प्रकाश 3
3
सार्डिसक मण्डलीह सन्देश
1“सार्डिस मण्डलीक हेरविचार कर्ना दूतह यी बात लिखो:
ज्याकरठे सातठो तोरैँया ओ परमेश्वरक सातठो आत्मा बा, उहाँ असिक कठ:
टुँहार काम महीह थाहाँ बा, टुह्र जिटीह बाटो कना नाउँ चलल् बा, तर वास्तवम टुह्र मुवल बाटो। 2उहओर्से जागो ओ टुन्हकठे मुवमुव रहल डान्चे चिजह बचैल रहो काकरकि परमेश्वरक आघ टुँहार काम मै सिद्ध नैभेटैलहुइटुँ। 3टुँ आपन सुनल ओ सिखल बातक सम्झना करो। उ बात मानो ओ आपन पापी मन परिवर्तन करो। टुह्र जागा नैहुइबो कलसे मै टुन्हकठे चोर्वा आइअस सुटुक्क अइनेबाटुँ ओ मै कैह्या अइम कना बात टुँहन थाहाँ नैहुइनेहो।#मत्ती २४:४३-४४; लूक १२:३९-४०; प्रका १६:१५
4तर सार्डिसम फे कुई-कुई मनै बाट, जे आपन लुगा फुहर बनैल नैहुइट। हुँक्र उज्जर लुगा लगाक म्वारसँग नेङ्गहीँ काकरकि हुँक्र असिक कर्ना योग्यक बाट। 5जे जिती, उह असिन उज्जर लुगा लगैनेबा ओ वाकर नाउँ मै जीवनक किताबमसे कबु फे मेटैने नैहुइटुँ, ओ ऊ म्वार हो कैक आपन बाबा ओ उहाँक सब स्वर्गदूतन्हक आघ स्वीकार कर्नेबाटुँ।#प्रस ३२:३२-३३; भज ६९:२८; प्रका २०:१२; मत्ती १०:३२; लूक १२:८ 6ज्याकर कान बा, पवित्र आत्मा मण्डलीहुँकन कहल बात सुन!
फिलाडेल्फियक मण्डलीह सन्देश
7“फिलाडेल्फिया मण्डलीक हेरविचार कर्ना दूतह यी बात लिखो:
उहाँ जे पवित्र ओ सत्य बाट, ज्याकर हाँठम दाऊद राजक साँचा बाटन ओ ज्याकर ख्वालल् ड्वार कुई फे बन्द कर नैस्याकट् अथवा बन्द करल ड्वार कुई फे ख्वाल नैस्याकट्, उहाँ असिक कठ:#यशै २२:२२; अयू १२:१४ 8टुँहार काम महीह थाहाँ बा। मै टुँहार लाग ड्वार खोलदेरख्नु, ओहीह कुई फे बन्द कर नैसक्ने हो। कमजोर रलसे फे टुँ म्वार सब वचन मानरख्लो ओ म्वार नाउँ इन्कार नैकर्लहुइटो। 9हेरो, हम्र यहूदी हुइटी कैक झूट बोलुइयन यिहाँ बाट। हुँक्र त शैतानक बगालिक हुइट। हुँकन मै टुँहार पाउम दण्डवत् कर लगैनेबाटुँ ओ मै टुँहीन प्रेम कर्ठुं कना बात हुँक्र थाहाँ पैनेबाट।#यशै ४९:२३; ६०:१४; ४३:४
10पृथ्वीक सब जातिन जाँच करक लाग यी संसारम अइना दुःखकष्टमसे मै टुँहन जोगैम काकरकि टुह्र धेर बात सह्क म्वार आज्ञा मानरख्लो। 11मै झट्टहेँ अइनेबाटुँ। टुन्हकठे रहल विश्वास कर्रसे पक्रलरहो, ताकि कुई फे टुन्हक विजयक मुकुट लिह जिन पाए। 12जितुइयह मै आपन परमेश्वरक मन्दिरम एकठो खुँटा बनैम ओ ओठेसे ऊ कबु फे निस्कने नैहो। मै वाकरम आपन परमेश्वरक नाउँ ओ स्वर्गसे टर अइना उहाँक सहर लौव यरूशलेमक नाउँ लिखम ओ वाकरम आपन लौव नाउँ फे लिखम।#प्रका २१:२; यशै ६२:२; ६५:१५ 13ज्याकर कान बा, पवित्र आत्मा मण्डलीहुँकन कहल बात सुन!
लाउडिकियक मण्डलीह सन्देश
14“लाउडिकिया मण्डलीह हेरविचार कर्ना दूतह यी बात लिखो:
परमेश्वरक सारा सृष्टिक मूल, जे विश्वासयोग्य बाट, ओ सत्य साक्षी ओ आमेन हुइट, उहाँ असिक कठ:#हितो ८:२२
15टुन्हक काम मै जन्ठुँ। टुह्र ना त जुर ना तातुल बाटो। टुह्र जुर कि तातुल रटो त हुइनेरह। 16तर टुह्र ना त जुर ना तातुल तर मनतातुल रलकओर्से मै आपन मुहमसे टुँहन उल्टी कैदेहम। 17मै धनी बाटुँ ओ महीह कुछु चिजिक कमी नैहो कैक टुँ कठो तर टुँ कत्रा दुःखी, स्वाग लग्टिक, कङ्गाल, आन्धर ओ नङ्गा बाटो कना टुँहीन थाहाँ नैहो। 18तर मै टुँहीन असिन सल्लाह देठुँ, सड्ड धनी हुइक लाग आगीले खारल स्वान महीसे किनो। आपन लाज छ्वापक लाग उज्जर लुगा महीसे किन्क लगाओ, देख्नाहा हुइक लाग महीसे मलम किन्क लगाओ।
19जेहीह मै प्रेम कर्ठुं, ओहीह मै हप्कैठुँ ओ सजाय देठुँ। उहओर्से आपन पापी मन परिवर्तन कैक म्वारठे आओ ओ उत्साहित होओ।#हितो ३:१२; हिब १२:६ 20हेरो! मै ड्वारिम ठह्र्याक ढकढकैटीबाटुँ। कुई म्वार आवाज सुन्क ड्वार खोलदेहल कलसे मै भित्तर आक वाकरसँग भोजन खैबु ओ ऊ म्वारसँग खैनेबा। 21जितुइयह मै आपन सिंहासनम महीसे सँग बैठ्ना हक देहम, जसिन कि मै जित्लकओर्से आपन बाबकसँग उहाँक सिंहासनम बैठ पारख्नु। 22ज्याकर कान बा, पवित्र आत्मा मण्डलीहुँकन कहल बात सुन!”
Zur Zeit ausgewählt:
प्रकाश 3: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
