तीतस 1
1
1परमेश्वरक सेवक ओ येशू ख्रीष्टक प्रेरित मै पावल यी चिठी लिखटुँ। परमेश्वरक र्वाजल मनैन विश्वासम बलगर कराइक लाग ओ हुँकन सत्य बातक ज्ञान देहक लाग मै पठागैनु। उ ज्ञान हुँकन परमेश्वरक इच्छा अनुसार जीवन जियक लाग सहायता पुगैठन। 2ओ उ विश्वास ओ ज्ञान अनन्त जीवन पैना आशम आधारित बा, जौन जीवन झूट नैबोल्ना परमेश्वर सृष्टिसे आघहेँ हमन देना प्रतिज्ञा कर्ल। 3उहाँ ठीक समयम आपन वचन खुशीक खबरक प्रचारद्वारा प्रकट कर्ल। उ खबर प्रचार कर्ना जिम्मा, हमन मुक्ति देहुइया परमेश्वरक आज्ञा अनुसार, महीह लगागैल्।
4तीतस, मै टुँहीन यी चिठी लिखटुँ। टुँ म्वार सग्ग छावाअस हुइटो, काकरकि हमार विश्वास एक्क बा। परमेश्वर बाबा ओ हमन मुक्ति देहुइया ख्रीष्ट येशू टुँहीन अनुग्रह ओ शान्ति देहीँ कना म्वार आशा बा।#२ कोर ८:२३; गला २:३; २ तिमो ४:१०
तीतसह सल्लाह
5टुँ, म्वार देहल निर्देशन अनुसार, बाँकी रहल काम पूरा करक लाग ओ हरेक सहरम परिपक्व मनैन एल्डर पदम नियुक्त करक लाग मै टुँहीन क्रेटम छोर्नहुँ। 6एल्डर निर्दोष जीवन जिएपर्ठा। ऊ एक्कठो गोसिन्या लेहपर्ठा, हुँकहार लर्कापर्का विश्वासी हुइपर्ठा, ओ खराब चरित्र रहल ओ कहल नैमन्ना बातक दोष लगैना ठाउँ रहल नैहुइपरट्।#१ तिमो ३:२-७ 7मण्डलीक अगुवा परमेश्वरक कामक रेखदेख करुइया हुइलकओर्से, ऊ निर्दोष जीवन जिएपर्ठा। ऊ जिद्दीवाल, झनक्क रिसाजैना, मत्वर्या, झगरगाँठ्या, या धनक लोभी हुइ नैपरट्। 8बेनसे ऊ आपन घरम आइल मनैन स्वागतसत्कार कर्ना, असल काम मन परैना, विचारशील, इमान्दार, पवित्र, ओ आत्मसंयमी हुइपर्ठा। 9ऊ सत्य शिक्षले औरजहन हौसला देह सेकहीँ, ओ यी बातक विरोध करुइयन्हक गल्ती फे देखादेह सेकहीँ कैक हुँकहीन सिखागैल् विश्वासयोग्य वचनम ऊ अडिग रहपर्ठा।
तीतसह चेताउनी
10काकरकि धेर मनै अगुवन्हक अधीनम नैरना, फोगट्या गफ लगैना, ओ छली रठ। खासकैक खतना करपर्ठा कैक कहुइयन ओसिन बाट। 11हुँकन्हक मुहम बुजा नैलगाक नैहुई, काकरकि हुँक्र पैँसा कमाइक लाग झूट शिक्षा सिखाक सारा घरपरिवारक मनैन भाँरडार्ट। 12एकचो हुँकन्हक्के एकठो अगमवक्ता हुँकन्हक बारेम असिक कलह, “क्रेट टापुक मनै सड्ड झूट बोलुइयन, जङ्गली जनावरक स्वभाव रहल दुष्ट मनै, ओ कोह्री डलिड्डर हुइट।” 13हुँकहार कहल बात सत्य हो। उहओर्से हुँक्र पक्का विश्वासी हुइसेकहीँ कैक हुँकन कर्रसे हप्काओ, 14ओ यहूदीन्हक बट्कोहीम ओ सत्य बातह इन्कार करुइयन्हक आज्ञम ध्यान नैदेहीँ।
15शुद्ध मन रहल मनैन्हक लाग सब चिज शुद्धह रठा। तर भ्रष्ट मन रहल ओ विश्वास नैकर्ना मनैन्हक लाग कुछु चिज फे शुद्ध नैरहट्, काकरकि हुँकन्हक मन ओ विवेक जो भ्रष्ट रठन। 16हुँक्र परमेश्वरह चिह्न्लक दाबी त कर्ठ, तर हुँकन्हक व्यवहारले हुँक्र परमेश्वरह इन्कार कर्लक बात देखैठन। हुँक्र घिनलग्टिक ओ अनाज्ञाकारी बाट, ओ कुछु असल काम कर जन्ना नैहुइट।
Zur Zeit ausgewählt:
तीतस 1: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.