom ura, im lep neom ijinies iyehki, eris actaig natimi.
6Is ika a Ihova, Era tup ethi ache natimi, um tup ethi ache intas ura; era atupun nauritai inigki ara: inyi ehka par acaiji ra vaig tah nitai era aktaktai ara mika eri ago.
7Intijmu asuol akataij, um han auahas intas ura eahki, mika eri jim ato jipe intas ura ara.
8Is imiterimterim ra a Ihova an nobohtan asega: eris eti lep actaig inmaliyum ura ara.
9Va nitai inigki eris anvi nidan nuarin iyehki par ika Bebel; is idim auahas intas o atimi asega eahki a Ihova: is lep imiterimterim ra a Ihova an nobohtan asega.
10Era ilpu mapoi Sem ara sji igki: Is umoh a Sem irai mesese is wun huntret (100), um apos Arfaksat, is uhup um ahgarero nobohtan, ja par ti pan itac inmesese is ero:
11is apos Arfaksat a Sem, ja par umoh irai mesese is faiv huntret (500), um apos ilpu halav atamaig im ilpu halav atahig.
12Is umoh a Arfaksat irai mesese is dirte faiv (35), um apos Sela:
13is apos Sela a Arfaksat, ja par umoh irai mesese is for huntret im dri (403), um apos ilpu halav atamaig im ilpu halav atahig.
14Is umoh a Sela irai mesese is dirte (30), um apos Iber:
15is apos Iber a Sela, ja par umoh irai mesese is for huntret im dri (403), um apos ilpu halav atamaig im ilpu halav atahig.
16Is umoh a Iber irai mesese is dirte for (34), um apos Pilec:
17is apos Pilec a Iber, ja par umoh irai mesese is for huntret im dirte (430), um apos ilpu halav atamaig im ilpu halav atahig.
18Is umoh a Pilec irai mesese is dirte (30), um apos Riu:
19is apos Riu a Pilec, ja par umoh irai mesese is tu huntret im nain (209), um apos ilpu halav atamaig im ilpu halav atahig.
20Is umoh a Riu irai mesese is dirte tu (32), um apos Siruc:
21is apos Siruc a Riu, ja par umoh irai mesese is tu huntret im seven (207), um apos ilpu halav atamaig im ilpu halav atahig.
22Is umoh a Siruc irai mesese is dirte (30), um apos Nehor:
23is apos Nehor a Siruc, ja par umoh irai mesese is tu huntret (200), um apos ilpu halav atamaig im ilpu halav atahig.
24Is umoh a Nehor irai mesese is twente nain (29), um apos Tira:
25is apos Tira a Nehor, ja par umoh irai mesese is wun huntret im naintiin (119), um apos ilpu halav atamaig im ilpu halav atahig.
26Is umoh a Tira irai mesese is sevente (70), um apos Ebram, im Nehor, im Heran.
27Eris ilpu mapoi Tira ara sji igki: Is apos Ebram, Nehor, im Heran a Tira; is lep apos Lot a Heran.
28Is mas a Heran um uhup irai Tira etman an pece iyehki eris apos yin iran, nikavaig, Ur an pece Kaltia.
29Erus leh ehgarau a Ebram im Nehor: nidai ehgai Ebram Sere; im nidai ehgai Nehor Milka, inhalav atahig u Heran, is etmai Milka aien, im etmai Iska.
30Ja is eti asvalav a Sere; is ti tah inhal o un.
31Is leh Ebram inhal o un a Tira, im Lot inhal u Heran mapon, im Sere nohwanig o un, ehgai Ebram inhal o un; eris ahes Ur ara, an pece u nup u Kaltia, um ahced ra par apan an pece Kenan; eris yetpan Heran ara, um amen eahki.
32Is umoh a Tira irai mesese is tu huntret im faiv (205): is lep mas a Tira an pece Heran.
Zur Zeit ausgewählt:
Jenesis Nuarin-tas alupas 11.: ABO
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)